₹500 ಲಂಚ ಕೊಟ್ಟಾಗ ಬೇಸರವಾಗಿತ್ತು ಎಂದಿದ್ದ ಟ್ರೇನಿ IPS ರಾಹುಲ್ ಬನ್ಸಾಲ್ ವಿರುದ್ಧ ₹1 ಕೋಟಿ ಹವಾಲಾ ಲಂಚ ಕಂಟಕ!

ನವದೆಹಲಿ: ಯುಪಿಎಸ್ಸಿ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದಾಗ “₹500 ಲಂಚ ಕೊಟ್ಟು ನನಗೆ ಬಹಳ ಬೇಸರವಾಗಿತ್ತು” ಎಂದು ಸಂದರ್ಶನದಲ್ಲಿ ಹೇಳಿದ್ದ ಉನ್ನತ ಮಟ್ಟದ ಅಧಿಕಾರಿಯೊಬ್ಬರು ಇಂದು ಸ್ವತಃ ₹1 ಕೋಟಿ ಲಂಚ ಪಡೆದ ಗಂಭೀರ ಆರೋಪ ಎದುರಿಸುತ್ತಿದ್ದಾರೆ!

ಛತ್ತೀಸ್‌ಗಢ ಕೆಡರ್‌ನ 2022 ರ ಬ್ಯಾಚ್‌ನ ಟ್ರೇನಿ ಐಪಿಎಸ್ ಅಧಿಕಾರಿ ರಾಹುಲ್ ಬನ್ಸಾಲ್ ಅವರ ವಿರುದ್ಧ ಈ ಆರೋಪ ಕೇಳಿಬಂದಿದ್ದು, ಅವರ ಹಳೆಯ ಅಣಕು ಸಂದರ್ಶನದ (Mock Interview) ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ.

₹1 ಕೋಟಿ ಲಂಚದ ಆರೋಪ:

ಛತ್ತೀಸ್‌ಗಢದ ಸರ್ಗುಜಾ ಜಿಲ್ಲೆಯ ಸಿಎಸ್‌ಪಿ (CSP) ಆಗಿ ತಮ್ಮ ಮೊದಲ ಫೀಲ್ಡ್ ಪೋಸ್ಟಿಂಗ್‌ನಲ್ಲಿದ್ದ ರಾಹುಲ್ ಬನ್ಸಾಲ್, ಸೈಬರ್ ವಂಚನೆ ಪ್ರಕರಣವೊಂದನ್ನು ಇತ್ಯರ್ಥಪಡಿಸಲು ಎಎಸ್‌ಐ ಪ್ರವೀಣ್ ಕುಮಾರ್ ರಾಥೋಡ್ ಹಾಗೂ ಕಾನ್‌ಸ್ಟೇಬಲ್ ಅಂಶುಲ್ ಶರ್ಮಾ ಜೊತೆಗೂಡಿ ₹1 ಕೋಟಿ ಲಂಚ ಪಡೆದಿದ್ದಾರೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ. ಈ ಹಣವನ್ನು ಮೇ 2026 ರಲ್ಲಿ ‘ಹವಾಲಾ’ ಮಾರ್ಗಗಳ ಮೂಲಕ ₹50 ಲಕ್ಷಗಳ ಎರಡು ಕಂತುಗಳಲ್ಲಿ ವರ್ಗಾಯಿಸಲಾಗಿದೆ ಎನ್ನಲಾಗಿದೆ.

ಸಿಬಿಐ ಕೋರ್ಟ್ ನೋಟಿಸ್:

ದೆಹಲಿಯ ರೌಸ್ ಅವೆನ್ಯೂದಲ್ಲಿರುವ ವಿಶೇಷ ಸಿಬಿಐ ನ್ಯಾಯಾಲಯಕ್ಕೆ ದೂರುದಾರರು ವಾಟ್ಸಾಪ್ ಚಾಟ್‌ಗಳು ಮತ್ತು ಕಾಲ್ ರೆಕಾರ್ಡಿಂಗ್‌ಗಳನ್ನೊಳಗೊಂಡ ಡಿಜಿಟಲ್ ಸಾಕ್ಷ್ಯಾಧಾರಗಳನ್ನು ಸಲ್ಲಿಸಿದ್ದಾರೆ. ದೂರು ಪರಿಶೀಲಿಸಿದ ನ್ಯಾಯಾಲಯವು ಛತ್ತೀಸ್‌ಗಢ ಡಿಜಿಪಿ (DGP) ಹಾಗೂ ಸಿಬಿಐ ನಿರ್ದೇಶಕರಿಂದ ಆಕ್ಷನ್ ಟೇಕನ್ ರಿಪೋರ್ಟ್ (Action Taken Report – ATR) ಕೋರಿದೆ.

ವೈರಲ್ ವೀಡಿಯೋ ಮತ್ತು ವ್ಯಂಗ್ಯ:

ಸಿವಿಲ್ ಸೇವೆಗೆ ಸೇರುವ ಮುನ್ನ ನೀಡಿದ್ದ ಸಂದರ್ಶನದಲ್ಲಿ ರಾಹುಲ್ ಬನ್ಸಾಲ್, “ನನ್ನ ಸಹೋದರನ ಜನನ ಪ್ರಮಾಣಪತ್ರಕ್ಕಾಗಿ ಪಂಚಾಯತ್ ಅಧಿಕಾರಿಯೊಬ್ಬರು ₹500 ಲಂಚ ಕೇಳಿದ್ದರು. ಆ ಲಂಚ ನೀಡಿದಾಗ ನನಗೆ ಬಹಳ ಕೆಟ್ಟ ಅನಿಸಿಕೆಯಾಗಿತ್ತು. ವ್ಯವಸ್ಥೆಯಲ್ಲಿ ಸುಧಾರಣೆ ತರಬೇಕು” ಎಂದು ಹೇಳಿದ್ದರು. ಆದರೆ, ಸೇವೆಗೆ ಸೇರಿದ ಕೆಲವೇ ದಿನಗಳಲ್ಲಿ ₹500 ಕ್ಕಿಂತ 20,000 ಪಟ್ಟು ದೊಡ್ಡ ಮೊತ್ತದ (₹1 ಕೋಟಿ) ಲಂಚದ ಪ್ರಕರಣದಲ್ಲಿ ಅವರ ಹೆಸರು ಕೇಳಿಬಂದಿರುವುದು ಸಾರ್ವಜನಿಕರಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.