ಪಾಕ್‌ನಲ್ಲಿ ಕುಳಿತು ಪಹಲ್ಗಾಮ್ ನಲ್ಲಿ ನೆತ್ತರು ಹರಿಸಿದ್ದ ಲಷ್ಕರ್ ಕಮಾಂಡರ್ ಸೈಫುಲ್ಲಾಗೆ ಜಾಮೀನು ರಹಿತ ವಾರಂಟ್ ಜಾರಿ!

ಕಾಶ್ಮೀರ: ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ ದಾಳಿ ಸೇರಿದಂತೆ ಹಲವು ಭಯೋತ್ಪಾದನಾ ಕೃತ್ಯಗಳಿಗೆ ಸಂಬಂಧಿಸಿದಂತೆ, ಪಾಕಿಸ್ತಾನ ಮೂಲದ ಲಷ್ಕರ್-ಎ-ತೊಯ್ಬಾ (LeT) ಉಗ್ರ ಸಂಘಟನೆಯ ಹಿರಿಯ ಕಮಾಂಡರ್ ಸೈಫುಲ್ಲಾ ವಿರುದ್ಧ ಜಮ್ಮುವಿನ ವಿಶೇಷ ಎನ್‌ಐಎ (NIA) ನ್ಯಾಯಾಲಯವು ಜಾಮೀನು ರಹಿತ ವಾರಂಟ್ (Non-Bailable Warrant) ಜಾರಿಗೊಳಿಸಿದೆ.

ಪಾಕಿಸ್ತಾನದಿಂದ ಉಗ್ರರ ನಿಯಂತ್ರಣ:

ಪಾಕಿಸ್ತಾನದ ಕಸೂರ್ ಜಿಲ್ಲೆಯ ಚಂಗಾ ಮಂಗಾ ಗ್ರಾಮದ ನಿವಾಸಿಯಾಗಿರುವ ಸೈಫುಲ್ಲಾ, ಕಳೆದ ಎರಡು ದಶಕಗಳಿಗೂ ಹೆಚ್ಚು ಕಾಲದಿಂದ ಉಗ್ರ ಚಟುವಟಿಕೆಗಳಲ್ಲಿ ಸಕ್ರಿಯನಾಗಿದ್ದಾನೆ. ಈತ ಪಾಕಿಸ್ತಾನದಲ್ಲೇ ಸುರಕ್ಷಿತವಾಗಿ ಕುಳಿತು ಜಮ್ಮು ಮತ್ತು ಕಾಶ್ಮೀರ ಕಣಿವೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಉಗ್ರರಿಗೆ ಮಾರಕಾಸ್ತ್ರಗಳು, ಹಣಕಾಸಿನ ನೆರವು ಹಾಗೂ ಆತ್ಮಾಹುತಿ ದಾಳಿಗಳಿಗೆ ನಿರ್ದೇಶನಗಳನ್ನು ನೀಡುತ್ತಿದ್ದ ಎಂದು ರಾಷ್ಟ್ರೀಯ ತನಿಖಾ ಸಂಸ್ಥೆ ನ್ಯಾಯಾಲಯಕ್ಕೆ ಸಲ್ಲಿಸಿದ ಅರ್ಜಿಯಲ್ಲಿ ತಿಳಿಸಿದೆ.

ಇತರ ಅಲಿಯಾಸ್ ಹೆಸರುಗಳು:

ಯುಎಪಿಎ ಕಾಯ್ದೆಯಡಿ ‘ನಿಯೋಜಿತ ಭಯೋತ್ಪಾದಕ’ ಎಂದು ಪಟ್ಟಿ ಮಾಡಲ್ಪಟ್ಟಿರುವ ಈತನಿಗೆ ಹಲವು ಅಲಿಯಾಸ್ ಹೆಸರುಗಳಿವೆ. ಈತನನ್ನು ಸಾಜಿದ್ ಜಟ್, ಅಲಿ ಭಾಯಿ, ಹಬೀಬುಲ್ಲಾ ಮಲಿಕ್, ಲಂಗ್ಡಾ, ನೂಮಿ, ನುಮಾನ್, ಉಸ್ಮಾನ್ ಹಬೀಬ್ ಮತ್ತು ಶಾನಿ ಎಂಬ ವಿಭಿನ್ನ ಹೆಸರುಗಳಿಂದ ಕರೆಯಲಾಗುತ್ತದೆ.

ಪ್ರಕರಣ ಬೆನ್ನತ್ತಿದ ಎನ್‌ಐಎ :

ಮಾರ್ಚ್ ತಿಂಗಳಲ್ಲಿ ಶ್ರೀನಗರದ ಪಾಂಡಾಚ್ ಪ್ರದೇಶದಲ್ಲಿ ಜಮ್ಮು ಮತ್ತು ಕಾಶ್ಮೀರ ಪೊಲೀಸರು ಎಲ್‌ಇಟಿ ಉಗ್ರನೊಬ್ಬನನ್ನು ವಶಕ್ಕೆ ಪಡೆದಿದ್ದರು. ಈತನ ತನಿಖೆಯಿಂದ ಲಷ್ಕರ್‌ನ ಬೃಹತ್ ಜಾಲ ಬಯಲಿಗೆ ಬಂದಿತ್ತು. ಕಣಿವೆಯಲ್ಲಿ 16 ವರ್ಷಗಳಿಂದ ತಲೆಮರೆಸಿಕೊಂಡು ನೆಲೆ ಸ್ಥಾಪಿಸಿದ್ದ ಪಾಕಿಸ್ತಾನಿ ಭಯೋತ್ಪಾದಕ ಅಬ್ದುಲ್ಲಾ (ಅಲಿಯಾಸ್ ಅಬು ಹುರೈರಾ), ಉಸ್ಮಾನ್ (ಅಲಿಯಾಸ್ ಖುಬೈಬ್) ಹಾಗೂ ಮೂವರು ಸ್ಥಳೀಯ ಸಹಚರರನ್ನು ಬಂಧಿಸಲಾಗಿತ್ತು.

ಬಂಧಿತ ಪಾಕಿಸ್ತಾನಿ ಉಗ್ರರಿಂದ ವಶಪಡಿಸಿಕೊಂಡ ಟೆಲಿಗ್ರಾಂ ಐಡಿಗಳನ್ನು (Telegram IDs) ಪರಿಶೀಲಿಸಿದಾಗ, ಸೈಫುಲ್ಲಾ ನೇರವಾಗಿ ಭಾರತದ ಭದ್ರತಾ ಪಡೆಗಳು, ನಾಗರಿಕರು ಮತ್ತು ಸರ್ಕಾರಿ ಸಂಸ್ಥೆಗಳ ಮೇಲೆ ದಾಳಿ ನಡೆಸಲು ಪಾಕಿಸ್ತಾನದಿಂದಲೇ ಆಜ್ಞೆಗಳನ್ನು ಕಳುಹಿಸುತ್ತಿದ್ದುದು ಸಾಬೀತಾಗಿದೆ.

ದಕ್ಷಿಣ ಕಾಶ್ಮೀರದ ಸಂಪರ್ಕ:

ಎನ್‌ಐಎ ನೀಡಿದ ಮಾಹಿತಿಯಂತೆ, ಸೈಫುಲ್ಲಾ 2005 ರಿಂದ 2007 ರವರೆಗೆ ದಕ್ಷಿಣ ಕಾಶ್ಮೀರದ ಕುಲ್ಗಾಮ್ ಜಿಲ್ಲೆಯಲ್ಲಿ ಎಲ್‌ಇಟಿ ಜಿಲ್ಲಾ ಕಮಾಂಡರ್ ಆಗಿ ಕಾರ್ಯನಿರ್ವಹಿಸಿದ್ದ. ನಂತರ ಗಡಿ ದಾಟಿ ಪಾಕಿಸ್ತಾನಕ್ಕೆ ಪಲಾಯನ ಮಾಡಿದ್ದ.

ನ್ಯಾಯಾಲಯದ ವಾರಂಟ್ ಜಾರಿ:

ಸೆಪ್ಟೆಂಬರ್ 8 ರಂದು ಹೊರಡಿಸಲಾದ ಕೋರ್ಟ್ ಆದೇಶವನ್ನು ಉಲ್ಲೇಖಿಸಿ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದು, ಆರೋಪಿಯು ತಲೆಮರೆಸಿಕೊಂಡಿದ್ದು ಸಾಮಾನ್ಯ ರೀತಿಯಲ್ಲಿ ಆತನನ್ನು ಬಂಧಿಸಲು ಸಾಧ್ಯವಾಗದಿರುವುದರಿಂದ ಈ ಸಾಮಾನ್ಯ ಜಾಮೀನು ರಹಿತ ಅರೆಸ್ಟ್ ವಾರಂಟ್ ಜಾರಿಗೊಳಿಸಲಾಗಿದೆ. ಆತನ ಕೊನೆಯ ಸ್ಥಳೀಯ ವಿಳಾಸ ದಕ್ಷಿಣ ಕಾಶ್ಮೀರದ ಕುಲ್ಗಾಮ್ ಜಿಲ್ಲೆಯ ಯಾಮ್ರಾಚ್ ಗ್ರಾಮವಾಗಿದ್ದರಿಂದ, ಕಾನೂನುಬದ್ಧವಾಗಿ ವಾರಂಟ್ ಜಾರಿಗೊಳಿಸಲು ಕುಲ್ಗಾಮ್ ಎಸ್‌ಎಸ್‌ಪಿ ಅವರಿಗೆ ಇದನ್ನು ಹಸ್ತಾಂತರಿಸಲಾಗಿದೆ.