ಖಾಸಗಿ ಆಸ್ಪತ್ರೆಗಳ ಕೊಳ್ಳೆ ಹೊಡೆತ ಬಯಲಿಗೆಳೆದ IAS ತುಕಾರಾಂ ಮುಂಡೆ: ₹11ರ ಪ್ರೊಡಕ್ಟ್‌ಗೆ ₹325 ವಸೂಲಿ!

ನವದೆಹಲಿ/ಮುಂಬೈ: ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುವ ರೋಗಿಗಳಿಗೆ ಚಿಕಿತ್ಸಾ ವೆಚ್ಚಕ್ಕಿಂತ ಹೆಚ್ಚಾಗಿ, ಅಲ್ಲಿ ಬಳಸುವ ವೈದ್ಯಕೀಯ ಉಪಕರಣಗಳು ಹಾಗೂ ಸರ್ಜಿಕಲ್ ಸಾಮಗ್ರಿಗಳ ಹೆಸರಿನಲ್ಲಿ ಅಗಾಧ ಪ್ರಮಾಣದ ಹಣ ಸುಲಿಗೆ ಮಾಡಲಾಗುತ್ತಿದೆ ಎಂಬ ದಿಗಿಲುಗೊಳಿಸುವ ಸತ್ಯ ಬಯಲಾಗಿದೆ. ಮಹಾರಾಷ್ಟ್ರದ ಆಹಾರ ಮತ್ತು ಔಷಧ ಆಡಳಿತ (FDA) ಕಮಿಷನರ್ ಹಾಗೂ ದಕ್ಷ ಐಎಎಸ್ ಅಧಿಕಾರಿ ತುಕಾರಾಂ ಮುಂಡೆ ಅವರು ಆಸ್ಪತ್ರೆಗಳ ಈ ಬೃಹತ್ ದಂದೆಯನ್ನು ಬಹಿರಂಗಪಡಿಸಿದ್ದಾರೆ.

ಶೇಕಡಾ 2,841 ರಷ್ಟು ಬೃಹತ್ ಲಾಭ

ಮಹಾರಾಷ್ಟ್ರ ಎಫ್‌ಡಿಎ ನಡೆಸಿದ ಸಮೀಕ್ಷೆಯ ವರದಿಯನ್ನು ಉಲ್ಲೇಖಿಸಿ ತುಕಾರಾಂ ಮುಂಡೆ ಅವರು ಸಾಮಾಜಿಕ ಜಾಲತಾಣದಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ. ಆಸ್ಪತ್ರೆಗಳು ಮತ್ತು ವಿತರಕರು ಮೂಲ ಬೆಲೆಗಿಂತ (Trade Price) ನೂರಾರು ಪಟ್ಟು ಹೆಚ್ಚಿನ ಗರಿಷ್ಠ ಚಿಲ್ಲರೆ ಬೆಲೆ (MRP) ನಿಗದಿಪಡಿಸಿ ರೋಗಿಗಳನ್ನು ಸುಲಿಗೆ ಮಾಡುತ್ತಿದ್ದಾರೆ:

IV ಇನ್ಫ್ಯೂಷನ್ ಸೆಟ್ (IV Infusion Set): ಇದರ ಪ್ರೊಕ್ಯೂರ್‌ಮೆಂಟ್/ಟ್ರೇಡ್ ಬೆಲೆ ಕೇವಲ ₹11.05, ಆದರೆ ಮುದ್ರಿತ MRP ₹325! (ಅಂದರೆ ಶೇ. 2,841 ರಷ್ಟು ಮಾರ್ಜಿನ್!)

ಸಿರಿಂಜ್ : ಖರೀದಿ ಬೆಲೆ ₹6.75, ಆದರೆ ಮುದ್ರಿತ MRP ₹57.20.

ಕ್ಯಾಥೆಟರ್ : ಖರೀದಿ ಬೆಲೆ ₹29.41, ಆದರೆ ಮುದ್ರಿತ MRP ₹310.

“ರೋಗಿಯು ಆಸ್ಪತ್ರೆಗೆ ದಾಖಲಾದಾಗ ಅಲ್ಲಿ ನೀಡುವ ವೈದ್ಯಕೀಯ ವಸ್ತುಗಳ ಅಸಲಿ ವೆಚ್ಚ ಎಷ್ಟು, ಅದಕ್ಕೆ ಎಷ್ಟು ಮಾರ್ಜಿನ್ ಸೇರಿಸಲಾಗಿದೆ ಎಂಬುದನ್ನು ತಿಳಿದುಕೊಳ್ಳುವ ಯಾವುದೇ ಅವಕಾಶ ಅವರಿಗಿರುವುದಿಲ್ಲ. ಇಂತಹ ಮಾಹಿತಿ ಕೊರತೆಯು ಸಾರ್ವಜನಿಕ ಆರೋಗ್ಯ ಕ್ಷೇತ್ರದ ಗಂಭೀರ ಸಮಸ್ಯೆಯಾಗಿದೆ.”

– ತುಕಾರಾಂ ಮುಂಡೆ, ಕಮಿಷನರ್, ಮಹಾರಾಷ್ಟ್ರ FDA

ನಿಯಂತ್ರಣ ಮಂಡಳಿಯ ಕಾನೂನು ಕೊರತೆ:

ಪ್ರಸ್ತುತ ‘ಔಷಧಗಳ ಬೆಲೆ ನಿಯಂತ್ರಣ ಆದೇಶ, 2013’ (DPCO) ಅಡಿಯಲ್ಲಿ ನಿಗದಿತ ಜೀವ ರಕ್ಷಕ ಔಷಧಗಳ ಮೇಲೆ ಬೆಲೆ ಮಿತಿ (Price Cap) ಇದೆಯೇ ಹೊರತು, ವೈದ್ಯಕೀಯ ಉಪಕರಣಗಳು ಮತ್ತು ಕನ್ಸ್ಯೂಮಬಲ್ಸ್‌ಗಳ ಮೇಲೆ ಯಾವುದೇ ಬೆಲೆ ನಿಯಂತ್ರಣವಿಲ್ಲ. ಉತ್ಪಾದಕರು ಮತ್ತು ವಿತರಕರು ತಮಗಿಷ್ಟ ಬಂದಂತೆ ಎಂಆರ್‌ಪಿ ನಿಗದಿಪಡಿಸುತ್ತಿದ್ದು, ಈ ನಿಯಂತ್ರಣವಿಲ್ಲದ ವ್ಯವಸ್ಥೆಯು ರೋಗಿಗಳನ್ನು ಸಂಕಷ್ಟಕ್ಕೆ ಸಿಲುಕಿಸಿದೆ.

ಕೇಂದ್ರ ಸರ್ಕಾರಕ್ಕೆ ತುಕಾರಾಂ ಮುಂಡೆ ಶಿಫಾರಸು:

ಈ ದಂದೆಗೆ ಕಡಿವಾಣ ಹಾಕಲು ತುಕಾರಾಂ ಮುಂಡೆ ಅವರು ಕೇಂದ್ರ ಔಷಧೀಯ ಇಲಾಖೆ ಹಾಗೂ ರಾಷ್ಟ್ರೀಯ ಔಷಧೀಯ ದರ ಪ್ರಾಧಿಕಾರಕ್ಕೆ (NPPA) ಕಟ್ಟುನಿಟ್ಟಿನ ಮಾರ್ಗಸೂಚಿಗಳನ್ನು ರಚಿಸುವಂತೆ ಶಿಫಾರಸು ಮಾಡಿದ್ದಾರೆ. ಮೂಲ ಟ್ರೇಡ್ ಬೆಲೆ ಮತ್ತು ಮುದ್ರಿಸುವ MRP ನಡುವೆ ಗರಿಷ್ಠ ಶೇಕಡಾವಾರು ಮಿತಿಯನ್ನು (Trade Margin Capping) ನಿಗದಿಪಡಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.