ಎಸ್‌ಬಿಐ ಸೈಬರ್ ದಾಳಿ ದೃಢ: ಡಾರ್ಕ್ ವೆಬ್‌ನಲ್ಲಿ ಸಾವಿರಾರು ಗ್ರಾಹಕರ ಮಾಹಿತಿ ಸೋರಿಕೆ!

ನವದೆಹಲಿ: ದೇಶದ ಅತಿದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್‌ ಆಗಿರುವ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್‌ಬಿಐ) ತನ್ನ ಗ್ರಾಹಕರ ದತ್ತಾಂಶವು ಸೈಬರ್ ದಾಳಿಗೆ ಒಳಗಾಗಿರುವುದನ್ನು ಅಧಿಕೃತವಾಗಿ ಖಚಿತಪಡಿಸಿದೆ. ಬ್ಯಾಂಕ್ ನೀಡಿರುವ ಮಾಹಿತಿಯ ಪ್ರಕಾರ, ಸುಮಾರು 3,897 ಗ್ರಾಹಕರ ವೈಯಕ್ತಿಕ ದಾಖಲೆಗಳು ಡಾರ್ಕ್ ವೆಬ್‌ನಲ್ಲಿ ಪತ್ತೆಯಾಗಿದ್ದು, ಗ್ರಾಹಕರ ಸುರಕ್ಷತೆ ಮತ್ತು ಸೈಬರ್ ಭದ್ರತೆಯ ಬಗ್ಗೆ ಗಂಭೀರ ಕಳವಳ ಮೂಡಿಸಿದೆ.

ಸ್ಟಾಕ್ ಎಕ್ಸ್‌ಚೇಂಜ್‌ಗಳಿಗೆ ನೀಡಿರುವ ಅಧಿಕೃತ ಮಾಹಿತಿಯ ಪ್ರಕಾರ, ಅಕ್ಟೋಬರ್ 16 ರಂದು ಸೆರ್‌ಟ್-ಇನ್, ರಕ್ಷಣಾ ಸೈಬರ್ ಏಜೆನ್ಸಿ ಮತ್ತು ಥ್ರೆಟ್ ಇಂಟೆಲಿಜೆನ್ಸ್ ಸಂಸ್ಥೆಯಿಂದ ಬಂದ ಎಚ್ಚರಿಕೆಯ ಮೇರೆಗೆ ಬ್ಯಾಂಕ್ ಈ ಬಗ್ಗೆ ತನಿಖೆ ಆರಂಭಿಸಿತ್ತು. ಡಾರ್ಕ್ ವೆಬ್‌ನಲ್ಲಿ ಲಭ್ಯವಿದ್ದ ಸುಮಾರು 3.75 ಲಕ್ಷ ದಾಖಲೆಗಳ ಪ್ರಾಥಮಿಕ ವಿಶ್ಲೇಷಣೆಯ ನಂತರ, ಅದರಲ್ಲಿ 3,897 ಗ್ರಾಹಕರ ವೈಯಕ್ತಿಕ ವಿವರಗಳು ಸೋರಿಕೆಯಾಗಿರುವುದು ದೃಢಪಟ್ಟಿದೆ.

ಸೋರಿಕೆಯಾದ ಮಾಹಿತಿಗಳು: ಗ್ರಾಹಕರ ಹೆಸರುಗಳು, ಮೊಬೈಲ್ ಸಂಖ್ಯೆಗಳು, ಜನ್ಮ ದಿನಾಂಕಗಳು, ಇಮೇಲ್ ವಿಳಾಸಗಳು, ವಾಸಸ್ಥಳದ ವಿಳಾಸಗಳು, ಶಾಖೆಯ ವಿವರಗಳು ಹಾಗೂ ಸಾಲಕ್ಕೆ ಸಂಬಂಧಿಸಿದ ಮೆಟಾಡೇಟಾ ಸೋರಿಕೆಯಾಗಿರುವ ಪಟ್ಟಿಯಲ್ಲಿ ಸೇರಿವೆ.

ಬ್ಯಾಂಕಿಂಗ್ ಕಾರ್ಯಗಳಿಗೆ ತೊಂದರೆಯಿಲ್ಲ: ಈ ಸೈಬರ್ ಘಟನೆಯು ಬ್ಯಾಂಕ್‌ನ ಮುಖ್ಯ ವ್ಯವಹಾರಗಳು, ಹಣಕಾಸು ಕಾರ್ಯಕ್ಷಮತೆ ಅಥವಾ ದೈನಂದಿನ ಸೇವೆಗಳಿಗೆ ಯಾವುದೇ ರೀತಿಯಲ್ಲಿ ಅಡ್ಡಿಪಡಿಸಿಲ್ಲ ಎಂದು ಎಸ್‌ಬಿಐ ಸ್ಪಷ್ಟಪಡಿಸಿದೆ.

ಸೈಬರ್ ಸುರಕ್ಷತಾ ಕ್ರಮಗಳು: ಎಸ್‌ಬಿಐ ತಕ್ಷಣವೇ ಸೈಬರ್ ಘಟನೆ ಎದುರಿಸುವ ಪ್ರೋಟೋಕಾಲ್‌ಗಳನ್ನು ಸಕ್ರಿಯಗೊಳಿಸಿದ್ದು, ಸೋರಿಕೆಯ ಮೂಲವನ್ನು ಪತ್ತೆಹಚ್ಚಲು ಮತ್ತು ಸಂಪೂರ್ಣ ತನಿಖೆ ನಡೆಸಲು ಸ್ವತಂತ್ರ ಸೈಬರ್ ಭದ್ರತಾ ಏಜೆನ್ಸಿಯನ್ನು ನಿಯೋಜಿಸಿದೆ.

ಹ್ಯಾಕರ್ ಗುಂಪೊಂದು ಬ್ರೀಚ್‌ಫೋರಮ್ಸ್ (BreachForums) ಮೂಲಕ ಲಕ್ಷಾಂತರ ಗ್ರಾಹಕರ ಡೇಟಾ ತಮ್ಮ ಬಳಿ ಇದೆ ಎಂದು ಹೇಳಿಕೊಂಡಿದೆ. ಸುಳ್ಳು ಅಥವಾ ದೊಡ್ಡ ಮಟ್ಟದಲ್ಲಿ ಹ್ಯಾಕ್ ಮಾಡುವ ಪ್ರಯತ್ನ ಮಾಡಿದ್ದರೂ, ಎಸ್‌ಬಿಐ ಕೇವಲ 3,897 ಗ್ರಾಹಕರ ದತ್ತಾಂಶ ಮಾತ್ರ ಬಹಿರಂಗಗೊಂಡಿರುವುದನ್ನು ದೃಢಪಡಿಸಿ ನಿಗಾ ವಹಿಸಿದೆ. ಬ್ಯಾಂಕಿಂಗ್ ವಲಯದಲ್ಲಿ ಹೆಚ್ಚುತ್ತಿರುವ ಸೈಬರ್ ಬೆದರಿಕೆಗಳ ಹಿನ್ನೆಲೆಯಲ್ಲಿ ಈ ಘಟನೆ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.