ಬೈಕ್ ಟ್ಯಾಕ್ಸಿ ಮಧ್ಯದಲ್ಲೇ ಇಳಿಸಿ ವಿವಾದ ಸೃಷ್ಟಿಸಿದ ಚಾಲಕ, ಸಾಫ್ಟ್‌ವೇರ್ ಇಂಜಿನಿಯರ್ ದೂರು!

ಪುಣೆ: ಮಹಾರಾಷ್ಟ್ರದ ಪುಣೆಯಲ್ಲಿ ಆಘಾತಕಾರಿ ಘಟನೆಯೊಂದು ನಡೆದಿದ್ದು, ಸಾಫ್ಟ್‌ವೇರ್ ಇಂಜಿನಿಯರ್ ಆಗಿರುವ ಮಹಿಳೆಯೊಬ್ಬರು ಬೈಕ್-ಟ್ಯಾಕ್ಸಿ ಚಾಲಕ ತನ್ನ ಪ್ರಯಾಣವನ್ನು ಅರ್ಧದಲ್ಲೇ ಮೊಟಕುಗೊಳಿಸಿ, ವಾಗ್ವಾದ ನಡೆಸಿ ವೀಡಿಯೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ ಎಂದು ಆರೋಪಿಸಿ ಪೊಲೀಸ್ ದೂರು ದಾಖಲಿಸಿದ್ದಾರೆ. ಈ ಘಟನೆಯು ಪ್ರಯಾಣಿಕರ ಸುರಕ್ಷತೆ ಮತ್ತು ಚಾಲಕರ ನಡವಳಿಕೆಯ ಬಗ್ಗೆ ಗಂಭೀರ ಕಳವಳ ಮೂಡಿಸಿದೆ.

ದೂರುದಾರರಾದ 42 ವರ್ಷದ ಪೂಜಾ ದೀಪಕ್ ಸಾವ್ ಅವರು ಪುಣೆಯ ಐಟಿ ಕಂಪನಿಯೊಂದರಲ್ಲಿ ಸಾಫ್ಟ್‌ವೇರ್ ಇಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಹಿಂಜೆವಾಡಿಯ ತಮ್ಮ ಕಚೇರಿಗೆ ತೆರಳಲು ಮಧ್ಯಾಹ್ನ 1 ಗಂಟೆ ಸುಮಾರಿಗೆ ಬೈಕ್ ಟ್ಯಾಕ್ಸಿ ಬುಕ್ ಮಾಡಿದ್ದರು. ಸನ್ಸ್‌ ವರ್ಲ್ಡ್, ಸುಸ್  ಮಾರ್ಗವಾಗಿ ತೆರಳುವಂತೆ ಪೂಜಾ ಚಾಲಕನಿಗೆ ವಿನಂತಿಸಿದ್ದಾರೆ. ಆದರೆ ಚಾಲಕ ಇದನ್ನು ನಿರಾಕರಿಸಿ ಕಂಪನಿ ಆಪ್ ತೋರಿಸಿದ ಮಾರ್ಗದಲ್ಲೇ ಹೋಗುವುದಾಗಿ ಪಟ್ಟು ಹಿಡಿದಿದ್ದು, ಇಬ್ಬರ ನಡುವೆ ವಾಗ್ವಾದಕ್ಕೆ ಕಾರಣವಾಯಿತು. ವಿವಾದವು ವಿಕೋಪಕ್ಕೆ ತಿರುಗಿದಾಗ ಚಾಲಕ ಬಾವಧನ್ ಸೇತುವೆಯ ಬಳಿ ವಾಹನವನ್ನು ನಿಲ್ಲಿಸಿ, ಗಮ್ಯಸ್ಥಾನ ತಲುಪುವ ಮುಂಚೆಯೇ ಕೆಳಗೆ ಇಳಿಯುವಂತೆ ಒತ್ತಾಯಿಸಿದ್ದಾನೆ. ಪ್ರಯಾಣವನ್ನು ಅರ್ಧದಲ್ಲೇ ಮೊಟಕುಗೊಳಿಸಿದ್ದಕ್ಕೆ ಪೂಜಾ ಹಣ ನೀಡಲು ನಿರಾಕರಿಸಿದ್ದಾರೆ. ಈ ವೇಳೆ ಚಾಲಕ ವಾಗ್ವಾದದ ವೀಡಿಯೊವನ್ನು ಚಿತ್ರೀಕರಿಸಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುವ ಮೂಲಕ ತಮಗೆ ಮಾನಹಾನಿ ಮಾಡಲು ಯತ್ನಿಸಿದ್ದಾನೆ ಎಂದು ಪೂಜಾ ದೂರು ದಾಖಲಿಸಿದ್ದಾರೆ.

ಘಟನೆಯ ಹಿನ್ನೆಲೆ: ಹಿಂಜೆವಾಡಿಗೆ ತೆರಳುತ್ತಿದ್ದ ಸಾಫ್ಟ್‌ವೇರ್ ಇಂಜಿನಿಯರ್ ಪೂಜಾ ದೀಪಕ್ ಸಾವ್ ಅವರೊಂದಿಗೆ ಮಾರ್ಗದ ವಿಚಾರವಾಗಿ ಚಾಲಕ ವಾಗ್ವಾದ ನಡೆಸಿದ್ದಾನೆ.

ಬಾವಧನ್ ಸೇತುವೆ ಬಳಿ ಅರ್ಧದಲ್ಲೇ ಇಳಿಸಿ, ಹಣಕ್ಕಾಗಿ ಪಟ್ಟು ಹಿಡಿದು ವಿವಾದದ ವೀಡಿಯೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾಗಿದೆ.

ಪೊಲೀಸ್ ಕ್ರಮ: ಬಾವಧನ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಹಿರಿಯ ಪೊಲೀಸ್ ಇನ್ಸ್‌ಪೆಕ್ಟರ್ ಅರವಿಂದ್ ಪವಾರ್ ಅವರು ಎನ್‌ಸಿ ಅಪರಾಧ ದಾಖಲಾಗಿರುವುದನ್ನು ಖಚಿತಪಡಿಸಿದ್ದಾರೆ.

ಈ ಘಟನೆಯು ಆನ್‌ಲೈನ್ ಬೈಕ್-ಟ್ಯಾಕ್ಸಿ ಸೇವೆಗಳಲ್ಲಿ ಪ್ರಯಾಣಿಕರ ಸುರಕ್ಷತೆ, ಮಹಿಳೆಯರ ರಕ್ಷಣೆ ಮತ್ತು ಚಾಲಕರ ಹೊಣೆಗಾರಿಕೆಯ ಬಗ್ಗೆ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.