ಆಸ್ಕರ್ ಕ್ಲೈನ್ ಪದಕ ಪಡೆದ ಮೊದಲ ಭಾರತೀಯ ಭೌತವಿಜ್ಞಾನಿ: ಬೆಂಗಳೂರಿನಲ್ಲಿ ಅಧ್ಯಾಪಕರಾಗಿದ್ದ ಅಶೋಕ್ ಸೇನ್ ಗೆ ಪ್ರತಿಷ್ಠಿತ ಗೌರವ!

ಸ್ಟಾಕ್‌ಹೋಮ್: ಸ್ಟಾಕ್‌ಹೋಮ್ ವಿಶ್ವವಿದ್ಯಾಲಯ ಮತ್ತು ರಾಯಲ್ ಸ್ವೀಡಿಷ್ ಅಕಾಡೆಮಿ ಆಫ್ ಸೈನ್ಸಸ್‌ನ ನೋಬೆಲ್ ಭೌತಶಾಸ್ತ್ರ ಸಮಿತಿಯಿಂದ ನೀಡಲ್ಪಡುವ ಪ್ರತಿಷ್ಠಿತ 2026ರ ಆಸ್ಕರ್ ಕ್ಲೈನ್ ಪದಕಕ್ಕೆ ಭಾರತದ ಖ್ಯಾತ ಸೈದ್ಧಾಂತಿಕ ಭೌತವಿಜ್ಞಾನಿ ಅಶೋಕ್ ಸೇನ್ ಭಾಜನರಾಗಿದ್ದಾರೆ.

ಈ ಗೌರವ ಪಡೆದ ಮೊದಲ ಭಾರತೀಯ ಭೌತವಿಜ್ಞಾನಿ ಎಂಬ ಐತಿಹಾಸಿಕ ಹೆಗ್ಗಳಿಗೆ ಇವರು ಪಾತ್ರರಾಗಿದ್ದಾರೆ. ಈ ಹಿಂದೆ ಸ್ಟೀಫನ್ ಹಾಕಿಂಗ್, ಪೀಟರ್ ಹಿಗ್ಸ್ ಮತ್ತು ಕಿಪ್ ಥೋರ್ನ್ ಮುಂತಾದ ದಿಗ್ಗಜರು ಈ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

ಬೆಂಗಳೂರಿನ ಇಂಟರ್ನ್ಯಾಷನಲ್ ಸೆಂಟರ್ ಫಾರ್ ಥಿಯರೆಟಿಕಲ್ ಸೈನ್ಸಸ್ ನಲ್ಲಿ ಪ್ರಾಧ್ಯಾಪಕರಾಗಿರುವ ಅಶೋಕ್ ಸೇನ್ ಅವರು ಸ್ಟ್ರಿಂಗ್ ಥಿಯರಿ (String Theory) ರಂಗದಲ್ಲಿ ಮಹತ್ವದ ಕೊಡುಗೆಗಳನ್ನು ನೀಡಿದ್ದಾರೆ. ಅಕ್ಟೋಬರ್ 22 ರಂದು ಸ್ವೀಡನ್‌ನ ಸ್ಟಾಕ್‌ಹೋಮ್‌ನಲ್ಲಿರುವ ಅಲ್ಬಾನೋವಾ ಯೂನಿವರ್ಸಿಟಿ ಸೆಂಟರ್‌ನಲ್ಲಿ ಈ ಪದಕವನ್ನು ಸ್ವೀಕರಿಸಿದ ಅವರು, ‘ಗ್ರಾವಿಟಿ ಫ್ರಮ್ ಸ್ಟ್ರಿಂಗ್ಸ್ ಅಂಡ್ ಸ್ಟ್ರಿಂಗ್ಸ್ ಫ್ರಮ್ ಗ್ರಾವಿಟಿ’ ವಿಷಯದ ಕುರಿತು ವಿಶೇಷ ಉಪನ್ಯಾಸ ನೀಡಿದರು. ಕ್ವಾಂಟಮ್ ಭೌತಶಾಸ್ತ್ರದ ಮೂಲಕ ಗುರುತ್ವಾಕರ್ಷಣೆಯನ್ನು ವಿವರಿಸುವ ಹಾಗೂ ಕಪ್ಪು ಕುಳಿಗಳ  ರಹಸ್ಯಗಳನ್ನು ಬಿಡಿಸುವ ನಿಟ್ಟಿನಲ್ಲಿ ಇವರ ಸಂಶೋಧನೆಗಳು ಮಹತ್ವದ್ದಾಗಿವೆ.

ಐತಿಹಾಸಿಕ ಹೆಗ್ಗಳಿಕೆ: ಆಸ್ಕರ್ ಕ್ಲೈನ್ ಪದಕ ಪಡೆದ ಪ್ರಥಮ ಭಾರತೀಯ ಭೌತವಿಜ್ಞಾನಿ ಎಂಬ ಹೆಗ್ಗಳಿಕೆಗೆ ಅಶೋಕ್ ಸೇನ್ ಪಾತ್ರರಾಗಿದ್ದಾರೆ.

ಪ್ರತಿಷ್ಠಿತ ಗೌರವಗಳ ಪಟ್ಟಿ: ಸ್ಟೀಫನ್ ಹಾಕಿಂಗ್, ಪೀಟರ್ ಹಿಗ್ಸ್ ಅವರಂತಹ ಜಾಗತಿಕ ವಿಜ್ಞಾನಿಗಳ ಸಾಲಿಗೆ ಅಶೋಕ್ ಸೇನ್ ಸೇರ್ಪಡೆಗೊಂಡಿದ್ದಾರೆ.

ಸಂಶೋಧನಾ ಸಾಧನೆ: ಸ್ಟ್ರಿಂಗ್ ಥಿಯರಿ ಮತ್ತು ಕಪ್ಪು ಕುಳಿಗಳ ಅಧ್ಯಯನದಲ್ಲಿ ಇವರ ಕೊಡುಗೆ ಅಪಾರವಾಗಿದ್ದು, ಈ ಹಿಂದೆ 2012ರ ಬ್ರೇಕ್‌ಥ್ರೂ ಪ್ರಶಸ್ತಿ ಹಾಗೂ ಪದ್ಮಭೂಷಣ ಪ್ರಶಸ್ತಿಗಳೂ ಲಭಿಸಿವೆ.

ಕೋಲ್ಕತ್ತಾದಲ್ಲಿ ಶಿಕ್ಷಣ ಮುಗಿಸಿ, ಅಮೆರಿಕದಲ್ಲಿ ಪೋಸ್ಟ್ ಡಾಕ್ಟರಲ್ ಸಂಶೋಧನೆ ನಡೆಸಿದ ಬಳಿಕ ಭಾರತದಲ್ಲೇ ನೆಲೆಸಿ ವಿಜ್ಞಾನ ಲೋಕಕ್ಕೆ ಸೇವೆ ಸಲ್ಲಿಸುತ್ತಿರುವ ಅಶೋಕ್ ಸೇನ್ ಅವರ ಈ ಸಾಧನೆ ಭಾರತೀಯ ವಿಜ್ಞಾನ ರಂಗಕ್ಕೆ ಕಿರೀಟಪ್ರಾಯವಾಗಿದೆ.