ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಚಾರಿತ್ರಿಕ ಮೈಲಿಗಲ್ಲು: ಮಾಡರ್ನಾ ಪರ್ಸನಲೈಸ್ಡ್ mRNA ಲಸಿಕೆ ಪ್ರಯೋಗ ಯಶಸ್ವಿ!

ನವದೆಹಲಿ: : ವೈದ್ಯಕೀಯ ಕ್ಷೇತ್ರದಲ್ಲಿ ಮತ್ತು ಕ್ಯಾನ್ಸರ್ ಚಿಕಿತ್ಸಾ ಸಂಶೋಧನೆಯಲ್ಲಿ ಐತಿಹಾಸಿಕ ಮೈಲಿಗಲ್ಲೊಂದು ದಾಖಲಾಗಿದೆ. ಖ್ಯಾತ ಔಷಧ ತಯಾರಿಕಾ ಸಂಸ್ಥೆಗಳಾದ ಮಾಡರ್ನಾ (Moderna) ಮತ್ತು ಮರ್ಕ್ (Merck) ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ‘ಪರ್ಸನಲೈಸ್ಡ್ mRNA ಕ್ಯಾನ್ಸರ್ ಲಸಿಕೆ’ಯು (Intismeran / mRNA-4157) ತನ್ನ ಕೊನೆಯ ಹಾಗೂ ಮೂರನೇ ಹಂತದ ಕ್ಲಿನಿಕಲ್ ಪ್ರಯೋಗದಲ್ಲಿ (Phase 3 Trial) ಯಶಸ್ವಿಯಾಗಿದೆ.

ಈ ಹೊಸ ಲಸಿಕೆಯನ್ನು ಮರ್ಕ್ ಸಂಸ್ಥೆಯ ‘ಕೀಟ್ರುಡಾ’ (Keytruda) ಎಂಬ ಇಮ್ಯುನೋಥೆರಪಿ ಔಷಧಿಯೊಂದಿಗೆ ಸೇರಿಸಿ ಚರ್ಮದ ಕ್ಯಾನ್ಸರ್ (ಮೆಲನೋಮಾ) ಶಸ್ತ್ರಚಿಕಿತ್ಸೆಗೆ ಒಳಗಾದ ರೋಗಿಗಳಿಗೆ ನೀಡಲಾಗಿತ್ತು. ರೋಗಿಯ ದೇಹದಲ್ಲಿ ಶಸ್ತ್ರಚಿಕಿತ್ಸೆಯ ನಂತರ ಮತ್ತೆ ಕ್ಯಾನ್ಸರ್ ಮರುಕಳಿಸುವುದನ್ನು ಮತ್ತು ದೇಹದ ಇತರ ಭಾಗಗಳಿಗೆ ಹರಡುವುದನ್ನು ತಡೆಯುವಲ್ಲಿ ಈ ಲಸಿಕೆ ಅತ್ಯಂತ ಪರಿಣಾಮಕಾರಿಯಾಗಿ ಕೆಲಸ ಮಾಡಿದೆ ಎಂದು ಕಂಪನಿಗಳು ತಿಳಿಸಿವೆ.

ರೋಗ ನಿರೋಧಕ ವ್ಯವಸ್ಥೆಗೆ ವಿಶೇಷ ತರಬೇತಿ:

ಸಾಂಪ್ರದಾಯಿಕ ಲಸಿಕೆಗಳಿಗಿಂತ ವಿಭಿನ್ನವಾಗಿರುವ ಈ ಪರ್ಸನಲೈಸ್ಡ್ mRNA ಲಸಿಕೆಯನ್ನು ಪ್ರತಿಯೊಬ್ಬ ರೋಗಿಯ ಟ್ಯೂಮರ್‌ನ ಜೆನೆಟಿಕ್ ಮ್ಯುಟೇಷನ್‌ಗಳನ್ನು (Genetic Mutations) ವಿಶ್ಲೇಷಿಸಿ, ಪ್ರತ್ಯೇಕವಾಗಿ ಸಿದ್ಧಪಡಿಸಲಾಗುತ್ತದೆ. ಶಸ್ತ್ರಚಿಕಿತ್ಸೆಯ ನಂತರ ಉಳಿದುಕೊಳ್ಳುವ ಕ್ಯಾನ್ಸರ್ ಕೋಶಗಳನ್ನು ಗುರುತಿಸಿ, ಅವುಗಳನ್ನು ನಾಶಪಡಿಸಲು ದೇಹದ ರೋಗನಿರೋಧಕ ಶಕ್ತಿಗೆ ಈ ಲಸಿಕೆ ತರಬೇತಿ ನೀಡುತ್ತದೆ.

ಪ್ರಯೋಗದ ಪ್ರಮುಖ ಮುಖ್ಯಾಂಶಗಳು:

ಕೀಟ್ರುಡಾ ಜೊತೆ ಸಂಯೋಜನೆ: ಶಸ್ತ್ರಚಿಕಿತ್ಸೆಯ ನಂತರ ತೀವ್ರ ಅಪಾಯದಲ್ಲಿರುವ 1,137 ಮೆಲನೋಮಾ ರೋಗಿಗಳಿಗೆ ಮರ್ಕ್ ಕಂಪನಿಯ ಇಮ್ಯುನೊಥೆರಪಿ ಔಷಧ ‘ಕೀಟ್ರುಡಾ’ (Keytruda) ಜೊತೆಗೆ ಈ mRNA ಲಸಿಕೆಯನ್ನು ನೀಡಲಾಯಿತು.

ಶೇಕಡಾ 49ರಷ್ಟು ಅಪಾಯ ಕಡಿತ: ಆರಂಭಿಕ ಹಂತದ ಅಧ್ಯಯನಗಳ ಪ್ರಕಾರ, ಈ ಸಂಯೋಜಿತ ಚಿಕಿತ್ಸೆಯು ಕ್ಯಾನ್ಸರ್ ಮರುಕಳಿಸುವ ಅಥವಾ ಸಾವು ಸಂಭವಿಸುವ ಅಪಾಯವನ್ನು ಶೇ. 49 ರಷ್ಟು ಕಡಿಮೆ ಮಾಡಿದೆ.

ವೈಯಕ್ತಿಕ ಚಿಕಿತ್ಸೆ (Personalised Treatment): ರೋಗಿಯ ಗಡ್ಡೆಯ (Tumor) ಜೆನೆಟಿಕ್ ಮ್ಯುಟೇಷನ್ ವಿಶ್ಲೇಷಿಸಿ, ಅವರ ದೇಹದಲ್ಲಿರುವ ಉಳಿಕೆ ಕ್ಯಾನ್ಸರ್ ಕೋಶಗಳನ್ನು ಗುರುತಿಸಿ ನಾಶಪಡಿಸಲು ಪ್ರತಿ ರೋಗಿಗೂ ಪ್ರತ್ಯೇಕವಾಗಿ ಈ ಲಸಿಕೆ ತಯಾರಿಸಲಾಗುತ್ತದೆ.

ಶೀಘ್ರದಲ್ಲೇ ಮಾರುಕಟ್ಟೆಗೆ ಲಭ್ಯ? ಮಾಡರ್ನಾ ಅಧ್ಯಕ್ಷ ಸ್ಟೀಫನ್ ಹಾಂಗೆ ನೀಡಿರುವ ಮಾಹಿತಿಯಂತೆ, ನಿಯಂತ್ರಕ ಸಂಸ್ಥೆಗಳೊಂದಿಗೆ ಚರ್ಚೆಗಳು ನಡೆಯುತ್ತಿದ್ದು, ‘ಬ್ರೇಕ್‌ಥ್ರೂ ಥೆರಪಿ’ ಮಾನ್ಯತೆ ದೊರೆತಿರುವುದರಿಂದ ಅಗತ್ಯ ಅನುಮೋದನೆಗಳ ನಂತರ ಮುಂದಿನ ವರ್ಷದ ಆರಂಭದಲ್ಲೇ ಈ ಲಸಿಕೆ ಲಭ್ಯವಾಗುವ ಸಾಧ್ಯತೆಯಿದೆ.

ಶ್ವಾಸಕೋಶ, ಮೇದೋಜ್ಜೀರಕ ಗ್ರಂಥಿ (Pancreatic) ಮತ್ತು ಸ್ತನ ಕ್ಯಾನ್ಸರ್‌ಗಳಿಗೂ ಈ ತಂತ್ರಜ್ಞಾನವನ್ನು ಬಳಸಲು ಸಂಶೋಧಕರು ಮುಂದಾಗಿದ್ದಾರೆ.

ಆರಂಭಿಕ ಹಂತದ ದತ್ತಾಂಶಗಳ ಪ್ರಕಾರ, ಕೇವಲ ಕೀಟ್ರುಡಾ ನೀಡುವುದಕ್ಕಿಂತ, ಈ mRNA ಲಸಿಕೆಯೊಂದಿಗೆ ನೀಡಿದಾಗ ಕ್ಯಾನ್ಸರ್ ಮರುಕಳಿಸುವ ಅಥವಾ ರೋಗಿ ಸಾವನ್ನಪ್ಪುವ ಅಪಾಯ ಶೇ. 49 ರಷ್ಟು ಕಡಿಮೆಯಾಗಿದೆ. ಈ ಯಶಸ್ಸಿನ ಬೆನ್ನಲ್ಲೇ ಷೇರು ಮಾರುಕಟ್ಟೆಯಲ್ಲಿ ಮಾಡರ್ನಾ ಕಂಪನಿಯ ಷೇರುಗಳು ತೀವ್ರ ಏರಿಕೆಯನ್ನು ಕಂಡಿವೆ. ನಿಯಂತ್ರಕ ಮಂಡಳಿಗಳ ಅನುಮೋದನೆ ದೊರೆತರೆ, ಈ ಲಸಿಕೆಯು ಶೀಘ್ರದಲ್ಲೇ ಸಾರ್ವಜನಿಕ ಬಳಕೆಗೆ ಲಭ್ಯವಾಗುವ ನಿರೀಕ್ಷೆಯಿದೆ.