“ಅಲ್ಲಿ ದೊಡ್ಡ ತಪ್ಪಾಗಿದೆ”: ಫ್ಲೈದುಬೈ ಕಾಕ್‌ಪಿಟ್ ದಾಳಿ ಮಾಡಿದ ಸಹ-ಪೈಲಟ್‌ನ ಉಗ್ರವಾದಿ ನಂಟು ಪತ್ತೆಯಾಗಿದ್ದರೂ ನೇಮಕ? ಓಮನ್ ಸರಕಾರದ ಸ್ಪೋಟಕ ಮಾಹಿತಿ!

ನವದೆಹಲಿ: ಫ್ಲೈದುಬೈ ವಿಮಾನದಲ್ಲಿ ಭಾರತೀಯ ಮೂಲದ ಮುಖ್ಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್  ಅವರ ಮೇಲೆ ನಡೆಸಲಾದ ಭೀಕರ ಕಾಕ್‌ಪಿಟ್ ದಾಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಓಮನ್ ಸರಕಾರದ ಉನ್ನತ ಮೂಲಗಳು ಹೊಸ ಹಾಗೂ ಆಘಾತಕಾರಿ ವಿವರಗಳನ್ನು ಬಹಿರಂಗಪಡಿಸಿವೆ.

ಓಮನ್ ಸರ್ಕಾರದ ಉನ್ನತ ಅಧಿಕಾರಿಗಳ ಪ್ರಕಾರ, ಹಮಾಮ್ ಅಲ್-ಹಮ್ಮಾಮಿಯನ್ನು ಫ್ಲೈದುಬೈ ಸಂಸ್ಥೆಗೆ ನೇಮಕ ಮಾಡಿಕೊಳ್ಳುವ ಮುನ್ನ ಅಥವಾ ಆತನಿಗೆ ದುಬೈ-ತೆಲ್ ಅವೀವ್ ಸೂಕ್ಷ್ಮ ಮಾರ್ಗದಲ್ಲಿ ಸೇವೆಗೆ ನಿಯೋಜಿಸುವ ಮುನ್ನ ಯಾವುದೇ ಭದ್ರತಾ ಪರಿಶೀಲನೆಗಾಗಿ (Security Verification) ಓಮನ್ ಅಧಿಕಾರಿಗಳನ್ನು ಅಧಿಕೃತವಾಗಿ ಸಂಪರ್ಕಿಸಿರಲಿಲ್ಲ.

“ಒಂದು ವೇಳೆ ಭದ್ರತಾ ಪರಿಶೀಲನೆಗಾಗಿ ನಮ್ಮನ್ನು ಸಂಪರ್ಕಿಸಿದ್ದರೆ, ಆತನ ಹಿನ್ನೆಲೆ ಹಾಗೂ ನಾವು ಹೊಂದಿದ್ದ ಎಲ್ಲಾ ತನಿಖಾ ಮಾಹಿತಿಯನ್ನು ಹಂಚಿಕೊಳ್ಳುತ್ತಿದ್ದೆವು. ಆದರೆ ಎಲ್ಲಿಯೋ ಬೃಹತ್ ಪ್ರಮಾಣದ ಲೋಪ ಅಥವಾ ನಿರ್ಲಕ್ಷ್ಯ ಸಂಭವಿಸಿದೆ” ಎಂದು ಓಮನ್ ಸರಕಾರದ ಮೂಲಗಳು ತಿಳಿಸಿವೆ.

ಸಹ-ಪೈಲಟ್‌ನ ಸಂಶಯಾಸ್ಪದ ಹಿನ್ನೆಲೆ

ಸಿರಿಯಾ ನಂಟು: ಓಮನ್ ಪ್ರಜೆಯಾಗಿದ್ದರೂ ಹಮಾಮ್ ಅಲ್-ಹಮ್ಮಾಮಿ ತನ್ನ ಜೀವನದ ಬಹುಭಾಗವನ್ನು ಓಮನ್‌ನಿಂದ ಹೊರಗೆ (ಯುಎಇ ಮತ್ತು ಸಿರಿಯಾ ಸೇರಿದಂತೆ) ಕಳೆದಿದ್ದನು. ಸಿರಿಯಾದಲ್ಲಿ ನೆಲೆಸಿದ್ದ ಅವಧಿಯಲ್ಲೇ ಈತ ತೀವ್ರವಾದಿ ಚಿಂತನೆಗಳಿಗೆ ಒಳಗಾಗಿದ್ದನೆಂದು ಶಂಕಿಸಲಾಗಿದೆ.

ದ್ವಿಪೌರತ್ವದ ಶಂಕೆ: ಇಸ್ರೇಲ್ ಮತ್ತು ಯುಎಇ ನಡುವಿನ ವಿಮಾನಯಾನ ನಿಯಮಗಳ ಪ್ರಕಾರ, ರಾಜತಾಂತ್ರಿಕ ಸಂಬಂಧ ಹೊಂದಿರುವ ದೇಶಗಳ ಪೈಲಟ್‌ಗಳು ಮಾತ್ರ ಆ ಮಾರ್ಗದಲ್ಲಿ ಸೇವೆ ಸಲ್ಲಿಸಬಹುದು. ಓಮನ್ ಇಸ್ರೇಲ್ ಜೊತೆ ರಾಜತಾಂತ್ರಿಕ ಸಂಬಂಧ ಹೊಂದಿಲ್ಲದ ಕಾರಣ, ಹಮಾಮ್ ಮತ್ತೊಂದು ದೇಶದ ಪೌರತ್ವವನ್ನೂ ಹೊಂದಿರಬಹುದು ಎಂದು ಶಂಕಿಸಲಾಗಿದೆ.

ದುಬೈನಿಂದ ತೆಲ್ ಅವೀವ್‌ಗೆ ಪ್ರಯಾಣಿಸುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ಸಹ-ಪೈಲಟ್ ಹಮಾಮ್, ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಮೇಲೆ ಕಾಕ್‌ಪಿಟ್ ಒಳಗಿದ್ದ ಕೊಡಲಿಯಿಂದ ಭೀಕರವಾಗಿ ದಾಳಿ ನಡೆಸಿದ್ದನು. ದಾಳಿಯಿಂದ ತೀವ್ರ ಗಾಯಗೊಂಡಿದ್ದರೂ ಧೈರ್ಯಗುಂದದ ಕ್ಯಾಪ್ಟನ್ ಸ್ಮಿತ್, ಕಾಕ್‌ಪಿಟ್ ಬಾಗಿಲನ್ನು ತೆರೆಯುವಲ್ಲಿ ಯಶಸ್ವಿಯಾದರು. ತಕ್ಷಣವೇ ಮಧ್ಯಪ್ರವೇಶಿಸಿದ ಪ್ರಯಾಣಿಕರು ಮತ್ತು ಇತರೆ ಸಿಬ್ಬಂದಿ ಸಹ-ಪೈಲಟ್‌ನನ್ನು ಬಂಧಿಸಿ, ವಿಮಾನವನ್ನು ಸೌದಿ ಅರೇಬಿಯಾದ ತಬುಕ್‌ನಲ್ಲಿ ತುರ್ತು ಭೂಸ್ಪರ್ಶ ಮಾಡಿಸಿದರು.

ಪ್ರಸ್ತುತ ಈ ಘಟನೆಯನ್ನು ಯುಎಇ ಮತ್ತು ಇಸ್ರೇಲ್ ತನಿಖಾ ಸಂಸ್ಥೆಗಳು “ಭಯೋತ್ಪಾದನಾ ಕೃತ್ಯದ ಯತ್ನ” ಎಂದು ಪರಿಗಣಿಸಿ ತನಿಖೆ ನಡೆಸುತ್ತಿವೆ.