ಕೆಲಸದ ಆಮಿಷ ಒಡ್ಡಿ ರಾಜಸ್ಥಾನಕ್ಕೆ 3 ಲಕ್ಷಕ್ಕೆ ಮಾರಾಟವಾಗಿದ್ದ ಯುವತಿ ರಕ್ಷಿಸಿದ ಪೊಲೀಸರು!

ರಾಂಚಿ: ಕೆಲಸ ಕೊಡಿಸುವುದಾಗಿ ನಂಬಿಸಿ ದೆಹಲಿಗೆ ಕರೆದೊಯ್ದು, ಬಳಿಕ ರಾಜಸ್ಥಾನದ ಬಾರ್ಮರ್‌ನಲ್ಲಿ ಬರೋಬ್ಬರಿ 3 ಲಕ್ಷ ರೂಪಾಯಿಗೆ ಮಾರಾಟ ಮಾಡಲಾಗಿದ್ದ 22 ವರ್ಷದ ಯುವತಿಯನ್ನು ಜಾರ್ಖಂಡ್‌ನ ಸಿಮ್ದೇಗಾ ಪೊಲೀಸರು ಯಶಸ್ವಿಯಾಗಿ ರಕ್ಷಿಸಿದ್ದಾರೆ.

ಘಟನೆಯ ಹಿನ್ನೆಲೆ:

2023ರಲ್ಲಿ ಸಿಮ್ದೇಗಾ ಜಿಲ್ಲೆಯ ಕುರ್ದೇಗ್ ಪೊಲೀಸ್ ಠಾಣಾ ವ್ಯಾಪ್ತಿಯ ಹಳ್ಳಿಯೊಂದರ ಯುವತಿಗೆ ನೆರೆಹಳ್ಳಿಯ ವ್ಯಕ್ತಿಯೊಬ್ಬ ಕೆಲಸದ ಆಮಿಷ ಒಡ್ಡಿದ್ದ. ಆಕೆಯನ್ನು ದೆಹಲಿಗೆ ಕರೆದೊಯ್ದು ಪ್ಲೇಸ್‌ಮೆಂಟ್ ಏಜೆನ್ಸಿ ಮೂಲಕ ಮನೆಗೆಲಸಕ್ಕೆ ಸೇರಿಸಲಾಗಿತ್ತು. ಆದರೆ, ಅಲ್ಲಿಂದ ತಪ್ಪಿಸಿಕೊಂಡು ದೆಹಲಿಯ ಆನಂದ್ ವಿಹಾರ್ ಬಸ್ ನಿಲ್ದಾಣದಲ್ಲಿ ಅಲೆಯುತ್ತಿದ್ದಾಗ ಮೀರತ್‌ನ ದಂಪತಿಗಳು ಈಕೆಯನ್ನು ಪುಸಲಾಯಿಸಿ ತಮ್ಮೊಂದಿಗೆ ಕರೆದೊಯ್ದಿದ್ದರು. ಆ ದಂಪತಿಗಳು ನಂತರ ಭಾರತ-ಪಾಕಿಸ್ತಾನ ಗಡಿಯ ಸಮೀಪವಿರುವ ರಾಜಸ್ಥಾನದ ಬಾರ್ಮರ್‌ನ ಕುಟುಂಬವೊಂದಕ್ಕೆ ಈಕೆಯನ್ನು 3 ಲಕ್ಷ ರೂಪಾಯಿಗೆ ಮಾರಾಟ ಮಾಡಿದ್ದರು.

ಅಮಾನವೀಯ ಕಿರುಕುಳ:

ಬಂಧನದಲ್ಲಿದ್ದ ಯುವತಿಯ ಮೇಲೆ ಆ ಕುಟುಂಬದವರು ನಿರಂತರವಾಗಿ ದೈಹಿಕ ಮತ್ತು ಮಾನಸಿಕ ಕಿರುಕುಳ ನೀಡುತ್ತಿದ್ದರು ಎನ್ನಲಾಗಿದೆ. ಇದೇ ಅವಧಿಯಲ್ಲಿ ಆಕೆ ಮಗುವಿಗೂ ಜನ್ಮ ನೀಡಿದ್ದಾಳೆ. ಇತ್ತೀಚೆಗೆ ಯುವತಿ ಹೇಗೋ ಮಾಡಿ ತನ್ನ ತಾಯಿಯನ್ನು ಸಂಪರ್ಕಿಸಿ ತನಗಾಗುತ್ತಿರುವ ಅನ್ಯಾಯ ಮತ್ತು ಇರುವ ಜಾಗದ ಬಗ್ಗೆ ಮಾಹಿತಿ ನೀಡಿದ್ದಾಳೆ.

ಪೊಲೀಸ್ ಕಾರ್ಯಾಚರಣೆ:

ಯುವತಿಯ ಪೋಷಕರು ಮೇ 20 ರಂದು ಸಿಮ್ದೇಗಾದ ಮಾನವ ಕಳ್ಳಸಾಗಣೆ ತಡೆ ಘಟಕದಲ್ಲಿ (AHTU) ದೂರು ದಾಖಲಿಸಿದ್ದರು. ಡಿಎಸ್‌ಪಿ ರಣವೀರ್ ಸಿಂಗ್ ನೇತೃತ್ವದಲ್ಲಿ ತಕ್ಷಣವೇ ವಿಶೇಷ ಪೊಲೀಸ್ ತಂಡವನ್ನು ರಚಿಸಲಾಯಿತು. ರಾಜಸ್ಥಾನದ ಬಾರ್ಮರ್‌ಗೆ ಧಾವಿಸಿದ ಜಾರ್ಖಂಡ್ ಪೊಲೀಸರು ಸ್ಥಳೀಯ ಪೊಲೀಸರ ನೆರವಿನೊಂದಿಗೆ ಯುವತಿಯನ್ನು ಸುರಕ್ಷಿತವಾಗಿ ರಕ್ಷಿಸಿ ಸ್ವಗ್ರಾಮಕ್ಕೆ ಕರೆತಂದಿದ್ದಾರೆ.