10 ಲಕ್ಷ ಜನ ಬರ್ತಾರೆ ಅಂದಿದ್ರು, ಮೈದಾನ ಖಾಲಿ ಇತ್ತು: ಇಂಡಿಯಾ ಒಕ್ಕೂಟದ ರ್ಯಾಲಿ ‘ಸೂಪರ್ ಫ್ಲಾಪ್’- ಕಾಂಗ್ರೆಸ್ ವಿರುದ್ಧ ಬಿಜೆಪಿ ವಾಗ್ದಾಳಿ!

ನವದೆಹಲಿ: ದೆಹಲಿಯ ರಾಮಲೀಲಾ ಮೈದಾನದಲ್ಲಿ ನಡೆದ ‘ಇಂಡಿಯಾ’ ಮೈತ್ರಿಕೂಟದ ಪ್ರತಿಭಟನಾ ಸಮಾವೇಶವು ಸಂಪೂರ್ಣ ವಿಫಲವಾಗಿದ್ದು, ಇದು ಕೇವಲ ‘ಸೂಪರ್ ಫ್ಲಾಪ್’ ರ್ಯಾಲಿ ಎಂದು ಬಿಜೆಪಿ ಸಂಸತ್ ಸದಸ್ಯ ಸಂಬಿತ್ ಪಾತ್ರಾ ವ್ಯಂಗ್ಯವಾಡಿದ್ದಾರೆ. ಕಾಂಗ್ರೆಸ್ ನಾಯಕರು ಹೇಳಿಕೊಂಡಂತೆ ರ್ಯಾಲಿಯಲ್ಲಿ 10 ಲಕ್ಷ ಜನ ಸೇರಿಲ್ಲ, ಬದಲಿಗೆ ಮೈದಾನದ ಬಹುಪಾಲು ಭಾಗ ಖಾಲಿ ಉಳಿದಿತ್ತು ಎಂದು ಅವರು ವೀಡಿಯೊ ತುಣುಕುಗಳನ್ನು ಬಿಡುಗಡೆ ಮಾಡಿ ಟೀಕಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಂಬಿತ್ ಪಾತ್ರಾ, ಕಾಂಗ್ರೆಸ್ ನಾಯಕರು ಒಟ್ಟು 10 ಲಕ್ಷ ಜನರು ಭಾಗವಹಿಸಲಿದ್ದಾರೆ ಎಂದು ಬಿಂಬಿಸಿ ಸುಳ್ಳು ಅಂಕಿಅಂಶಗಳನ್ನು ನೀಡಿದ್ದರು ಎಂದು ಆರೋಪಿಸಿದರು. ರಾಮಲೀಲಾ ಮೈದಾನವು ಸುಮಾರು 10 ರಿಂದ 12 ಎಕರೆ ವಿಸ್ತೀರ್ಣ ಹೊಂದಿದ್ದು, ಅಲ್ಲಿ ಹಾಕಲಾಗಿದ್ದ ಸಾವಿರಾರು ಕುರ್ಚಿಗಳು ಖಾಲಿಯಾಗಿದ್ದವು. ದೊಡ್ಡ ಮಟ್ಟದಲ್ಲಿ ವಿಪಕ್ಷಗಳು ಒಗ್ಗೂಡಿದರೂ ನಿರೀಕ್ಷಿತ ಜನಸಾಗರ ಸೇರಲು ವಿಫಲವಾಗಿವೆ ಎಂದು ಅವರು ಲೇವಡಿ ಮಾಡಿದರು. ಪ್ರಧಾನಿ ಹುದ್ದೆಗೆ ಕೇವಲ ಭಾಷಣ ಸಾಲದು, ಅದಕ್ಕೆ ಬೆವರು ಹರಿಸಿ ಕಠಿಣ ಪರಿಶ್ರಮ (ಮೆಹನತ್ ಮತ್ತು ಪಸೀನಾ) ಪಡಬೇಕು ಎಂದು ರಾಹುಲ್ ಗಾಂಧಿ ವಿರುದ್ಧ ವಾಗ್ದಾಳಿ ನಡೆಸಿದರು.

ಜನಸಂಖ್ಯೆಯ ಬಗ್ಗೆ ವಿವಾದ: ಕಾಂಗ್ರೆಸ್ ನಾಯಕರು 10 ಲಕ್ಷ ಜನರ ಸಮಾವೇಶ ಎಂದು ಹೇಳಿಕೊಂಡಿದ್ದರೂ, ವಾಸ್ತವದಲ್ಲಿ ಮೈದಾನದ ಶೇಕಡಾ 40ರಷ್ಟು ಭಾಗ ಖಾಲಿಯಾಗಿತ್ತು ಮತ್ತು ಟ್ರಿಕ್ ಫೋಟೋಗ್ರಫಿ ಬಳಸಲಾಗಿದೆ ಎಂದು ಬಿಜೆಪಿ ಆರೋಪಿಸಿದೆ.

ರಾಹುಲ್ ಗಾಂಧಿ ಎಚ್ಚರಿಕೆ: ರ್ಯಾಲಿಯಲ್ಲಿ ಮಾತನಾಡಿದ ರಾಹುಲ್ ಗಾಂಧಿ, ಮತ ಕಳವು (‘ವೋಟ್ ಚೋರಿ’) ಆರೋಪಕ್ಕೆ ಸಂಬಂಧಿಸಿದಂತೆ ಪ್ರಧಾನಿ ನರೇಂದ್ರ ಮೋದಿ, ಅಮಿತ್ ಶಾ ಮತ್ತು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ವಿರುದ್ಧ ಕಾನೂನು ಕ್ರಮ ಜರುಗಿಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

ಕಾಂಗ್ರೆಸ್ ಸಮರ್ಥನೆ: ಬಿಜೆಪಿ ನಾಯಕರ ಆರೋಪವನ್ನು ತಳ್ಳಿಹಾಕಿರುವ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್, ರ್ಯಾಲಿಯಲ್ಲಿ ಸೇರಿರುವ ಜನಸ್ತೋಮವೇ ಮೋದಿ ಸರ್ಕಾರದ ದಬ್ಬಾಳಿಕೆಗೆ ತಕ್ಕ ಉತ್ತರ ಎಂದು ಸಮರ್ಥಿಸಿಕೊಂಡಿದ್ದಾರೆ.

ಮತದಾರರ ಪಟ್ಟಿಯಿಂದ 13.5 ಕೋಟಿ ಮತದಾರರನ್ನು ಅಳಿಸಿಹಾಕಲಾಗಿದೆ ಎಂದು ಕಾಂಗ್ರೆಸ್ ನಾಯಕರು ಮಾಡಿರುವ ಆರೋಪಗಳು ಆಧಾರರಹಿತ ಎಂದು ಬಿಜೆಪಿ ತಿರುಗೇಟು ನೀಡಿದ್ದು, ದೇಶದ ಪ್ರಮುಖ ವಿಪಕ್ಷಗಳ ಈ ಸಮಾವೇಶವು ರಾಜಕೀಯವಾಗಿ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಅಭಿಪ್ರಾಯಪಟ್ಟಿದೆ.