ದಿವ್ಯಾ ಮಿತ್ತಲ್ ರಾಜಕೀಯ ಎಂಟ್ರಿ: 13 ವರ್ಷಗಳ ಐಎಎಸ್ ಹುದ್ದೆಗೆ ರಾಜೀನಾಮೆ ನೀಡಿದ್ದ ಖಡಕ್ ಅಧಿಕಾರಿ ಯಾವುದೇ ಪಕ್ಷ ಸೇರದಿರಲು ನಿರ್ಧಾರ!

ಲಕ್ನೋ: ಉತ್ತರ ಪ್ರದೇಶ ಕೆಡರ್‌ನ 2013ರ ಬ್ಯಾಚ್‌ನ ಪ್ರಸಿದ್ಧ ಐಎಎಸ್ ಅಧಿಕಾರಿಯಾಗಿದ್ದ ದಿವ್ಯಾ ಮಿತ್ತಲ್ ಅವರು ಸಿವಿಲ್ ಸೇವೆಯಿಂದ ರಾಜೀನಾಮೆ ನೀಡಿದ ಕೆಲವೇ ದಿನಗಳಲ್ಲಿ ತಮ್ಮ ರಾಜಕೀಯ ಪ್ರವೇಶವನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ. ಆದರೆ, ಅವರು ಯಾವುದೇ ಪ್ರಮುಖ ರಾಜಕೀಯ ಪಕ್ಷಕ್ಕೆ ಸೇರ್ಪಡೆಯಾಗದೆ ಸ್ವತಂತ್ರವಾಗಿ ಜನರಿಗಾಗಿ ಕೆಲಸ ಮಾಡುವುದಾಗಿ ಸ್ಪಷ್ಟಪಡಿಸಿದ್ದಾರೆ.

ಏನ್ ಹೇಳಿದ್ದಾರೆ ದಿವ್ಯಾ ಮಿತ್ತಲ್? 

कुछ दिन पहले IAS से त्यागपत्र दिया था और आपके मन में कई सवाल छोड़ दिए थे। अपनी बात इस वीडियो में कह दी है। अगर आपको लगे कि ये आपकी भी बात है, तो 9198956957 पर whatsapp मैसेज करिए। pic.twitter.com/mtS6gzBzRw

— Divya Mittal (@divyamittal_IAS) September 29, 2026

ಕಾಯಂ ಸೇವೆಯಿಂದ ರಾಜಕೀಯ ಪಯಣದವರೆಗೆ:

ಐಐಟಿ ದೆಹಲಿ ಮತ್ತು ಐಐಎಂ ಬೆಂಗಳೂರಿನಲ್ಲಿ ಶಿಕ್ಷಣ ಮುಗಿಸಿ, ಲಂಡನ್‌ನಲ್ಲಿ ಉದ್ಯೋಗದಲ್ಲಿದ್ದ ದಿವ್ಯಾ ಮಿತ್ತಲ್, ದೇಶಸೇವೆಗಾಗಿ ಐಎಎಸ್ ಹುದ್ದೆಗೆ ಸೇರಿದ್ದರು. ಮಿರ್ಜಾಪುರ ಮತ್ತು ದೇವೋರಿಯಾ ಜಿಲ್ಲೆಗಳಲ್ಲಿ ಜಿಲ್ಲಾಧಿಕಾರಿಯಾಗಿ (DM) ಸೇವೆ ಸಲ್ಲಿಸಿದ್ದ ಅವರು, ಮಿರ್ಜಾಪುರದ ಕುಗ್ರಾಮಗಳಿಗೆ ಕುಡಿಯುವ ನೀರು ಪೂರೈಸಿದ ಕಾರ್ಯಕ್ಕಾಗಿ ಖ್ಯಾತಿ ಗಳಿಸಿದ್ದರು. ಸುಮಾರು 13 ವರ್ಷಗಳ ಸೇವೆಗೆ ಆಗಸ್ಟ್‌ನಲ್ಲಿ ರಾಜೀನಾಮೆ ಸಲ್ಲಿಸಿದ್ದು, ಸೆಪ್ಟೆಂಬರ್‌ನಲ್ಲಿ ಸರ್ಕಾರ ಅವರ ರಾಜೀನಾಮೆಯನ್ನು ಅಂಗೀಕರಿಸಿತ್ತು.

ರಾಜಕೀಯ ಪ್ರವೇಶದ ಕುರಿತು ದಿವ್ಯಾ ಮಿತ್ತಲ್ ನೀಡಿದ ಹೇಳಿಕೆ:

ಮಂಗಳವಾರ ಹಂಚಿಕೊಂಡ ವಿಡಿಯೋ ಸಂದೇಶದಲ್ಲಿ ಅವರು, “ಉತ್ತರ ಪ್ರದೇಶ ನನ್ನ ಕರ್ಮಭೂಮಿ. ನನ್ನ ರಾಜಕೀಯ ಪ್ರಯಾಣ ಇಲ್ಲಿಂದಲೇ ಪ್ರಾರಂಭವಾಗುತ್ತದೆ. ನಾನು ಯಾವುದೇ ರಾಜಕೀಯ ಪಕ್ಷದೊಂದಿಗೆ ಗುರುತಿಸಿಕೊಳ್ಳುವುದಿಲ್ಲ; ಬದಲಿಗೆ ಸಾರ್ವಜನಿಕರೊಂದಿಗೆ ನೇರವಾಗಿ ರಾಜಕೀಯ ಮಾಡುತ್ತೇನೆ” ಎಂದು ಘೋಷಿಸಿದ್ದಾರೆ.

ಅಲ್ಲದೆ, ದೇಶದ ಸ್ವಾತಂತ್ರ್ಯಕ್ಕೆ 80 ವರ್ಷಗಳಾಗುತ್ತಿದ್ದರೂ ಇಂದಿಗೂ ಸಣ್ಣಪುಟ್ಟ ಮೂಲಸೌಕರ್ಯ, ಶಾಲೆ, ರಸ್ತೆ ಹಾಗೂ ಉದ್ಯೋಗಕ್ಕಾಗಿ ಜನರು ಅನುಭವಿಸುತ್ತಿರುವ ಕಷ್ಟಗಳನ್ನು ಪ್ರಸ್ತಾಪಿಸಿದ ಅವರು, ರಾಜಕೀಯದಲ್ಲಿ ಪಾರದರ್ಶಕತೆ ಮತ್ತು ಹೊಣೆಗಾರಿಕೆ ತರುವುದು ತಮ್ಮ ಮುಖ್ಯ ಉದ್ದೇಶ ಎಂದಿದ್ದಾರೆ. ಮುಂಬರುವ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಗಳ ಹೊತ್ತಿನಲ್ಲಿ ಅವರ ಈ ನಡೆ ಗಮನಸೆಳೆದಿದೆ.