ಆರ್ಯರ ಶ್ರೀರಾಮ ಶ್ರೀಮಂತ, ದ್ರಾವಿಡರ ಶಿವ ಬಡವ, “ನಾವು ಶಿವನ ಭಕ್ತರಾದರೆ ಅವ್ರು ರಾಮನ ಭಕ್ತರು”: ಉತ್ತರ-ದಕ್ಷಿಣ ವಿಭಾಗದ ಕಿಡಿ ಹೊತ್ತಿಸಿದ ಸಿಎಂ ರೇವಂತ್ ರೆಡ್ಡಿ!

ನವದೆಹಲಿ: ಆರ್ಯರ ಶ್ರೀರಾಮ ಶ್ರೀಮಂತ, ದ್ರಾವಿಡರ ಶಿವ ಬಡವ ಎಂದು ತೆಲಂಗಾಣ ಸಿಎಂ ರೇವಂತ್ ರೆಡ್ಡಿ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. ಈ ಹೇಳಿಕೆಗೆ ಬಿಜೆಪಿ ಆಕ್ರೋಶ ವ್ಯಕ್ತಪಡಿಸಿದೆ. 

ನವದೆಹಲಿಯಲ್ಲಿ ನಡೆದ ಮಾಧ್ಯಮ ಕಾರ್ಯಕ್ರಮವೊಂದರಲ್ಲಿ ತೆಲಂಗಾಣ ಮುಖ್ಯಮಂತ್ರಿ ರೇವಂತ್ ರೆಡ್ಡಿ ಅವರು ನೀಡಿದ ಹೇಳಿಕೆಯು ಈಗ ದೇಶಾದ್ಯಂತ ಭಾರಿ ರಾಜಕೀಯ ಚರ್ಚೆಗೆ ಮತ್ತು ವಿವಾದಕ್ಕೆ ಕಾರಣವಾಗಿದೆ.

ರೇವಂತ್ ರೆಡ್ಡಿ ಅವರ ವಿವಾದಾತ್ಮಕ ಹೇಳಿಕೆ:

ಉತ್ತರ ಹಾಗೂ ದಕ್ಷಿಣ ಭಾರತದ ಧಾರ್ಮಿಕ ಮತ್ತು ರಾಜಕೀಯ ಗುರುತುಗಳನ್ನು ಹೋಲಿಕೆ ಮಾಡುತ್ತಾ ಮಾತನಾಡಿದ ರೇವಂತ್ ರೆಡ್ಡಿ, “ನಾವು ದ್ರಾವಿಡರು, ಅವರು ಆರ್ಯರು. ನಾವು ಭಗವಾನ್ ಶಿವನ ಭಕ್ತರು, ಆದರೆ ಅವರು ಶ್ರೀರಾಮನ ಭಕ್ತರು” ಎಂದಿದ್ದಾರೆ.

ಮುಂದುವರಿದು, “ಶಿವನು ಬಡವರ ದೇವರು, ಶ್ರೀರಾಮನು ಶ್ರೀಮಂತರ ದೇವರು” ಎಂದು ಬಣ್ಣಿಸಿದ ಅವರು, ಬಿಜೆಪಿ ನಾಯಕರು ‘ಜೈ ಶ್ರೀರಾಮ್’ ಎಂದು ಘೋಷಣೆ ಕೂಗುವಂತೆ ‘ಹರ್ ಹರ್ ಮಹಾದೇವ್’ ಎಂದು ಏಕೆ ಕೂಗುವುದಿಲ್ಲ ಎಂದು ಪ್ರಶ್ನಿಸಿದ್ದಾರೆ.

ಇದರೊಂದಿಗೆ ಲೋಕಸಭಾ ಕ್ಷೇತ್ರಗಳ ಮರುವಿಂಗಡಣೆ ಪ್ರಕ್ರಿಯೆಯಿಂದ ದಕ್ಷಿಣ ಭಾರತದ ರಾಜ್ಯಗಳಿಗೆ ರಾಜಕೀಯವಾಗಿ ಅನ್ಯಾಯವಾಗಲಿದೆ ಎಂಬ ಆತಂಕವನ್ನೂ ವ್ಯಕ್ತಪಡಿಸಿದರು.

ಬಿಜೆಪಿ ಮತ್ತು ಬಂಡಿ ಸಂಜಯ್ ತಿರುಗೇಟು:

ಈ ಹೇಳಿಕೆಗೆ ಕೇಂದ್ರ ಸಚಿವ ಹಾಗೂ ಬಿಜೆಪಿ ನಾಯಕ ಬಂಡಿ ಸಂಜಯ್ ಕುಮಾರ್ ಕಠಿಣವಾಗಿ ಪ್ರತಿಕ್ರಿಯಿಸಿದ್ದಾರೆ. “ಅಂದು ‘ಮುಸ್ಲಿಮರೇ ಕಾಂಗ್ರೆಸ್, ಕಾಂಗ್ರೆಸ್ಸಿಗರೇ ಮುಸ್ಲಿಮರು’ ಎಂದಿದ್ದ ರೇವಂತ್ ರೆಡ್ಡಿ, ಇಂದು ಶ್ರೀರಾಮ ಮತ್ತು ಶಿವನ ನಡುವೆ ರಾಜಕೀಯ ರೇಖೆಗಳನ್ನು ಎಳೆಯುತ್ತಿದ್ದಾರೆ” ಎಂದು ಕಿಡಿಕಾರಿದ್ದಾರೆ.

ತೆಲಂಗಾಣದಲ್ಲಿ ಶಿವನ ಕ್ಷೇತ್ರವಾದ ‘ವೇಮುಲವಾಡ’ (ದಕ್ಷಿಣ ಕಾಶಿ) ಮತ್ತು ರಾಮನ ಕ್ಷೇತ್ರವಾದ ‘ಭದ್ರಾಚಲಂ’ (ದಕ್ಷಿಣ ಅಯೋಧ್ಯೆ) ಎರಡೂ ಇವೆ ಎಂಬುದನ್ನು ಸಿಎಂ ನೆನಪಿಟ್ಟುಕೊಳ್ಳಬೇಕು ಎಂದಿರುವ ಬಂಡಿ ಸಂಜಯ್, ಪ್ರಧಾನಿ ಮೋದಿಯವರು ಕಾಶಿ ವಿಶ್ವನಾಥ ದೇವಾಲಯದ ಅಭಿವೃದ್ಧಿ ಹಾಗೂ ವೇಮುಲವಾಡ ಭೇಟಿಯನ್ನು ಉಲ್ಲೇಖಿಸಿ ಕಾಂಗ್ರೆಸ್‌ನ ಧರ್ಮ ಆಧಾರಿತ ರಾಜಕೀಯವನ್ನು ಖಂಡಿಸಿದ್ದಾರೆ.