ಒಂದೊಂದಾಗಿ ಉರುಳಿದ ಉಗ್ರರ ತಲೆಗಳು! ‘ಆಪರೇಷನ್ ಕೊರಾಗ್’ ಮೂಲಕ ಕೊನೆಯ ಉಗ್ರನನ್ನೂ ಹೊಡೆದುರುಳಿಸಿದ ಭಾರತೀಯ ಸೇನೆ

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ ಉಗ್ರರ ದಾಳಿಯ ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದ ಫೋಟೋದಲ್ಲಿದ್ದ ನಾಲ್ವರೂ ಲಷ್ಕರ್-ಎ-ತೊಯ್ಬಾ (LeT) ಉಗ್ರರನ್ನು ಭಾರತೀಯ ಭದ್ರತಾ ಪಡೆಗಳು ಸತತ ಕಾರ್ಯಾಚರಣೆಗಳ ಮೂಲಕ ಹತ್ಯೆಗೈದಿವೆ. ಬಡ್ಗಾಂ ಜಿಲ್ಲೆಯ ಪಲ್ಮೈದಾನ್ ಪ್ರದೇಶದಲ್ಲಿ ನಡೆದ ‘ಆಪರೇಷನ್ ಕೊರಾಗ್’ ಎನ್‌ಕೌಂಟರ್‌ನಲ್ಲಿ ಉಗ್ರ ಸಂಘಟನೆಯ ಪ್ರಮುಖ ಕಮಾಂಡರ್ ಹಾಶಿಮ್ ಮೂಸಾ ಅಲಿಯಾಸ್ ಫೌಜಿಯನ್ನು ಹೊಡೆದುರುಳಿಸುವುದರೊಂದಿಗೆ ಈ ಕಾರ್ಯಾಚರಣೆ ಪೂರ್ಣಗೊಂಡಿದೆ.

ಪಾಕಿಸ್ತಾನದ ಸ್ಪೆಷಲ್ ಸರ್ವಿಸ್ ಗ್ರೂಪ್ (SSG)ನ ಮಾಜಿ ಪ್ಯಾರಾ ಕಮಾಂಡೋ ಆಗಿದ್ದ ಹಾಶಿಮ್ ಮೂಸಾ, ಕಾಶ್ಮೀರ ಕಣಿವೆಯಲ್ಲಿ ನಡೆದ ಹಲವು ಭಯೋತ್ಪಾದಕ ಕೃತ್ಯಗಳ ರೂವಾರಿಯಾಗಿದ್ದ. ಈತನ ಸುಳಿವು ನೀಡಿದವರಿಗೆ ಜಮ್ಮು-ಕಾಶ್ಮೀರ ಪೊಲೀಸರು 20 ಲಕ್ಷ ರೂಪಾಯಿ ಬಹುಮಾನ ಘೋಷಿಸಿದ್ದರು.

ಸೇನೆಯು ನಡೆಸಿದ ಹಂತ-ಹಂತದ ಶೋಧ ಕಾರ್ಯಾಚರಣೆಯ ವಿವರ:

ಜುನೇದ್ ಅಹಮದ್ ಭಟ್ (ಆಪರೇಷನ್ ದಾಚಿಗಾಮ್): 2024 ಡಿಸೆಂಬರ್ 3 ರಂದು ದಾಚಿಗಾಮ್ ಅರಣ್ಯ ಪ್ರದೇಶದಲ್ಲಿ ಹತನಾದ. ಈತನ ಮೊಬೈಲ್‌ನಿಂದಲೇ ವೈರಲ್ ಆಗಿದ್ದ ನಾಲ್ವರು ಉಗ್ರರ ಫೋಟೋ ಲಭ್ಯವಾಗಿತ್ತು.

ಸುಲೇಮಾನ್ ಶಾ ಅಲಿಯಾಸ್ ಫೈಸಲ್ ಜಟ್ (ಆಪರೇಷನ್ ಮಹಾದೇವ್): 2025 ಜುಲೈ 28 ರಂದು ಅತ್ಯಾಧುನಿಕ ಡ್ರೋನ್ ಹಾಗೂ ಸರ್ವೇಲನ್ಸ್ ತಂತ್ರಜ್ಞಾನ ಬಳಸಿ ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ ಈತನನ್ನು ಹತ್ಯೆ ಮಾಡಲಾಯಿತು.

ಅಬು ತಲ್ಹಾ ಅಲಿಯಾಸ್ ಯಾಸಿರ್ (ಆಪರೇಷನ್ ಆಶ್‌ದಾರ್): 2026 ಸೆಪ್ಟೆಂಬರ್ 6 ರಂದು ಬುಡ್ಗಾಂನ ಯುಸ್ಮಾರ್ಗ್ ಪ್ರದೇಶದಲ್ಲಿ ನಡೆದ ಎನ್‌ಕೌಂಟರ್‌ನಲ್ಲಿ ಈತನನ್ನು ಹೊಡೆದುರುಳಿಸಲಾಯಿತು.

ಹಾಶಿಮ್ ಮೂಸಾ ಅಲಿಯಾಸ್ ಫೌಜಿ (ಆಪರೇಷನ್ ಕೊರಾಗ್): ಸೆಪ್ಟೆಂಬರ್ 29 ರಂದು ನಡೆದ ಅಂತಿಮ ಕಾರ್ಯಾಚರಣೆಯಲ್ಲಿ ಕೊನೆಯ ಉಗ್ರ ಮೂಸಾನನ್ನು ಹತ್ಯೆ ಮಾಡಲಾಗಿದ್ದು, ಆತನ ಬಳಿಯಿದ್ದ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಪಹಲ್ಗಾಮ್, ಗಗನ್‌‌ಗೀರ್ ಮತ್ತು ಗುಲ್ಮಾರ್ಗ್ ದಾಳಿಗಳಲ್ಲಿ ಭಾಗಿಯಾಗಿದ್ದ ಎಲ್ಲಾ ಪ್ರಮುಖ ಉಗ್ರರನ್ನು ಹತ್ಯೆ ಮಾಡುವ ಮೂಲಕ ಭದ್ರತಾ ಪಡೆಗಳು ಭಾರತದ ಮೇಲಿನ ದಾಳಿಗೆ ತಕ್ಕ ತಿರುಗೇಟು ನೀಡಿವೆ.