ಕ್ರೆಡಿಟ್ ಸ್ಕೋರ್ ಹೆಚ್ಚಿಸಿಕೊಳ್ಳಲು ಕ್ರೆಡಿಟ್ ಕಾರ್ಡ್ ಸರಿಯಾದ ಮಾರ್ಗವೇ? ತಜ್ಞರು ಹೇಳುವುದೇನು?

ಆಧುನಿಕ ಜಗತ್ತಿನಲ್ಲಿ ಡಿಜಿಟಲ್ ಪಾವತಿ ಮತ್ತು ಶಾಪಿಂಗ್‌ಗೆ ಕ್ರೆಡಿಟ್ ಕಾರ್ಡ್‌ಗಳು ಅತ್ಯಗತ್ಯ ಸಾಧನವಾಗಿ ಮಾರ್ಪಟ್ಟಿವೆ. ಆನ್‌ಲೈನ್ ಶಾಪಿಂಗ್, ಪ್ರಯಾಣದ ಬುಕಿಂಗ್‌ಗಳಿಂದ ಹಿಡಿದು ತುರ್ತು ಹಣಕಾಸಿನ ಅಗತ್ಯಗಳವರೆಗೆ ಇವು ಬಳಕೆಗೆ ಅತ್ಯಂತ ಸುಲಭ ಹಾಗೂ ಅನುಕೂಲಕರವಾಗಿವೆ. ಆದರೆ, ಕ್ರೆಡಿಟ್ ಕಾರ್ಡ್ ನಿಮಗೆ ಆಪ್ತ ಮಿತ್ರನಾಗಬೇಕೇ ಅಥವಾ ಬಡ್ಡಿ ಕಟ್ಟಲಾಗದ ಸಾಲದ ಸುಳಿಯಾಗಬೇಕೇ ಎಂಬುದು ನೀವು ಅದನ್ನು ಹೇಗೆ ಬಳಸುತ್ತೀರಿ ಎನ್ನುವುದರ ಮೇಲೆ ನಿರ್ಧಾರವಾಗುತ್ತದೆ.

ಕ್ರೆಡಿಟ್ ಸ್ಕೋರ್ ಹೆಚ್ಚಿಸಿಕೊಳ್ಳಲು ಕ್ರೆಡಿಟ್ ಕಾರ್ಡ್ ಸರಿಯಾದ ಮಾರ್ಗವೇ ಎಂಬ ಕುರಿತಂತೆ ತಜ್ಞರು ಹೇಳೋದೇನು ಎಂಬ ಕುರಿತ ಸ್ಪೆಷಲ್ ರಿಪೋರ್ಟ್.

ಬಳಕೆದಾರರ ಶಿಸ್ತೇ ಅಂತಿಮ ನಿರ್ಧಾರ:

ರೂಪಾಯಾಪೈಸಾ.ಕಾಮ್‌ (Rupyaapaisa.com) ಸಂಸ್ಥಾಪಕ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಮುಕೇಶ್ ಪಾಂಡೆ ಅವರ ಪ್ರಕಾರ, “ಸಮಸ್ಯೆ ಇರುವುದು ಕ್ರೆಡಿಟ್ ಕಾರ್ಡ್‌ನಲ್ಲಿ ಅಲ್ಲ, ಬದಲಾಗಿ ನಮ್ಮ ಅಜಾಗರೂಕತೆಯ ಹಣಕಾಸು ನಡವಳಿಕೆಯಲ್ಲಿ. 2026ರ ಮೇ ತಿಂಗಳ ವೇಳೆಗೆ ಭಾರತದಲ್ಲಿ ಕ್ರೆಡಿಟ್ ಕಾರ್ಡ್ ಬಳಕೆ ₹2 ಲಕ್ಷ ಕೋಟಿ ಗಡಿ ದಾಟಿದೆ. ಕ್ರೆಡಿಟ್ ಕಾರ್ಡ್ ಎನ್ನುವುದು ಸಾಲ ಪಡೆಯುವ ಸಾಧನವಲ್ಲ, ಅದೊಂದು ಪಾವತಿ ವ್ಯವಸ್ಥೆ ಎಂಬುದನ್ನು ಮೊದಲು ಗ್ರಹಿಸಬೇಕು. ಸಕಾಲದಲ್ಲಿ ಬಿಲ್ ಪಾವತಿಸಿದರೆ, ಇದು ಅತ್ಯುತ್ತಮ ರಿವಾರ್ಡ್‌ಗಳನ್ನು ನೀಡುವ ಸಾಧನವಾಗುತ್ತದೆ” ಎನ್ನುತ್ತಾರೆ.

ನಿರಂತರ ಸಾಲದ ಅಪಾಯ ತಪ್ಪಿಸಿ:

ಅತಿಯಾದ ಆತುರದ ಖರೀದಿ, ಬಿಲ್ ಪಾವತಿಯಲ್ಲಿ ವಿಳಂಬ, ಕಾರ್ಡ್ ಮೂಲಕ ನಗದು ವಿತ್‌ಡ್ರಾ ಮಾಡುವುದು ಮತ್ತು ಬಿಲ್‌ನ ಕನಿಷ್ಠ ಮೊತ್ತವನ್ನು (Minimum Amount Due) ಮಾತ್ರ ಪಾವತಿಸುತ್ತಾ ಹೋಗುವುದು ವ್ಯಕ್ತಿಯನ್ನು ತೀವ್ರ ಬಡ್ಡಿಯ ಸಾಲದ ಬಲೆಗೆ ತಳ್ಳುತ್ತದೆ.

ಸುರಕ್ಷಿತ ಆರಂಭಕ್ಕೆ ‘ಎಫ್‌ಡಿ ಆಧಾರಿತ ಕಾರ್ಡ್’ (FD-backed Cards):

ಪ್ಲುಟೋಸ್ ಒನ್ (plutos ONE) ಸಂಸ್ಥಾಪಕ ಮತ್ತು ಸಿಇಒ ರೋಹಿತ್ ಮಹಾಜನ್ ಮಾತನಾಡಿ, “ಪ್ರಸ್ತುತ ಭಾರತದಲ್ಲಿ 12 ಕೋಟಿಗೂ ಹೆಚ್ಚು ಸಕ್ರಿಯ ಕ್ರೆಡಿಟ್ ಕಾರ್ಡ್‌ಗಳಿವೆ. ಮೊದಲ ಬಾರಿಗೆ ಕಾರ್ಡ್ ಬಳಸುವವರಿಗೆ ಅಥವಾ ನವೀನ ಗ್ರಾಹಕರಿಗೆ ಬ್ಯಾಂಕ್ ಎಫ್‌ಡಿ (Fixed Deposit) ಆಧಾರಿತ ಸುರಕ್ಷಿತ ಕ್ರೆಡಿಟ್ ಕಾರ್ಡ್‌ಗಳನ್ನು ನೀಡುವುದು ಸೂಕ್ತ. ಇದು ಆರ್ಥಿಕ ನಷ್ಟದ ಅಪಾಯವಿಲ್ಲದೆ ಕ್ರೆಡಿಟ್ ಸ್ಕೋರ್ ಬೆಳೆಸಿಕೊಳ್ಳಲು ಸಹಾಯ ಮಾಡುತ್ತದೆ” ಎಂದಿದ್ದಾರೆ.

ಲಾಭಗಳು ಮತ್ತು ಅಪಾಯಗಳ ಸಂಕ್ಷಿಪ್ತ ನೋಟ:

• ಲಾಭಗಳು: ಕ್ಯಾಶ್‌ಲೆಸ್ ವಹಿವಾಟು, ಸಕಾಲದಲ್ಲಿ ಪಾವತಿಸಿದರೆ ಬಡ್ಡಿರಹಿತ ಅವಧಿ, ಕ್ಯಾಶ್‌ಬ್ಯಾಕ್ ಹಾಗೂ ರಿವಾರ್ಡ್ ಪಾಯಿಂಟ್‌ಗಳು, ಉತ್ತಮ ಸಿಬಿಲ್/ಕ್ರೆಡಿಟ್ ಸ್ಕೋರ್.

• ಅಪಾಯಗಳು: ಅನಗತ್ಯ ಖರೀದಿ, ಅತಿಯಾದ ಬಡ್ಡಿ ದರ, ತಡವಾದ ಪಾವತಿಯಿಂದ ಕ್ರೆಡಿಟ್ ಸ್ಕೋರ್‌ಗೆ ಹಾನಿ, ಸಾಲದ ಸುಳಿ.

ಸಾರಾಂಶ: ಕ್ರೆಡಿಟ್ ಕಾರ್ಡ್‌ಗಳನ್ನು ‘ಡೆಬಿಟ್ ಕಾರ್ಡ್’ ರೀತಿಯಲ್ಲೇ ಪರಿಗಣಿಸಿ, ತಿಂಗಳ ಕೊನೆಯಲ್ಲಿ ಪೂರ್ಣ ಬಿಲ್ ಪಾವತಿಸುವ ಶಿಸ್ತು ಬೆಳೆಸಿಕೊಂಡರೆ ಅವು ನಿಮ್ಮ ಆರ್ಥಿಕ ಪ್ರಗತಿಗೆ ದೊಡ್ಡ ಅಸ್ತ್ರವಾಗಲಿವೆ.