ಪ್ರೇಯಸಿಯೊಂದಿಗೆ ಸಿಕ್ಕಿಬಿದ್ದ ಗಂಡ: ಹೆಂಡತಿಯನ್ನೇ ಕಾರಿನ ಬೊನೆಟ್‌ ಮೇಲೆ 100 ಮೀಟರ್ ಎಳೆದೊಯ್ದ ಪತಿ ಅರೆಸ್ಟ್!

ಮೀರತ್: ಉತ್ತರ ಪ್ರದೇಶದ ಮೀರತ್‌ನಲ್ಲಿದಿಗ್ಭ್ರಮೆಗೊಳಿಸುವ ಘಟನೆಯೊಂದು ನಡೆದಿದ್ದು, ಪ್ರೇಯಸಿಯೊಂದಿಗೆ ಮೊಮೋಸ್ ತಿನ್ನಲು ಬಂದಿದ್ದ ಪತಿಯೊಬ್ಬ ತನ್ನನ್ನು ರೆಡ್‌ಹ್ಯಾಂಡ್ ಆಗಿ ಹಿಡಿದ ಹೆಂಡತಿಯನ್ನೇ ಕಾರಿನ ಬೊನೆಟ್ ಮೇಲೆ 100 ಮೀಟರ್‌ಗೂ ಹೆಚ್ಚು ದೂರ ಎಳೆದೊಯ್ದು ಕೊಲೆಗೆ ಯತ್ನಿಸಿದ ಆಘಾತಕಾರಿ ಪ್ರಕರಣ ಬೆಳಕಿಗೆ ಬಂದಿದೆ.

ಘಟನೆಯ ವಿವರ:

ಮೀರತ್‌ನ ನಿವಾಸಿ ಮಯಾಂಕ್ ಎಂಬಾತ ತನ್ನ ಗೆಳತಿ ಮಾಹಿ ಜೊತೆ ಕಾರಿನಲ್ಲಿ ಕುಳಿತು ಮೊಮೋಸ್ ತಿನ್ನುತ್ತಿದ್ದಾಗ, ಆತನ ಪತ್ನಿ ಸುನಿತಾ ಅವರಿಗೆ ಸಿಕ್ಕಿಬಿದ್ದಿದ್ದಾನೆ. ಗಂಡ ಬೇರೊಬ್ಬ ಮಹಿಳೆಯೊಂದಿಗೆ ಇರುವುದನ್ನು ಕಂಡು ಕೋಪಗೊಂಡ ಸುನಿತಾ, ಕಾರಿನ ಗ್ಲಾಸ್ ತಟ್ಟಲು ಪ್ರಾರಂಭಿಸಿದ್ದಾರೆ. ಇದರಿಂದ ಗಾಬರಿಗೊಂಡ ಮಯಾಂಕ್ ಕಾರಿನ ಬಾಗಿಲುಗಳನ್ನು ಲಾಕ್ ಮಾಡಿ ಅಲ್ಲಿಂದ ಕಾಲ್ಕಿಳಲು ಯತ್ನಿಸಿದ್ದಾನೆ.

ಇದನ್ನು ತಡೆಯಲು ಸುನಿತಾ ತಕ್ಷಣ ಕಾರಿನ ಮುಂದೆ ನಿಂತು ಬೊನೆಟ್ ಮೇಲೆ ಬಿದ್ದರೂ, ಮಯಾಂಕ್ ಕಾರನ್ನು ನಿಲ್ಲಿಸದೇ ಚಲಾಯಿಸಿಕೊಂಡು ಹೋಗಿದ್ದಾನೆ. “ಅಣ್ಣಾ ಕಾಪಾಡಿ, ನನ್ನನ್ನು ರಕ್ಷಿಸಿ” ಎಂದು ಸುನಿತಾ ಕಾರಿನ ಬೊನೆಟ್ ಮೇಲೆಯೇ ಕಿರುಚಾಡುತ್ತಾ ಪ್ರಾಣಭಯದಿಂದ ಬೇಡಿಕೊಂಡಿದ್ದಾರೆ. ಸುಮಾರು 100 ಮೀಟರ್‌ಗಳವರೆಗೆ ಆಕೆಯನ್ನು ಬೊನೆಟ್ ಮೇಲೆಯೇ ಎಳೆದೊಯ್ಯಲಾಗಿದೆ.

ಪೊಲೀಸ್ ಕಾರ್ಯಾಚರಣೆ ಹಾಗೂ ಬಂಧನ:

ರಸ್ತೆಯಲ್ಲಿ ಸಾರ್ವಜನಿಕರು ಹಾಗೂ ಸ್ಥಳೀಯರು ಗುಂಪುಗೂಡುವುದನ್ನು ಕಂಡು ಮಯಾಂಕ್ ಅನಿವಾರ್ಯವಾಗಿ ಕಾರನ್ನು ನಿಲ್ಲಿಸಿದ್ದಾನೆ. ಘಟನೆ ಸಂಬಂಧ ಸುನಿತಾ ಅವರು ಪತಿಯ ವಿರುದ್ಧ ಹಲ್ಲೆ, ವರದಕ್ಷಿಣೆ ಕಿರುಕುಳ ಹಾಗೂ ಅಕ್ರಮ ಸಂಬಂಧದ ದೂರು ನೀಡಿದ್ದಾರೆ.

ಈ ಕುರಿತು ಮಾಹಿತಿ ನೀಡಿದ ಕೊತ್ವಾಲಿ ಸರ್ಕಲ್ ಆಫೀಸರ್ ಸಂಗ್ರಾಮ್ ಸಿಂಗ್, “ಮಾತಿನ ಚಕಮಕಿಯ ನಂತರ ವ್ಯಕ್ತಿಯು ತನ್ನ ಪತ್ನಿಯನ್ನು ಕೊಲ್ಲುವ ಉದ್ದೇಶದಿಂದ ಕಾರಿನಿಂದ ತುಳಿಯಲು ಯತ್ನಿಸಿದ್ದಾನೆ. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ ಕೊಲೆ ಯತ್ನ ಪ್ರಕರಣ ದಾಖಲಿಸಿಕೊಂಡಿದ್ದೇವೆ” ಎಂದು ತಿಳಿಸಿದ್ದಾರೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಯಾಂಕ್ ಮತ್ತು ಆತನ ಗೆಳತಿ ಮಾಹಿ ಇಬ್ಬರನ್ನೂ ಪೊಲೀಸರು ಬಂಧಿಸಿದ್ದಾರೆ. ಘಟನೆಗೆ ಬಳಸಲಾಗಿದ್ದ ‘ಟೊಯೋಟಾ ಅರ್ಬನ್ ಕ್ರೂಸರ್ ತೈಸರ್’ (UP15ER3086) ಕಾರನ್ನು ಪೊಲೀಸರು ವಶಪಡಿಸಿಕೊಂಡಿದ್ದು, ಮುಂದಿನ ತನಿಖೆ ಮುಂದುವರಿದಿದೆ.