ಹಬ್ಬದ ಸೀಸನ್ ಆರಂಭಕ್ಕೂ ಮುನ್ನವೇ ಹೆಚ್ಚಿದ ಸಕ್ಕರೆ ದರ: ಬ್ಲಿಂಕಿಟ್, ಝೆಪ್ಟೋ, ಸ್ವಿಗ್ಗಿಯಲ್ಲಿ ಖರೀದಿಗೆ ಮಿತಿ

ನವದೆಹಲಿ: ದೇಶಾದ್ಯಂತ ಸಾಲು ಸಾಲು ಹಬ್ಬಗಳು ಆರಂಭವಾಗುತ್ತಿರುವ ಬೆನ್ನಲ್ಲೇ ಸಾರ್ವಜನಿಕರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ಹಬ್ಬದ ದಿನಗಳಲ್ಲಿ ಸ್ವೀಟ್‌ಗಳು ಮತ್ತು ಸಾಂಪ್ರದಾಯಿಕ ಅಡುಗೆಗಳ ತಯಾರಿಕೆಗೆ ಸಕ್ಕರೆ ಬಳಕೆಯ ಬೇಡಿಕೆ ಹೆಚ್ಚಾಗುವ ಸಮಯದಲ್ಲೇ ಸಕ್ಕರೆ ದರ ಏರಿಕೆಯಾಗಿದ್ದು, ಗ್ರಾಹಕರಿಗೆ ದೊಡ್ಡ ಹೊಡೆತ ಬಿದ್ದಿದೆ. ಇದರ ಜೊತೆಗೆ ಸಕ್ಕರೆ ಅಭಾವವನ್ನು ನಿಯಂತ್ರಿಸಲು ಆನ್‌ಲೈನ್ ಕ್ವಿಕ್-ಕಾಮರ್ಸ್ ಅಪ್ಲಿಕೇಶನ್‌ಗಳು ಮತ್ತು ಆಫ್‌ಲೈನ್ ಡಿಪಾರ್ಟ್‌ಮೆಂಟಲ್ ಸ್ಟೋರ್‌ಗಳು ಸಕ್ಕರೆ ಖರೀದಿಗೆ ಮಿತಿ ವಿಧಿಸಿವೆ.

ಆನ್‌ಲೈನ್ ಮತ್ತು ಆಫ್‌ಲೈನ್ ಸ್ಟೋರ್‌ಗಳಲ್ಲಿ ಸಕ್ಕರೆ ಕೊರತೆ:

ಇತ್ತೀಚಿನ ವರದಿಗಳ ಪ್ರಕಾರ, ಝೆಪ್ಟೋ, ಬ್ಲಿಂಕಿಟ್, ಮತ್ತು ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ ನಂತಹ ಕ್ಷಿಪ್ರ ತಲುಪಿಸುವ ಆ್ಯಪ್‌ಗಳು ಪ್ರತಿಯೊಬ್ಬ ಗ್ರಾಹಕನಿಗೆ ಗರಿಷ್ಠ 2 ರಿಂದ 3 ಕೆಜಿ ಅಥವಾ 1 ರಿಂದ 2 ಪ್ಯಾಕೆಟ್‌ಗಳನ್ನಷ್ಟೇ ಆರ್ಡರ್ ಮಾಡಲು ಅವಕಾಶ ನೀಡುತ್ತಿವೆ. ಹಲವು ಬ್ರ್ಯಾಂಡ್‌ಗಳ ಸಕ್ಕರೆ ಈಗಾಗಲೇ ‘ಔಟ್ ಆಫ್ ಸ್ಟಾಕ್’ ಆಗಿವೆ.

ಕೇವಲ ಆನ್‌ಲೈನ್ ಮಾತ್ರವಲ್ಲದೆ ಡಿ-ಮಾರ್ಟ್  ಮತ್ತು ರಿಲಯನ್ಸ್  ನಂತಹ ದೊಡ್ಡ ಪ್ರಮಾಣದ ಆಫ್‌ಲೈನ್ ಸೂಪರ್‌ ಮಾರ್ಕೆಟ್‌ಗಳಲ್ಲೂ ಒಬ್ಬ ಗ್ರಾಹಕನಿಗೆ 2-3 ಕೆಜಿಗಿಂತ ಹೆಚ್ಚು ಸಕ್ಕರೆ ನೀಡದಂತೆ ನಿರ್ಬಂಧ ಹೇರಲಾಗಿದೆ.

ಬೆಲೆ ಏರಿಕೆಗೆ ಕಾರಣ ಮತ್ತು ಸರ್ಕಾರದ ಕ್ರಮ:

ಮಾರುಕಟ್ಟೆಯಲ್ಲಿ ಕೃತಕ ಅಭಾವ ಸೃಷ್ಟಿಯಾಗುವುದು ಮತ್ತು ಕಾಳಸಂತೆಯಲ್ಲಿ ಸಕ್ಕರೆ ಸಂಗ್ರಹಿಸುವುದನ್ನು (Hoarding) ತಡೆಯಲು ಭಾರತ ಸರ್ಕಾರ ತಕ್ಷಣದ ಕ್ರಮ ಕೈಗೊಂಡಿದೆ.

ಸುಂಕ ರಹಿತ ಆಮದು: ಸರ್ಕಾರವು 10 ಲಕ್ಷ ಟನ್ ಕಚ್ಚಾ ಸಕ್ಕರೆಯನ್ನು ಸುಂಕವಿಲ್ಲದೆದೇಶಕ್ಕೆ ತರಿಸಿಕೊಳ್ಳಲು ಅನುಮತಿ ನೀಡಿದೆ.

ಸಂಸ್ಕರಣಾ ನಿಯಮಗಳ ಸಡಿಲಿಕೆ: ಆಮದು ಮಾಡಿಕೊಂಡ ಕಚ್ಚಾ ಸಕ್ಕರೆಯನ್ನು ಶುದ್ಧೀಕರಿಸಿ (Refine) ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಸಂಸ್ಕರಣಾಗಾರರಿಗೆ ಬಿಲ್ ಆಫ್ ಎಂಟ್ರಿ (Bill of Entry) ಸಲ್ಲಿಸಿದ ದಿನದಿಂದ 2 ತಿಂಗಳ ಕಾಲಾವಕಾಶ ನೀಡಲಾಗಿದೆ.

ಸರ್ಕಾರದ ಈ ಕ್ರಮಗಳು ಮಾರುಕಟ್ಟೆಯಲ್ಲಿ ಸಕ್ಕರೆ ಪೂರೈಕೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆಯಾದರೂ, ವಿದೇಶದಿಂದ ಬಂದ ಸಕ್ಕರೆ ಸಂಸ್ಕರಣೆಯಾಗಿ ಸಾಮಾನ್ಯ ಮಾರುಕಟ್ಟೆಗೆ ತಲುಪಲು ಸ್ವಲ್ಪ ಸಮಯ ಹಿಡಿಯಲಿದೆ. ಅಲ್ಲಿಯವರೆಗೆ ಚಿಲ್ಲರೆ ವ್ಯಾಪಾರಿಗಳು ಸಕ್ಕರೆ ಖರೀದಿಯ ಮೇಲಿನ ಮಿತಿಯನ್ನು ಮುಂದುವರಿಸಲಿದ್ದಾರೆ.