ಬೆಂಗಳೂರಿನಲ್ಲಿ ಸಾಫ್ಟ್‌ವೇರ್ ಎಂಜಿನಿಯರ್‌ಗಳಿಗಿಂತ ಇವರೇ ಹೆಚ್ಚು ಸಂಪಾದಿಸ್ತಾರಾ? ವೈರಲ್ ಆಯ್ತು ‘ಹೆಚ್ಚು ಗಳಿಸುವ ವೃತ್ತಿ’ಗಳ ಲಿಸ್ಟ್!

ಬೆಂಗಳೂರು: ಐಟಿ ರಾಜಧಾನಿ ಬೆಂಗಳೂರಿನಲ್ಲಿ ಉತ್ತಮ ಸಂಬಳ, ಕೋಡಿಂಗ್ ಮತ್ತು ಡೇಟಾ ಸ್ಟ್ರಕ್ಚರ್ಸ್ ಆಂಡ್ ಆಲ್ಗರಿದಮ್ಸ್ ಕಲಿಯಲು ವರ್ಷಪೂರ್ತಿ ಶ್ರಮಿಸುವ ಸಾಫ್ಟ್‌ವೇರ್ ಎಂಜಿನಿಯರ್‌ಗಳಿಗಿಂತ, ನಗರದ ಸ್ಥಳೀಯ ವ್ಯಾಪಾರಿಗಳು ಮತ್ತು ಬಾಡಿಗೆ ನೀಡುವವರೇ ಹೆಚ್ಚು ಆದಾಯ ಗಳಿಸುತ್ತಿದ್ದಾರೆ ಎಂಬ ವಿಷಯ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಸಾಕ್ಷಿಎಂಬ ಎಐ ಮತ್ತು ಟೆಕ್ ವಿಶ್ಲೇಷಕಿ X ನಲ್ಲಿ ಹಂಚಿಕೊಂಡಿರುವ ತಮಾಷೆಯ ಪೋಸ್ಟ್ ಒಂದರಲ್ಲಿ, ಬೆಂಗಳೂರಿನಲ್ಲಿ ಅತ್ಯಧಿಕ ಸಂಪಾದನೆ ಮಾಡುವ ವೃತ್ತಿಗಳ ಪಟ್ಟಿಯನ್ನು ಪ್ರಕಟಿಸಿದ್ದು, ಅದರಲ್ಲಿ ಸಾಫ್ಟ್‌ವೇರ್ ಎಂಜಿನಿಯರ್‌ಗಳಿಗಿಂತ ಪಿಜಿ ಮಾಲೀಕರು ಮತ್ತು ಮನೆ ಮಾಲೀಕರು ಮುಂಚೂಣಿಯಲ್ಲಿದ್ದಾರೆ ಎಂದು ಉಲ್ಲೇಖಿಸಲಾಗಿದೆ.

ವೈರಲ್ ಪಟ್ಟಿಯಲ್ಲಿರುವ ಪ್ರಮುಖ 5 ವೃತ್ತಿಗಳು:

ಪಿಜಿ ಮಾಲೀಕರು: ಒಂದೇ ಕೊಠಡಿಯಲ್ಲಿ 3-4 ಜನರನ್ನು ಇರಿಸಿ, ಪ್ರತಿಯೊಬ್ಬರಿಂದ ₹10,000 ರಿಂದ ₹15,000 ಬಾಡಿಗೆ ಪಡೆಯುವ ಮೂಲಕ ತಿಂಗಳಿಗೆ ಲಕ್ಷಾಂತರ ರೂಪಾಯಿ ಲಾಭ ಗಳಿಸುತ್ತಿದ್ದಾರೆ.

ಚಹಾ ಮತ್ತು ಸಿಗರೇಟ್ ಅಂಗಡಿ ಮಾಲೀಕರು: ಟೆಕ್ ಪಾರ್ಕ್‌ಗಳ ಹೊರಗಿರುವ ಸಣ್ಣ ಅಂಗಡಿಗಳು ಎಂಜಿನಿಯರ್‌ಗಳ ದೈನಂದಿನ ಅಗತ್ಯಗಳನ್ನು ಪೂರೈಸಿ, ಯಾವುದೇ ಸ್ಟಾರ್ಟ್‌ಅಪ್ ಫಂಡಿಂಗ್ ಇಲ್ಲದೆ ದೊಡ್ಡ ಮೊತ್ತದ ನಗದು ಆದಾಯ ಗಳಿಸುತ್ತಿವೆ.

ಬೆಂಗಳೂರು ಮನೆ ಮಾಲೀಕರು : ನಗರದ ನಿರಂತರ ವಸತಿ ಬೇಡಿಕೆಯನ್ನು ಬಳಸಿಕೊಂಡು ಪ್ರತಿವರ್ಷ ಬಾಡಿಗೆ ಏರಿಸುವುದು ಮತ್ತು ಹೆಚ್ಚಿನ ಡೆಪಾಸಿಟ್ ಪಡೆಯುವುದು.

ವಾಟರ್ ಟ್ಯಾಂಕರ್ ಮಾಲೀಕರು: ನೀರಿನ ಅಭಾವದ ಸಮಯದಲ್ಲಿ ಹೆಚ್ಚಿನ ದರ ವಿಧಿಸಿ ನೀರು ಪೂರೈಸುವುದು.

ರಿಯಲ್ ಎಸ್ಟೇಟ್ ಬ್ರೋಕರ್‌ಗಳು: ಬಾಡಿಗೆದಾರರು ಮತ್ತು ಮಾಲೀಕರಿಬ್ಬರಿಂದಲೂ ಕಮಿಷನ್ ಪಡೆಯುವುದು.

ಯಾವುದೇ ಕೋಡಿಂಗ್ ಅಥವಾ ಐಐಟಿ ಪದವಿ ಇಲ್ಲದೆ ನಗರದ ಮೂಲಭೂತ ಬೇಡಿಕೆಗಳನ್ನು ಬಳಸಿಕೊಂಡು ಲಾಭ ಗಳಿಸುವ ಈ ಸಣ್ಣ ಉದ್ಯಮಗಳು ಮತ್ತು ಆಸ್ತಿ ಮಾಲೀಕತ್ವದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ನೆಟ್ಟಿಗರು ತಮಾಷೆಯಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ.