ಕೋರ್ಟ್ ಆವರಣದಲ್ಲೇ ಪತ್ನಿಗೆ ಹಲ್ಲೆ, ಕುತ್ತಿಗೆ ಹಿಸುಕಲು ಯತ್ನ: ಪತಿಗೆ ಕಪಾಳಮೋಕ್ಷ, ಗಂಡ ಸೇರಿ ಇಬ್ಬರ ಬಂಧನ!

ಮಹಾರಾಜ್‌ಗಂಜ್ (ಉತ್ತರ ಪ್ರದೇಶ): ಕುಟುಂಬ ಕೋರ್ಟ್ ಆವರಣದಲ್ಲೇ ಜೀವನಾಂಶ ಪ್ರಕರಣದ ವಿಚಾರಣೆ ಮುಗಿಸಿ ಹೊರಬಂದ ದಂಪತಿ ಹಾಗೂ ಅವರ ಸಂಬಂಧಿಕರ ನಡುವೆ ಭೀಕರ ಕೈಕೈ ಮಿಲಾಯಿಸುವ ಮತ್ತು ಹಲ್ಲೆ ನಡೆಸುವ ಘಟನೆ ನಡೆದಿದೆ. ಈ ಸಂಬಂಧ ಪೊಲೀಸರು ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಘಟನೆಯ ಹಿನ್ನೆಲೆ ಮತ್ತು ವಿವರ:

ಸಮರ್ಧಿರ ನಿವಾಸಿ ಪ್ರಿಯಾ ತ್ರಿಪಾಠಿ ಹಾಗೂ ಕೊಯಿಲಾಡಡ್ ನಿವಾಸಿ ಮನೀಶ್ ಕುಮಾರ್ ಮಿಶ್ರಾ ಅವರ ವಿವಾಹವಾಗಿದ್ದು, ಮದುವೆಯಾದ ಕೆಲವೇ ದಿನಗಳಲ್ಲಿ ಇಬ್ಬರ ನಡುವೆ ಕೌಟುಂಬಿಕ ಕಲಹ ಆರಂಭವಾಗಿತ್ತು. ಪ್ರಿಯಾ ಅವರು ಪತಿ ವಿರುದ್ಧ ಜೀವನಾಂಶ ಪ್ರಕರಣ  ದಾಖಲಿಸಿದ್ದರು.

ಸೆಪ್ಟೆಂಬರ್ 24 ರಂದು ವಿಚಾರಣೆಗೆ ಹಾಜರಾಗಿದ್ದಾಗ, ಮಧ್ಯಾಹ್ನ ಸುಮಾರು 2 ಗಂಟೆಗೆ ಪ್ರಿಯಾ ಅವರ ತಂದೆ ಲಕ್ಷ್ಮಿಕಾಂತ್ ಕೋರ್ಟ್‌ನಲ್ಲಿ ಸಾಕ್ಷ್ಯ ನುಡಿದಿದ್ದರು. ವಿಚಾರಣೆ ಮುಗಿದ ನಂತರ ಪ್ರಿಯಾ, ಆಕೆಯ ಸಹೋದರಿ ಪ್ರಿಯಾಂಕಾ ಮತ್ತು ತಂದೆ ಕೋರ್ಟ್‌ ಕಟ್ಟಡದ ನೆಲಮಹಡಿಯ ಹಾಲ್‌ನತ್ತ ಬರುತ್ತಿದ್ದಾಗ ಈ ಘಟನೆ ಸಂಭವಿಸಿದೆ.

ಕೋರ್ಟ್ ಆವರಣದಲ್ಲೇ ರಂಪಾಟ:

ಪ್ರಿಯಾ ನೀಡಿದ ದೂರಿನ ಪ್ರಕಾರ, ಪತಿ ಮನೀಶ್ ಹಾಗೂ ಆತನ ಜೊತೆಯಲ್ಲಿದ್ದ ಪ್ರಿನ್ಸ್ ಮಿಶ್ರಾ ಮತ್ತು ಸತೀಶ್ ಮಿಶ್ರಾ ಎಂಬುವವರು ಹಿಂಬದಿಯಿಂದ ಬಂದು ಏಕಾಏಕಿ ಹಲ್ಲೆ ನಡೆಸಿದ್ದಾರೆ.

ಭೀಕರ ದಾಳಿ: ಮನೀಶ್ ತನ್ನ ಪತ್ನಿ ಪ್ರಿಯಾಳ ಕೂದಲು ಹಿಡಿದು ಎಳೆದಾಡಿ, ನೆಲಕ್ಕೆ ತಳ್ಳಿ ಕುತ್ತಿಗೆ ಹಿಸುಕಲು ಯತ್ನಿಸಿದ್ದಾನೆ.

ಸಂಬಂಧಿಕರ ಮೇಲೆಯೂ ಹಲ್ಲೆ: ಮಗಳ ರಕ್ಷಣೆಗೆ ಬಂದ ತಂದೆ ಲಕ್ಷ್ಮಿಕಾಂತ್ ಮತ್ತು ಸಹೋದರಿ ಪ್ರಿಯಾಂಕಾ ಅವರ ಮೇಲೆಯೂ ಆರೋಪಿಗಳು ಹಲ್ಲೆ ನಡೆಸಿ ನೆಲಕ್ಕೆ ತಳ್ಳಿದ್ದಾರೆ.

ಪತಿಗೆ ಕಪಾಳಮೋಕ್ಷ: ದಾಳಿಯ ಸಮಯದಲ್ಲಿ ಪ್ರಿಯಾ ಕಡೆಯಿಂದ ಬಂದ ವ್ಯಕ್ತಿಯೊಬ್ಬ ಹಲ್ಲೆ ನಡೆಸುತ್ತಿದ್ದ ಪತಿ ಮನೀಶ್‌ನ ಮುಖಕ್ಕೆ ಜೋರಾಗಿ ಕಪಾಳಮೋಕ್ಷ ಮಾಡುವುದು ವಿಡಿಯೋದಲ್ಲಿ ಸೆರೆಯಾಗಿದೆ.

ಕೊಲೆ ಬೆದರಿಕೆ: ಪ್ರಕರಣವನ್ನು ಮುಂದುವರಿಸಿದರೆ ಜೀವಸಹಿತ ಬಿಡುವುದಿಲ್ಲ ಎಂದು ಆರೋಪಿಗಳು ಕೊಲೆ ಬೆದರಿಕೆ ಹಾಕಿದ್ದಾರೆ ಎಂದು ಪ್ರಿಯಾ ಆರೋಪಿಸಿದ್ದಾರೆ.

ಸೌಂಡ್ ಕೇಳಿ ಸ್ಥಳಕ್ಕೆ ಧಾವಿಸಿದ ಕೋರ್ಟ್ ಆವರಣದಲ್ಲಿದ್ದ ಪೊಲೀಸರು ತಕ್ಷಣ ಮಧ್ಯಪ್ರವೇಶಿಸಿ ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.

ಪೊಲೀಸ್ ಕ್ರಮ:

ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಬೆನ್ನಲ್ಲೇ ಪ್ರಿಯಾ ಅವರು ಕೊತ್ವಾಲಿ ಪೊಲೀಸ್ ಠಾಣೆಗೆ ತೆರಳಿ ದೂರು ಹಾಗೂ ವಿಡಿಯೋ ಸಾಕ್ಷ್ಯಾಧಾರಗಳನ್ನು ಸಲ್ಲಿಸಿದ್ದಾರೆ.

ಕೊತ್ವಾಲಿ ಠಾಣೆಯ ಪ್ರಭಾರಿ ಧರ್ಮೇಂದ್ರ ಸಿಂಗ್ ಮಾತನಾಡಿ, “ಘಟನೆಗೆ ಸಂಬಂಧಿಸಿದಂತೆ ಎಫ್‌ಐಆರ್ ದಾಖಲಿಸಿಕೊಳ್ಳಲಾಗಿದ್ದು, ಇಬ್ಬರು ಆರೋಪಿಗಳನ್ನು ಬಂಧಿಸಲಾಗಿದೆ. ಸಂಪೂರ್ಣ ಪ್ರಕರಣದ ತನಿಖೆ ನಡೆಯುತ್ತಿದೆ” ಎಂದು ತಿಳಿಸಿದ್ದಾರೆ.