5,000 ಸೈನಿಕರಿದ್ದ ಅಮೆರಿಕದ ನೌಕೆ ಆಗಮಿಸುತ್ತಿದ್ದಂತೆಯೇ ಥೈಲ್ಯಾಂಡ್ ನ ಪಟ್ಟಾಯಾದಲ್ಲಿ “ಆಪರೇಷನ್ ವೇಶ್ಯಾವಾಟಿಕೆ”: ಸುಮಾರು 50 ವೇಶ್ಯೆಯರ ಬಂಧನ ಏಕೆ?

ಥೈಲ್ಯಾಂಡ್: ಥೈಲ್ಯಾಂಡ್‌ ನ ಪ್ರಸಿದ್ಧ ಪ್ರವಾಸಿ ನಗರವಾದ ಪಟಾಯಾದಲ್ಲಿ ಅಮೆರಿಕದ ಯುದ್ಧನೌಕೆಯ ಸೈನಿಕರ ಆಗಮನಕ್ಕೂ ಮುನ್ನವೇ ಅಲ್ಲಿನ ಪೊಲೀಸರು ವೇಶ್ಯಾವಾಟಿಕೆ ಜಾಲಗಳ ವಿರುದ್ಧ ಭಾರಿ ಕಾರ್ಯಾಚರಣೆ ಆರಂಭಿಸಿದ್ದಾರೆ.

ಮಧ್ಯಪ್ರಾಚ್ಯದಲ್ಲಿ ಇರಾನ್ ವಿರುದ್ಧದ ಮಿಲಿಟರಿ ಕಾರ್ಯಾಚರಣೆಗಳಲ್ಲಿ ನಿರತವಾಗಿರುವ ಅಮೆರಿಕದ ‘ಯುಎಸ್‌ಎಸ್ ಅಬ್ರಹಾಂ ಲಿಂಕನ್’  ಎನ್ನುವ ಬೃಹತ್ ವಿಮಾನವಾಹಕ ಯುದ್ಧನೌಕೆಯು ಸುಮಾರು 5,000ಕ್ಕೂ ಹೆಚ್ಚು ಸೈನಿಕರು, ನಾವಿಕರು ಮತ್ತು ಪೈಲಟ್‌ಗಳೊಂದಿಗೆ ಥೈಲ್ಯಾಂಡ್‌ಗೆ ಆಗಮಿಸುತ್ತಿದೆ.

ಸುಮಾರು 250 ದಿನಗಳಿಗೂ ಅಧಿಕ ಕಾಲ ಸಮುದ್ರದಲ್ಲೇ ಕಳೆದು ಬಳಲಿರುವ ಈ ಸೈನಿಕರಿಗೆ ಪಟಾಯಾದಲ್ಲಿ ವಿಶ್ರಾಂತಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ. ಸೆಪ್ಟೆಂಬರ್ 2 ರಿಂದ ಸೆಪ್ಟೆಂಬರ್ 6 ರವರೆಗೆ ಈ ನೌಕೆಯು ಲೇಮ್ ಚಬಾಂಗ್ ಬಂದರಿನಲ್ಲಿ நಿಲ್ಲಲಿದೆ.

ಪ್ರವಾಸೋದ್ಯಮಕ್ಕೆ ಆಶಾಭಾವನೆ ಮತ್ತು ಆತಂಕ

ಥೈಲ್ಯಾಂಡಿನಲ್ಲಿ ಕಾನೂನುಬದ್ಧವಾಗಿ ವೇಶ್ಯಾವಾಟಿಕೆಯು ಅಪರಾಧವಾಗಿದ್ದರೂ, ಪಟಾಯಾ ನಗರದಲ್ಲಿ ಇದು ಗುಪ್ತವಾಗಿ ಮತ್ತು ವ್ಯಾಪಕವಾಗಿ ನಡೆಯುತ್ತಿರುತ್ತದೆ. ಅಮೆರಿಕದ ಸೈನಿಕರ ಭೇಟಿಯಿಂದ ಪಟಾಯಾದ ಮಂದಗತಿಯಲ್ಲಿರುವ ಪ್ರವಾಸೋದ್ಯಮ ಹಾಗೂ ಸ್ಥಳೀಯ ವ್ಯಾಪಾರ-ವ್ಯವಹಾರಗಳು ಚೇತರಿಸಿಕೊಳ್ಳಲಿವೆ ಎಂದು ಸ್ಥಳೀಯ ಉದ್ಯಮಿಗಳು ಹಾಗೂ ಮೇಯರ್ ಪೊರಮಾಸೆ ನಂಗಪಿಚೆಸ್ ಭರವಸೆ ವ್ಯಕ್ತಪಡಿಸಿದ್ದಾರೆ. ಪ್ರತಿ ಸೈನಿಕ ಪ್ರತಿದಿನ 1,000 ದಿಂದ 3,000 ಥಾಯ್ ಬಾತ್ ($30 ರಿಂದ $90) ವರೆಗೆ ಖರ್ಚು ಮಾಡುವ ನಿರೀಕ್ಷೆಯಿದೆ.

ಆದರೆ, ಇಷ್ಟೊಂದು ದೊಡ್ಡ ಸಂಖ್ಯೆಯಲ್ಲಿ ಸೈನಿಕರು ನಗರಕ್ಕೆ ಕಾಲಿಡುತ್ತಿರುವುದರಿಂದ ಲೈಂಗಿಕ ಶೋಷಣೆ ಹೆಚ್ಚಾಗುವ ಮತ್ತು ಲೈಂಗಿಕವಾಗಿ ಹಬ್ಬುವ ಕಾಯಿಲೆಗಳು  ವ್ಯಾಪಕವಾಗುವ ಸಾಧ್ಯತೆಯಿದೆ ಎಂದು ತಜ್ಞರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.

ಪೊಲೀಸರ ಕಾರ್ಯಾಚರಣೆ ಮತ್ತು ಕಟ್ಟುನಿಟ್ಟಿನ ನಿಯಮಗಳು

ಈ ಎಲ್ಲ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಎಚ್ಚೆತ್ತಿರುವ ಪಟಾಯಾ ಪೊಲೀಸರು ಬೀಚ್‌ಗಳು ಮತ್ತು ನೈಟ್‌ಕ್ಲಬ್‌ಗಳಲ್ಲಿ ತೀವ್ರ ತಪಾಸಣೆ ನಡೆಸಿದ್ದು, ವೇಶ್ಯಾವಾಟಿಕೆಯಲ್ಲಿ ತೊಡಗಿದ್ದ 18 ಥೈಲ್ಯಾಂಡಿನವರು, 5 ಲಾವೋಸ್ ಹಾಗೂ 2 ಉಗಂಡಾ ಪ್ರಜೆಗಳು ಸೇರಿದಂತೆ ಸುಮಾರು 40 ರಿಂದ 50 ಜನರನ್ನು ಬಂಧಿಸಿದ್ದಾರೆ.

ಅಲ್ಲದೆ, ಆಗಮಿಸುತ್ತಿರುವ ಅಮೆರಿಕದ ಸೈನಿಕರಿಗೆ ರಾತ್ರಿ 2 ಗಂಟೆಯ ನೈಟ್‌ಕ್ಲಬ್ ಕರ್ಫ್ಯೂ ವಿಧಿಸಲಾಗಿದ್ದು, ವಾಣಿಜ್ಯ ಲೈಂಗಿಕ ಸೇವೆಗಳು ಮತ್ತು ಕಾನೂನುಬಾಹಿರ ಚಟುವಟಿಕೆಗಳಿಂದ ದೂರವಿರುವಂತೆ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಲಾಗಿದೆ.