ನೀಟ್ – ಪಿಜಿ ಪರೀಕ್ಷೆಗೆ 2.73 ಲಕ್ಷ ಅಭ್ಯರ್ಥಿಗಳು, ಬಿಗಿ ಭದ್ರತೆ; ಆಧಾರ್, ಬಯೋಮೆಟ್ರಿಕ್ ಕಡ್ಡಾಯ, ಸಿಂಗಲ್ ಶಿಫ್ಟ್‌ನಲ್ಲಿ ಎಕ್ಸಾಂ!

ನವದೆಹಲಿ: ಮುಂಬರುವ ನೀಟ್-ಪಿಜಿ (NEET-PG 2026) ಪರೀಕ್ಷೆಯನ್ನು ಪಾರದರ್ಶಕ ಹಾಗೂ ಅಕ್ರಮ ಮುಕ್ತವಾಗಿ ನಡೆಸಲು ಕೇಂದ್ರ ಸರ್ಕಾರ ಮತ್ತು ವೈದ್ಯಕೀಯ ಪರೀಕ್ಷಾ ಮಂಡಳಿ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಂಡಿದೆ. ಪ್ರಶ್ನೆ ಪತ್ರಿಕೆ ಸೋರಿಕೆ, ನಕಲಿ ಅಭ್ಯರ್ಥಿಗಳ ತಡೆ ಮತ್ತು ಅಕ್ರಮಗಳನ್ನು ಸಂಪೂರ್ಣವಾಗಿ ತಡೆಯುವ ನಿಟ್ಟಿನಲ್ಲಿ ಬಹುಸ್ತರದ ಭದ್ರತಾ ಯೋಜನೆಯನ್ನು ಜಾರಿಗೆ ತರಲಾಗಿದೆ. ಈ ಬಾರಿ ದೇಶಾದ್ಯಂತ ಸುಮಾರು 2.73 ಲಕ್ಷ ಅಭ್ಯರ್ಥಿಗಳು ಪರೀಕ್ಷೆಗೆ ಹಾಜರಾಗಲಿದ್ದಾರೆ.

ಪ್ರಮುಖ ಭದ್ರತಾ ಹಾಗೂ ಹೊಸ ನಿಯಮಗಳು:

ಆಧಾರ್ ಹಾಗೂ ಬಯೋಮೆಟ್ರಿಕ್ ತಪಾಸಣೆ: ಪರೀಕ್ಷಾ ಕೇಂದ್ರಕ್ಕೆ ಪ್ರವೇಶಿಸುವ ಮುನ್ನ ಅಭ್ಯರ್ಥಿಗಳಿಗೆ ಆಧಾರ್ ಆಧಾರಿತ ಗುರುತಿನ ಚೀಟಿ ಪರಿಶೀಲನೆ, ಬೆರಳಚ್ಚು (Fingerprint) ಮತ್ತು ಮುಖ ಗುರುತಿಸುವಿಕೆ (Facial Recognition) ಬಯೋಮೆಟ್ರಿಕ್ ತಪಾಸಣೆಯನ್ನು ಕಡ್ಡಾಯಗೊಳಿಸಲಾಗಿದೆ.

ಸಿಸಿಟಿವಿ ಕಣ್ಣಾವಲು: ಎಲ್ಲಾ ಪರೀಕ್ಷಾ ಕೊಠಡಿಗಳು ಮತ್ತು ಆವರಣಗಳಲ್ಲಿ ಲೈವ್ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದು, ರಿಯಲ್-ಟೈಮ್‌ನಲ್ಲಿ ಕೇಂದ್ರ ನಿಯಂತ್ರಣ ಕೊಠಡಿಯಿಂದ ಮಾನಿಟರ್ ಮಾಡಲಾಗುತ್ತದೆ.

ಒಂದೇ ಶಿಫ್ಟ್‌ನಲ್ಲಿ ಪರೀಕ್ಷೆ: ಅಂಕಗಳ ನಾರ್ಮಲೈಸೇಷನ್ (Normalization) ಸಮಸ್ಯೆಯನ್ನು ತಪ್ಪಿಸಲು ಹಾಗೂ ಸಮಾನತೆಯನ್ನು ಕಾಯ್ದುಕೊಳ್ಳಲು ಪರೀಕ್ಷೆಯನ್ನು ಒಂದೇ ಶಿಫ್ಟ್‌ನಲ್ಲಿ ನಡೆಸಲು ನಿರ್ಧರಿಸಲಾಗಿದೆ.

ಸ್ವಂತ ರಾಜ್ಯದಲ್ಲೇ ಪರೀಕ್ಷಾ ಕೇಂದ್ರ: ಅಭ್ಯರ್ಥಿಗಳು ದೂರದ ನಗರಗಳಿಗೆ ಪ್ರಯಾಣಿಸುವುದನ್ನು ತಪ್ಪಿಸಲು, ಅವರ ಸ್ವಂತ ರಾಜ್ಯ ಅಥವಾ ಸಮೀಪದ ಜಿಲ್ಲೆಗಳಲ್ಲೇ ಪರೀಕ್ಷಾ ಕೇಂದ್ರಗಳನ್ನು ಹಂಚಿಕೆ ಮಾಡಲು ಕ್ರಮ ಕೈಗೊಳ್ಳಲಾಗಿದೆ.

ಡಿಜಿಟಲ್ ಪೇಪರ್ ಸೆಕ್ಯೂರಿಟಿ: ಪ್ರಶ್ನೆ ಪತ್ರಿಕೆಗಳ ಭದ್ರತೆಗಾಗಿ ಎನ್‌ಕ್ರಿಪ್ಟೆಡ್ ಡಿಜಿಟಲ್ ವಿತರಣಾ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ.

ಅತ್ಯಂತ ಭದ್ರತೆಯಿಂದ ಕೂಡಿದ ಈ ಹೊಸ ವ್ಯವಸ್ಥೆಯು ಅಭ್ಯರ್ಥಿಗಳಿಗೆ ಯಾವುದೇ ತೊಂದರೆಯಾಗದಂತೆ ಪರೀಕ್ಷೆ ಬರೆಯಲು ಅನುಕೂಲ ಮಾಡಿಕೊಡಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.