50 ಕೆಜಿ ವಿಷ, 30,000 ಮಾತ್ರೆಗಳು, ಇರಾನ್ ಪ್ರವಾಸ: ಮುಂಬೈನ ಫಯಾಜ್ ಪ್ರೇಮ್‌ಜಿ ‘15,000 ಜನರ ಹತ್ಯೆ’ಯ ಭಯಾನಕ ಸ್ಕೆಚ್ ಡೀಟೈಲ್ಸ್!

ಮುಂಬೈ: ಮಾತ್ರೆಗಳ ರೂಪದಲ್ಲಿ ವಿಷ ನೀಡಿ ಬರೋಬ್ಬರಿ 15,000 ಜನರನ್ನು ಸಾಮೂಹಿಕವಾಗಿ ಕೊಲೆ ಮಾಡಲು ಸಂಚು ರೂಪಿಸಿದ್ದ ಭಯಾನಕ ದೆವ್ವವೊಂದನ್ನು ಮುಂಬೈ ಪೊಲೀಸರು ಮತ್ತು ಆಂಟಿ ಟೆರರಿಸಂ ಸ್ಕ್ವಾಡ್ (ATS) ಅಧಿಕಾರಿಗಳು ಬಂಧಿಸಿದ್ದಾರೆ. ಬಂಧಿತ ಆರೋಪಿಯನ್ನು ಪುಣೆಯ ವಿಮಾನ್ ನಗರದ ನಿವಾಸಿ ಫಯಾಜ್ ಪ್ರೇಮ್‌ಜಿ ಎಂದು ಗುರುತಿಸಲಾಗಿದೆ.

ಮುಂಬೈನಲ್ಲಿ ನಡೆದ ಮೊಹರಂ ಮೆರವಣಿಗೆಯನ್ನು ಗುರಿಯಾಗಿಸಿಕೊಂಡು ಈತ ಈ ಭೀಕರ ಕೃತ್ಯಕ್ಕೆ ಕೈಹಾಕಿದ್ದನು. ಜನರಿಗೆ ಇವು “ನೋವು ನಿವಾರಕಗಳು” ಮತ್ತು “ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಮಾತ್ರೆಗಳು” (Immunity Boosters) ಎಂದು ಸುಳ್ಳು ಹೇಳಿ, ಸ್ವಯಂಸೇವಕರ ಮೂಲಕ ಸಾವಿರಾರು ವಿಷದ ಮಾತ್ರೆಗಳನ್ನು ಹಂಚಲು ಯತ್ನಿಸಿದ್ದಾನೆ. ಸದ್ಯ ಈ ಮಾತ್ರೆಗಳನ್ನು ಸೇವಿಸಿದ ಕನಿಷ್ಠ 11 ಜನರು ತೀವ್ರ ಅಸ್ವಸ್ಥರಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅದೃಷ್ಟವಶಾತ್ ಅವರೆಲ್ಲರೂ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಡೋಂಗ್ರಿಯಲ್ಲಿ ವಿಷದ ಫ್ಯಾಕ್ಟರಿ!

ಪೊಲೀಸ್ ತನಿಖೆಯ ವೇಳೆ ಆರೋಪಿ ಫಯಾಜ್ ಪ್ರೇಮ್‌ಜಿ ಮುಂಬೈನ ಡೋಂಗ್ರಿ ಪ್ರದೇಶದಲ್ಲಿ ಕೋಣೆಯೊಂದನ್ನು ಬಾಡಿಗೆಗೆ ಪಡೆದು ಈ ಸಂಚು ರೂಪಿಸಿರುವುದು ಬೆಳಕಿಗೆ ಬಂದಿದೆ. ಆನ್‌ಲೈನ್ ಮೂಲಕ 50 ಕೆಜಿ ಜಿಂಕ್ ಫಾಸ್ಫೈಡ್ (ಇಲಿ ಪಾಷಾಣಕ್ಕೆ ಬಳಸುವ ರಾಸಾಯನಿಕ) ಹಾಗೂ 30,000 ಖಾಲಿ ಕ್ಯಾಪ್ಸುಲ್‌ಗಳನ್ನು ತರಿಸಿಕೊಂಡಿದ್ದನು. ಕಳೆದ ಕೆಲವು ದಿನಗಳಿಂದ ಈತನೇ ಸ್ವತಃ ಒಂದೊಂದಾಗಿ ಮಾತ್ರೆಗಳಿಗೆ ವಿಷ ತುಂಬಿಸುತ್ತಿದ್ದನು. ಬಂಧನದ ವೇಳೆ ಈತನ ರೂಮಿನಿಂದ 15,000 ಸಿದ್ಧಪಡಿಸಲಾದ ವಿಷದ ಮಾತ್ರೆಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಇರಾನ್, ಇರಾಕ್‌ಗೆ 19 ಬಾರಿ ಭೇಟಿ: ಅಂತಾರಾಷ್ಟ್ರೀಯ ಲಿಂಕ್ ಶಂಕೆ?

ಆರೋಪಿ ಫಯಾಜ್ ಪ್ರೇಮ್‌ಜಿ ಪೇಂಟಿಂಗ್ ಉದ್ಯಮ ನಡೆಸುತ್ತಿದ್ದು, ಈತನ ತಾಯಿ ಮತ್ತು ಸಹೋದರಿ ಇರಾನ್‌ನಲ್ಲಿ ವಾಸಿಸುತ್ತಿದ್ದಾರೆ. ಆದರೆ, ಕಳೆದ 12 ತಿಂಗಳುಗಳಲ್ಲಿ ಈತ ಬರೋಬ್ಬರಿ 19 ಬಾರಿ ಇರಾನ್ ಮತ್ತು ಇರಾಕ್ ದೇಶಗಳಿಗೆ ಭೇಟಿ ನೀಡಿರುವುದು ಪೊಲೀಸರಲ್ಲಿ ತೀವ್ರ ಅನುಮಾನ ಮೂಡಿಸಿದೆ. ಈ ಕೃತ್ಯದ ಹಿಂದೆ ಯಾವುದಾದರೂ ಅಂತಾರಾಷ್ಟ್ರೀಯ ಭಯೋತ್ಪಾದನಾ ಸಂಘಟನೆ ಅಥವಾ ವಿದೇಶಿ ಹ್ಯಾಂಡ್ಲರ್‌ಗಳ ಕೈವಾಡವಿದೆಯೇ ಎಂಬ ನಿಟ್ಟಿನಲ್ಲಿ ಎಟಿಎಸ್ ಮತ್ತು ಕೇಂದ್ರ ತನಿಖಾ ಸಂಸ್ಥೆಗಳು ಈತನ ಬ್ಯಾಂಕ್ ಖಾತೆ ಹಾಗೂ ಡಿಜಿಟಲ್ ಸಂವಹನಗಳನ್ನು ಜಾಲಾಡುತ್ತಿವೆ.

ಜಿಂಕ್ ಫಾಸ್ಫೈಡ್ ಎಷ್ಟು ಅಪಾಯಕಾರಿ?

ಇದು ರೈತರು ಹೊಲದಲ್ಲಿ ಇಲಿಗಳನ್ನು ಸಾಯಿಸಲು ಬಳಸುವ ತೀವ್ರ ತರಹದ ವಿಷವಾಗಿದೆ. ಇದು ಮನುಷ್ಯನ ಹೊಟ್ಟೆ ಸೇರಿದ ತಕ್ಷಣ ಹೈಡ್ರೋಕ್ಲೋರಿಕ್ ಆಮ್ಲದೊಂದಿಗೆ ಪ್ರಕ್ರಿಯೆ ನಡೆಸಿ ‘ಫಾಸ್ಫೀನ್ ಗ್ಯಾಸ್’ ಅನ್ನು ಬಿಡುಗಡೆ ಮಾಡುತ್ತದೆ. ಇದರಿಂದ ದೇಹದ ಪ್ರಮುಖ ಅಂಗಗಳು ಕ್ಷಣಾರ್ಧದಲ್ಲಿ ವೈಫಲ್ಯಗೊಳ್ಳುತ್ತವೆ. ಕೆಲವೇ ನೂರು ಮಿಲಿಗ್ರಾಂ ಜಿಂಕ್ ಫಾಸ್ಫೈಡ್ ಮನುಷ್ಯನ ಪ್ರಾಣ ತೆಗೆಯಲು ಸಾಕಾಗುತ್ತದೆ ಎಂದು ವೈದ್ಯಕೀಯ ಮೂಲಗಳು ತಿಳಿಸಿವೆ. ಸದ್ಯ ಮುಂಬೈ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಚುರುಕುಗೊಳಿಸಿದ್ದಾರೆ.