ಮಧ್ಯಪ್ರದೇಶದಲ್ಲಿ ₹1,200 ಕೋಟಿ ಎಥನಾಲ್ ಅಕ್ಕಿ ಹಗರಣ: ಬಿಜೆಪಿ ವಿರುದ್ಧ ಮಲ್ಲಿಕಾರ್ಜುನ ಖರ್ಗೆ ವಾಗ್ದಾಳಿ!

ನವದೆಹಲಿ: ಮಧ್ಯಪ್ರದೇಶದ ಬಿಜೆಪಿ ಸರ್ಕಾರವು “ಭ್ರಷ್ಟಾಚಾರ ಮತ್ತು ಲೂಟಿಯ ಕೇಂದ್ರಬಿಂದು” ಎಂದು ಕಾಂಗ್ರೆಸ್ ರಾಷ್ಟ್ರೀಯ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಶನಿವಾರ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ರಾಜ್ಯದಲ್ಲಿ ನಡೆದಿರುವ ಎನ್ನಲಾದ ₹1,200 ಕೋಟಿ ಮೌಲ್ಯದ ಎಥನಾಲ್ ಲಿಂಕ್ಡ್ ಅಕ್ಕಿ ಹಗರಣವನ್ನು ಉಲ್ಲೇಖಿಸಿ ಅವರು ಈ ಆರೋಪ ಮಾಡಿದ್ದಾರೆ.

ಮಾಧ್ಯಮ ವರದಿಗಳ ಪ್ರಕಾರ, ಎಥನಾಲ್ ಉತ್ಪಾದನೆಗಾಗಿ ರಿಯಾಯಿತಿ ದರದಲ್ಲಿ ನೀಡಲಾಗಿದ್ದ ಬಲವರ್ಧಿತ (Fortified) ಅಕ್ಕಿಯನ್ನು ಖಾಸಗಿ ಗಿರಣಿ ಮಾಲೀಕರಿಗೆ ಮಾರಿ, ಬಳಿಕ ಅದನ್ನು ಮತ್ತೆ ಸರ್ಕಾರದ ಗೋದಾಮುಗಳಿಗೆ ಮರುಬಳಕೆ (Recycle) ಮಾಡುವ ಮೂಲಕ ಸಾರ್ವಜನಿಕ ವಿತರಣಾ ವ್ಯವಸ್ಥೆಗೆ (PDS) ವಂಚಿಸಲಾಗಿದೆ. ಈ ದೊಡ್ಡ ಜಾಲದ ತನಿಖೆಗಾಗಿ ಮಧ್ಯಪ್ರದೇಶ ಸರ್ಕಾರವು ಈಗಾಗಲೇ ವಿಶೇಷ ತನಿಖಾ ತಂಡವನ್ನು (SIT) ರಚಿಸಿದೆ.

ಮಕ್ಕಳ ಪೌಷ್ಟಿಕಾಂಶದ ಅಕ್ಕಿ ಲೂಟಿ:

ಈ ಕುರಿತು ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಪೋಸ್ಟ್ ಮಾಡಿರುವ ಖರ್ಗೆ, “ಗರ್ಭಿಣಿಯರು, ಅಪೌಷ್ಟಿಕತೆಯಿಂದ ಬಳಲುತ್ತಿರುವ ಮಕ್ಕಳು ಮತ್ತು ಹದಿಹರೆಯದ ಹೆಣ್ಣುಮಕ್ಕಳ ಪೌಷ್ಟಿಕಾಂಶಕ್ಕಾಗಿ ಬಳಸಬೇಕಾಗಿದ್ದ ಅಕ್ಕಿಯನ್ನು ಲಾಭದ ಆಟಕ್ಕಾಗಿ ದಾರಿ ತಪ್ಪಿಸಲಾಗಿದೆ. ರೈಸ್ ಮಿಲ್ಲರ್‌ಗಳು, ಎಥನಾಲ್ ಮಾಫಿಯಾ ಮತ್ತು ಬಿಜೆಪಿ ಸರ್ಕಾರದ ರಕ್ಷಣೆಯಲ್ಲಿ ಸುಮಾರು 5 ಲಕ್ಷ ಮೆಟ್ರಿಕ್ ಟನ್ ಅಕ್ಕಿ ಈ ಭ್ರಷ್ಟ ಆಟದ ಪಾಲಾಗಿದೆ,” ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಪ್ರಧಾನಿ ಮೋದಿ ಮೌನಕ್ಕೆ ಪ್ರಶ್ನೆ:

ಇದೇ ವೇಳೆ ಪ್ರಧಾನಿ ನರೇಂದ್ರ ಮೋದಿ ಅವರ ಮೌನವನ್ನು ಪ್ರಶ್ನಿಸಿರುವ ಖರ್ಗೆ, “ಮೋದಿ-ಶಾ ಜೋಡಿಯು ಅಧಿಕಾರದ ಅಹಂಕಾರದಲ್ಲಿ ಸಾರ್ವಜನಿಕ ಜೀವನದ ಹೊಣೆಗಾರಿಕೆಯನ್ನೇ ತುಳಿದು ಹಾಕಿದೆ” ಎಂದಿದ್ದಾರೆ. ಅಲ್ಲದೆ, ಮುಖ್ಯಮಂತ್ರಿ ಮೋಹನ್ ಯಾದವ್ ಅವರ ಸಂಬಂಧಿಕರ ಹೆಸರಿನಲ್ಲಿ ಉಜ್ಜಯಿನಿಯಲ್ಲಿ ನಡೆದಿದೆ ಎನ್ನಲಾದ ಭೂ ಹಗರಣ, ವ್ಯಾಪಂ ಹಗರಣ ಮತ್ತು ಇತ್ತೀಚಿನ ಪೇಪರ್ ಲೀಕ್ ಪ್ರಕರಣಗಳನ್ನು ನೆನಪಿಸಿರುವ ಅವರು, ಮಧ್ಯಪ್ರದೇಶವನ್ನು ಬಿಜೆಪಿ ‘ಭ್ರಷ್ಟಾಚಾರದ ಮಾದರಿ’ಯನ್ನಾಗಿ ಮಾಡಿದೆ ಎಂದು ಆರೋಪಿಸಿದ್ದಾರೆ.