7 ಲಕ್ಷ ವರದಕ್ಷಿಣೆ ನೀಡಿದ್ರೂ ಕಾರಿಗಾಗಿ ಬೇಡಿಕೆ ಇಟ್ಟು ಇನ್‌ಸ್ಟಾಗ್ರಾಮ್ ಇನ್‌ಫ್ಲುಯೆನ್ಸರ್ ಕೊಲೆ?

ಇತ್ತೀಚೆಗೆ ಸೋಶಿಯಲ್ ಮೀಡಿಯಾ ಪ್ರಭಾವಿಗಳು ಅಥವಾ ಇನ್‌ಫ್ಲುಯೆನ್ಸರ್‌ಗಳ ವರ್ಣರಂಜಿತ ಜಗತ್ತಿನ ಹಿಂದಿರುವ ಇಂತಹ ಕರಾಳ ಮುಖಗಳು ಹೊರಬರುತ್ತಿರುವುದು ನಿಜಕ್ಕೂ ಕಳವಳಕಾರಿ ಸಂಗತಿ. ವರದಕ್ಷಿಣೆ ಎಂಬ ಸಾಮಾಜಿಕ ಪಿಡುಗು ಇಂದಿಗೂ ಸಮಾಜದಲ್ಲಿ ಎಷ್ಟು ಆಳವಾಗಿ ಬೇರೂರಿದೆ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ.

ಲಕ್ನೋ: ಹೊರಗಿನಿಂದ ನೋಡಲು ಸೋಶಿಯಲ್ ಮೀಡಿಯಾದಲ್ಲಿ ಲಕ್ಷಾಂತರ ಫಾಲೋವರ್ಸ್ ಹೊಂದಿದ್ದ ತಾರಾ ಜೋಡಿಯ ಸಂಸಾರದಲ್ಲಿ ವರದಕ್ಷಿಣೆ ಎಂಬ ಪಿಡುಗು ಹೆಣ್ಣಿನ ಬಲಿ ಪಡೆದಿದೆ. ‘ಕಾರು ಬೇಕು’ ಎಂಬ ಪತಿಯ ಮನೆಯವರ ಹೆಚ್ಚುವರಿ ಆಸೆಗೆ ಕಾನ್ಪುರ ಮೂಲದ ಪ್ರಸಿದ್ಧ ಇನ್‌ಫ್ಲುಯೆನ್ಸರ್ ಮಾನಸಿ ಅವರು ಲಕ್ನೋದಲ್ಲಿರುವ ತಮ್ಮ ಪತಿಯ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. ಈ ಘಟನೆ ಇಡೀ ದೇಶಾದ್ಯಂತ ಭಾರಿ ಸಂಚಲನ ಮೂಡಿಸಿದೆ.

7 ಲಕ್ಷ ನಗದು ಕೊಟ್ಟರೂ ತೀರದ ಆಸೆ:

ಕಾನ್ಪುರ ನಿವಾಸಿಯಾಗಿದ್ದ ಮಾನಸಿ ಅವರಿಗೆ 2024 ರಲ್ಲಿ ಇನ್‌ಸ್ಟಾಗ್ರಾಮ್‌ನಲ್ಲಿ ಬರೋಬ್ಬರಿ 8 ಲಕ್ಷ ಫಾಲೋವರ್ಸ್ ಹೊಂದಿರುವ ಸಾಗರ್ ರಾಜ್‌ಪುತ್ ಎಂಬಾತನೊಂದಿಗೆ ಮದುವೆಯಾಗಿತ್ತು. ಮದುವೆ ಸಮಯದಲ್ಲಿ ಮಾನಸಿ ಪೋಷಕರು 7 ಲಕ್ಷ ರೂಪಾಯಿ ನಗದು ಮತ್ತು ಲಕ್ಷಾಂತರ ರೂಪಾಯಿ ಮೌಲ್ಯದ ಗೃಹೋಪಯೋಗಿ ವಸ್ತುಗಳನ್ನು ಉಡುಗೊರೆಯಾಗಿ ನೀಡಿದ್ದರು. ಆದರೆ, ಈ ಐಷಾರಾಮಿ ಜೀವನಕ್ಕೆ ಸಾಗರ್ ರಾಜ್‌ಪುತ್ ಕುಟುಂಬ ತೃಪ್ತನಾಗಿರಲಿಲ್ಲ ಎನ್ನಲಾಗಿದೆ.

ಕಾರಿಗಾಗಿ ದೈಹಿಕ, ಮಾನಸಿಕ ಕಿರುಕುಳ:

ಮದುವೆಯಾದ ದಿನದಿಂದಲೂ ಕಡಿಮೆ ವರದಕ್ಷಿಣೆ ತಂದಿದ್ದಾಳೆ ಎಂದು ಮಾನಸಿಗೆ ಪತಿ ಮತ್ತು ಆತನ ಮನೆಯವರು ಮಾನಸಿಕವಾಗಿ ನಿಂದಿಸುತ್ತಿದ್ದರು. ಅಷ್ಟೇ ಅಲ್ಲದೆ, ಹೆಚ್ಚುವರಿಯಾಗಿ ಒಂದು ಐಷಾರಾಮಿ ಕಾರನ್ನು ತರುವಂತೆ ಪಟ್ಟು ಹಿಡಿದಿದ್ದರು. ಈ ಬೇಡಿಕೆ ಈಡೇರದಿದ್ದಾಗ ಮಾನಸಿ ಮೇಲೆ ತೀವ್ರ ದೈಹಿಕ ಮತ್ತು ಮಾನಸಿಕ ದೌರ್ಜನ್ಯ ಎಸಗಲಾಗುತ್ತಿತ್ತು ಎಂದು ಮೃತಳ ಪೋಷಕರು ಪೊಲೀಸ್ ದೂರಿನಲ್ಲಿ ತಿಳಿಸಿದ್ದಾರೆ. ಈ ಹಿಂದೆ ಹಲವು ಬಾರಿ ಪೋಷಕರು ಲಕ್ನೋಗೆ ಬಂದು ರಾಜಿ ಸಂಧಾನ ನಡೆಸಲು ಪ್ರಯತ್ನಿಸಿದ್ದರು.

ಆತ್ಮಹತ್ಯೆಯೋ? ವ್ಯವಸ್ಥಿತ ಕೊಲೆಯೋ?:

ಶನಿವಾರದಂದು ಮಾನಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಆಕೆಯ ಪೋಷಕರಿಗೆ ಮಾಹಿತಿ ಸಿಕ್ಕಿತ್ತು. ಆದರೆ, “ಇದು ಆತ್ಮಹತ್ಯೆಯಲ್ಲ, ಕಾರು ಕೊಡದಿದ್ದಕ್ಕೆ ನನ್ನ ಮಗಳನ್ನು ಕೊಲೆ ಮಾಡಿ, ಅದನ್ನು ಆತ್ಮಹತ್ಯೆ ಎಂದು ಬಿಂಬಿಸಲು ಶವವನ್ನು ಫ್ಯಾನಿಗೆ ನೇತುಹಾಕಿದ್ದಾರೆ” ಎಂದು ಪೋಷಕರು ಗಂಭೀರ ಆರೋಪ ಮಾಡಿದ್ದಾರೆ.

ಪತಿ ಸಾಗರ್ ಪೊಲೀಸ್ ವಶಕ್ಕೆ:

ಮೃತಳ ಪೋಷಕರ ಲಿಖಿತ ದೂರಿನ ಮೇರೆಗೆ ಲಕ್ನೋ ಪೊಲೀಸರು ವರದಕ್ಷಿಣೆ ಕಿರುಕುಳ ಹಾಗೂ ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಪ್ರಮುಖ ಆರೋಪಿ ಪತಿ ಸಾಗರ್ ರಾಜ್‌ಪುತ್, ಮಾವ ರಾಜೇಶ್, ಮೈದುನ ಅನು, ನಾದಿನಿಯರಾದ ಬರ್ಖಾ, ಚಾಂದಿನಿ ಮತ್ತು ಸೋದರತ್ತೆ ಆಶಾ ಸೇರಿದಂತೆ ಆರು ಜನರ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ. ಸದ್ಯ ಇನ್‌ಸ್ಟಾಗ್ರಾಮ್ ಸ್ಟಾರ್ ಸಾಗರ್ ರಾಜ್‌ಪುತ್‌ನನ್ನು ಪೊಲೀಸರು ವಶಕ್ಕೆ ಪಡೆದು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.

ಇತ್ತೀಚೆಗಷ್ಟೇ ಭೋಪಾಲ್‌ನಲ್ಲಿ ಮಾಡೆಲ್ ಟ್ವಿಶಾ ಶರ್ಮಾ ಅವರ ವರದಕ್ಷಿಣೆ ಸಾವು ಪ್ರಕರಣ ದೇಶಾದ್ಯಂತ ಸದ್ದು ಮಾಡುತ್ತಿರುವ ಬೆನ್ನಲ್ಲೇ, ಲಕ್ನೋದಲ್ಲಿ ಮತ್ತೊಬ್ಬ ಇನ್‌ಫ್ಲುಯೆನ್ಸರ್ ಬಲಿಯಾಗಿರುವುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.