ಕರ್ನಾಟಕದಲ್ಲಿ ಪ್ರತಿ 4 LPG ಸಿಲಿಂಡರ್‌ಗಳಲ್ಲಿ ಒಂದರಲ್ಲಿ ಗ್ಯಾಸ್ ಕಮ್ಮಿ: ‘ಮಿಷನ್ ನಿಖರ’ ದಾಳಿಯಲ್ಲಿ ಆಘಾತಕಾರಿ ಸತ್ಯ ಬಹಿರಂಗ!

ಬೆಂಗಳೂರು / ನವದೆಹಲಿ: ಕರ್ನಾಟಕದಲ್ಲಿ ಗ್ರಾಹಕರಿಗೆ ನಿಖರವಾದ ಪ್ರಮಾಣದ ಅಡುಗೆ ಅನಿಲ ದೊರೆಯುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಆಹಾರ, ನಾಗರಿಕ ಸರಬರಾಜು ಮತ್ತು ಗ್ರಾಹಕ ವ್ಯವಹಾರಗಳ ಸಚಿವ ರಿಜ್ವಾನ್ ಅರ್ಷದ್ ಅವರ ಮಾರ್ಗದರ್ಶನದಲ್ಲಿ ‘ಮಿಷನ್ ನಿಖರ’ ಅಭಿಯಾನವನ್ನು ನಡೆಸಲಾಯಿತು. ಈ ಯೋಜನೆಯಡಿ ಕಾನೂನು ಮಾಪನಶಾಸ್ತ್ರ ಇಲಾಖೆಯು ರಾಜ್ಯದಾದ್ಯಂತ ಎಲ್‌ಪಿಜಿ ಬಾಟ್ಲಿಂಗ್ ಘಟಕಗಳ ಮೇಲೆ ದಿಢೀರ್ ಪರಿಶೀಲನೆ ನಡೆಸಿದೆ.

ಪ್ರಮುಖ ಮುಖ್ಯಾಂಶಗಳು ಮತ್ತು ತಪಾಸಣೆಯ ವಿವರ:

ಒಟ್ಟು ಪರಿಶೀಲನೆ: ಸೆಪ್ಟೆಂಬರ್ 24 ರಂದು ರಾಜ್ಯದ 17 ಕಾರ್ಯನಿರತ ಬಾಟ್ಲಿಂಗ್ ಘಟಕಗಳ ಮೇಲೆ ದಾಳಿ ನಡೆಸಿ, ಒಟ್ಟು 1,530 ಭರ್ತಿ ಮಾಡಿದ ಎಲ್‌ಪಿಜಿ ಸಿಲಿಂಡರ್‌ಗಳನ್ನು ತೂಕ ಮಾಡಲಾಯಿತು.

25% ಸಿಲಿಂಡರ್‌ಗಳಲ್ಲಿ ಗ್ಯಾಸ್ ಕಡಿಮೆ: ಪರಿಶೀಲಿಸಿದ ಒಟ್ಟು ಸಿಲಿಂಡರ್‌ಗಳಲ್ಲಿ 382 ಸಿಲಿಂಡರ್‌ಗಳು (ಶೇ. 25%) ಘೋಷಿತ ಪ್ರಮಾಣಕ್ಕಿಂತ ಕಡಿಮೆ ಗ್ಯಾಸ್ ಹೊಂದಿದ್ದವು. ಆದರೆ, ಈ ವ್ಯತ್ಯಾಸವು ಕಾನೂನುಬದ್ಧವಾಗಿ ಅನುಮತಿಸಲಾದ ದೋಷದ ಮಿತಿಯೊಳಗಿತ್ತು.

ಹೆಚ್ಚುವರಿ ಮತ್ತು ನಿಖರ ಪ್ರಮಾಣ:

943 ಸಿಲಿಂಡರ್‌ಗಳು (ಶೇ. 61.6): ನಿಗದಿತ ಪ್ರಮಾಣಕ್ಕಿಂತ ಹೆಚ್ಚಿನ ಗ್ಯಾಸ್ ಹೊಂದಿದ್ದವು.

205 ಸಿಲಿಂಡರ್‌ಗಳು (ಶೇ. 13.4): ಸರಿಯಾಗಿ ನಿಖರ ಪ್ರಮಾಣವನ್ನು ಹೊಂದಿದ್ದವು.

ದಂಡ ಮತ್ತು ಪ್ರಕರಣ ದಾಖಲು: ತಪಾಸಣೆ ವೇಳೆ ನಿಯಮ ಉಲ್ಲಂಘಟನೆ ಕಂಡುಬಂದ ಹಿನ್ನೆಲೆಯಲ್ಲಿ ಇಲಾಖೆಯು 3 ಪ್ರಕರಣಗಳನ್ನು ದಾಖಲಿಸಿಕೊಂಡಿದ್ದು, ಒಟ್ಟು ₹79,000 ದಂಡ ವಸೂಲಿ ಮಾಡಿದೆ.

ಯಾವ ಕಂಪನಿಗಳ ಘಟಕಗಳು?: ಬಿಪಿಸಿಎಲ್ (BPCL – 4), ಎಚ್‌ಪಿಸಿಎಲ್ (HPCL – 4), ಐಒಸಿಎಲ್ (IOCL – 4), ಟೋಟಲ್ ಎನರ್ಜೀಸ್ (TotalEnergies – 2) ಹಾಗೂ 3 ಖಾಸಗಿ ಬಾಟ್ಲಿಂಗ್ ಘಟಕಗಳನ್ನು ಪರಿಶೀಲಿಸಲಾಯಿತು.

ಗ್ರಾಹಕರಿಗೆ ನೀಡಲಾದ ಮಹತ್ವದ ಸೂಚನೆಗಳು:

ಸಿಲಿಂಡರ್ ತೂಕ ಮಾಡಲು ಕೇಳುವ ಹಕ್ಕು: ವಿತರಣಾ ಸಿಬ್ಬಂದಿಯು ತೂಕದ ಯಂತ್ರವನ್ನು (Weighing Scale) ತರುವುದು ಕಡ್ಡಾಯವಾಗಿದೆ. ಗ್ರಾಹಕರು ಸಿಲಿಂಡರ್ ಪಡೆಯುವ ಮೊದಲು ಅದನ್ನು ತೂಕ ಮಾಡಿ ನೀಡುವಂತೆ ವಿತರಣಾ ಸಿಬ್ಬಂದಿಗೆ ಕೇಳಬಹುದು.

ದೂರು ನೀಡಲು ಹೆಲ್ಪ್‌ಲೈನ್: ಸಿಲಿಂಡರ್‌ನಲ್ಲಿ ಗ್ಯಾಸ್ ಕಡಿಮೆ ಇದೆ ಎಂಬ ಸಂಶಯ ಬಂದರೆ ಅಥವಾ ತೂಕ ಮಾಡಲು ನಿರಾಕರಿಸಿದರೆ ಕಾನೂನು ಮಾಪನಶಾಸ್ತ್ರ ಇಲಾಖೆಯ ಉಚಿತ ಸಹಾಯವಾಣಿ ಸಂಖ್ಯೆ 1800 599 1100 ಗೆ ಕರೆ ಮಾಡಿ ದೂರು ನೀಡಬಹುದು.