ಸಿಸಿಟಿವಿಯಲ್ಲಿ ಭಯಾನಕ ದೃಶ್ಯ, ಪ್ರೇಮಾನಂದ ಮಹಾರಾಜ್ ಶಿಷ್ಯ ರಸಿಕ್ ದುಲಾರಿ ಶರಣ್ ಅನುಮಾನಾಸ್ಪದ ಸಾವಿಗೆ ಟ್ವಿಸ್ಟ್: ಖಾಸಗಿ ಭಾಗಕ್ಕೆ ಗಾಯ, ಕೊಠಡಿಯಲ್ಲಿ ಸಿಕ್ಕ ಗ್ರೈಂಡರ್ ಯಾರದ್ದು?

ಮಥುರಾ/ವೃಂದಾವನ: ಉತ್ತರ ಪ್ರದೇಶದ ವೃಂದಾವನದಲ್ಲಿ ಖ್ಯಾತ ಆಧ್ಯಾತ್ಮಿಕ ಗುರು ಸಂತ ಪ್ರೇಮಾನಂದ ಮಹಾರಾಜರ ಶಿಷ್ಯ ದೀಪಕ್ ಲೋಧಿ ಅವರು ದೀಕ್ಷೆಯ ನಂತರ ‘ರಸಿಕ್ ದುಲಾರಿ ಶರಣ್’ ಆಗಿದ್ದು, ಅವರ ಅನುಮಾನಾಸ್ಪದ ಸಾವು ತೀವ್ರ ಕುತೂಹಲ ಮತ್ತು ಅನುಮಾನಗಳಿಗೆ ಕಾರಣವಾಗಿದೆ.

ಉತ್ತರ ಪ್ರದೇಶದ ಮಥುರಾದ ವೃಂದಾವನದಲ್ಲಿರುವ ಗುರು ಕೃಪಾ ಕುಂಜ ಆಶ್ರಮದ 4ನೇ ಮಹಡಿಯಿಂದ ಜಿಗಿದು ರಸಿಕ್ ದುಲಾರಿ ಶರಣ್ ಸಾವನ್ನಪ್ಪಿದ್ದು, ಪೊಲೀಸರು ಇದನ್ನು ಪ್ರಾಥಮಿಕವಾಗಿ ಆತ್ಮಹತ್ಯೆ ಎಂದು ಪರಿಗಣಿಸಿದ್ದಾರೆ. ಆದರೆ, ಅವರು ಕಟ್ಟಡದಿಂದ ಜಿಗಿಯುವ ಮೊದಲು ನಡೆದ ಘಟನೆಗಳು ಅನುಮಾನಕ್ಕೆ ಕಾರಣವಾಗಿವೆ.

CCTVಯಲ್ಲಿ ಸೆರೆಯಾದ ದೃಶ್ಯಗಳು:

ಸಿಸಿಟಿವಿ (CCTV) ಪರಿಶೀಲನೆ ನಡೆಸಿದಾಗ ರಸಿಕ್ ದುಲಾರಿ ಶರಣ್ ಅವರು ಬೆಳಿಗ್ಗೆ 10:25 ರ ಸುಮಾರಿಗೆ ತಮ್ಮ ಕೊಠಡಿಯಿಂದ ಹೊರಬಂದಿದ್ದರು. ಆ ವೇಳೆ ಅವರ ಬಟ್ಟೆಗಳು ರಕ್ತಸಿಕ್ತವಾಗಿದ್ದವು. ನಂತರ 3ನೇ ಮಹಡಿಯಿಂದ 4ನೇ ಮಹಡಿಯ ಟೆರೇಸ್‌ಗೆ ತೆರಳಿ, ಕೆಲ ಕಾಲ ಅಲ್ಲಿ ಕುಳಿತು ಮತ್ತು ಮಲಗಿಕೊಂಡ ನಂತರ ಬೆಳಿಗ್ಗೆ 10:36 ಕ್ಕೆ ದಿಢೀರನೆ ಕೆಳಗೆ ಜಿಗಿದಿದ್ದಾರೆ.

ಕೊಠಡಿಯಲ್ಲಿ ಗ್ರೈಂಡರ್ ಹಾಗೂ ಖಾಸಗಿ ಭಾಗಕ್ಕೆ ಗಾಯ:

ಪೋಲಿಸ್ ತನಿಖೆಯ ವೇಳೆ ಅವರ ಕೊಠಡಿಯಲ್ಲಿ ಟೈಲ್ಸ್ ಕತ್ತರಿಸುವ ಗ್ರೈಂಡರ್ (Grinder) ಪತ್ತೆಯಾಗಿದೆ. ಸಾವು ಸಂಭವಿಸುವ ಮೊದಲು ಅವರ ಖಾಸಗಿ ಭಾಗಕ್ಕೆ (Private part) ಗಂಭೀರ ಗಾಯಗಳಾಗಿದ್ದವು ಎಂಬ ಆಘಾತಕಾರಿ ಸಂಗತಿ ಹೊರಬಿದ್ದಿದೆ. ಕಟ್ಟಡದಿಂದ ಬೀಳುವ ಮುನ್ನವೇ ರಕ್ತಸ್ರಾವವಾಗುತ್ತಿದ್ದುದ್ದು ಹಾಗೂ ಖಾಸಗಿ ಭಾಗಕ್ಕೆ ಗಾಯವಾಗಿದ್ದು ಹೇಗೆ ಎಂಬ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಡಿಜಿಟಲ್ ಪುರಾವೆ ಹಾಗೂ ಫೋರೆನ್ಸಿಕ್ ತನಿಖೆ:

ಅವರ ಮೊಬೈಲ್ ಫೋನ್ ಅನ್ನು ಫೋರೆನ್ಸಿಕ್ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದ್ದು, ಘಟನೆಗೂ ಮುನ್ನ ಡಿಲೀಟ್ ಮಾಡಲಾದ ಚಾಟ್‌ಗಳು, ವೀಡಿಯೊಗಳು ಅಥವಾ ಫೋಟೋಗಳನ್ನು ಮರುಪಡೆಯಲು (Data Recovery) ಪೊಲೀಸರು ಪ್ರಯತ್ನಿಸುತ್ತಿದ್ದಾರೆ. ಸಾವು ಅತಿಯಾದ ರಕ್ತಸ್ರಾವದಿಂದ ಸಂಭವಿಸಿದೆ ಎಂದು ಮರಣೋತ್ತರ ಪರೀಕ್ಷೆಯ (Post-mortem) ವರದಿ ತಿಳಿಸಿದೆ.

ಉನ್ನತ ಮಟ್ಟದ ತನಿಖೆಗೆ ಸಂತ ಸಮೂಹದ ಆಗ್ರಹ:

ಈ ಘಟನೆಯ ನಂತರ ವೃಂದಾವನದ ಸ್ಥಳೀಯ ಸಾಧು-ಸಂತರು ಹಾಗೂ ಮೃತ ಸನ್ಯಾಸಿಯ ಕುಟುಂಬಸ್ಥರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಘಟನೆಯ ಕುರಿತು ಉನ್ನತ ಮಟ್ಟದ (CBI ಅಥವಾ SIT) ತನಿಖೆಗೆ ಒತ್ತಾಯಿಸಿದ್ದಾರೆ.