ಯುವ ನಿರುದ್ಯೋಗ ದರ ಶೇ. 16.2ಕ್ಕೆ ಜಿಗಿತ: ನಗರ ಹಾಗೂ ಗ್ರಾಮೀಣ ಭಾರತದಲ್ಲಿ ಉದ್ಯೋಗ ಸಿಗುವುದು ಇಷ್ಟೊಂದು ಕಷ್ಟವೇ? ಪಿಎಲ್‌ಎಫ್‌ಎಸ್ ಸರ್ವೇಯ ಆಘಾತ ವರದಿ!

ನವದೆಹಲಿ: ಭಾರತದ ಆರ್ಥಿಕತೆ, ರಾಜಕೀಯ ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ Gen Z ಯುವಸಮೂಹದ ಸಕ್ರಿಯ ಪಾಲ್ಗೊಳ್ಳುವಿಕೆ ಹೆಚ್ಚುತ್ತಿದ್ದರೂ, ಕೆಲಸ ಹುಡುಕುವ ವಿಚಾರದಲ್ಲಿ ಯುವಜನರಿಗೆ ಹಿನ್ನಡೆಯಾಗುತ್ತಿದೆ. ಕೇಂದ್ರ ಸರ್ಕಾರದ ಇತ್ತೀಚಿನ ಆವರ್ತಕ ಕಾರ್ಮಿಕ ಬಲ ಸಮೀಕ್ಷೆ (PLFS) ಬಿಡುಗಡೆ ಮಾಡಿರುವ ಅಂಕಿಅಂಶಗಳ ಪ್ರಕಾರ, 15 ರಿಂದ 29 ವರ್ಷದೊಳಗಿನ ಯುವಕ-ಯುವತಿಯರಲ್ಲಿ ನಿರುದ್ಯೋಗ ಪ್ರಮಾಣವು ಕಳವಳಕಾರಿ ರೀತಿಯಲ್ಲಿ ಹೆಚ್ಚುತ್ತಿದೆ.

ವರದಿಯ ಪ್ರಕಾರ, 2026ರ ಜೂನ್ ವೇಳೆಗೆ 15–29 ವಯೋಮಾನದ ಯುವಜನರ ನಿರುದ್ಯೋಗ ದರವು ಶೇಕಡಾ 16.2 ಕ್ಕೆ ತಲುಪಿದ್ದು, ಇದು ಕಳೆದ 15 ತಿಂಗಳುಗಳಲ್ಲೇ ಅತ್ಯಂತ ಗರಿಷ್ಠ ಮಟ್ಟವಾಗಿದೆ. ಅಂದರೆ, ಉದ್ಯೋಗಕ್ಕಾಗಿ ಸಕ್ರಿಯವಾಗಿ ಹುಡುಕಾಟ ನಡೆಸುತ್ತಿರುವ ಪ್ರತಿ ಆರು ಯುವಕರಲ್ಲಿ ಒಬ್ಬರಿಗೆ ಕೆಲಸ ಸಿಗುತ್ತಿಲ್ಲ.

ನಗರ ಮತ್ತು ಗ್ರಾಮೀಣ ನಡುವಿನ ಅಂತರ:

ನಗರ ಪ್ರದೇಶದ ಯುವಜನರಲ್ಲಿ ನಿರುದ್ಯೋಗ ದರವು ಶೇ. 18.2 ರಷ್ಟಿದ್ದರೆ, ಗ್ರಾಮೀಣ ಭಾಗದಲ್ಲಿ ಶೇ. 15.1 ರಷ್ಟಿದೆ. ಗ್ರಾಮೀಣ ಭಾಗದಲ್ಲೂ ನಿರುದ್ಯೋಗ ಕ್ರಮೇಣ ಏರಿಕೆಯಾಗುತ್ತಿರುವುದು ವರದಿಯಲ್ಲಿ ತಿಳಿದುಬಂದಿದೆ.

ಮಹಿಳೆಯರ ಮೇಲೆ ತೀವ್ರ ಪರಿಣಾಮ:

ಈ ಸಮೀಕ್ಷೆಯಲ್ಲಿ ಕಂಡುಬಂದ ಅತ್ಯಂತ ಕಳವಳಕಾರಿ ಸಂಗತಿಯೆಂದರೆ ಪುರುಷರು ಮತ್ತು ಮಹಿಳೆಯರ ನಡುವಿನ ಉದ್ಯೋಗ ವ್ಯತ್ಯಾಸ. 2026ರ ಜೂನ್ ವೇಳೆಗೆ ಯುವತಿಯರಲ್ಲಿ ನಿರುದ್ಯೋಗ ಪ್ರಮಾಣವು ಶೇ. 20.7 ಕ್ಕೆ ಏರಿಕೆಯಾಗಿದ್ದರೆ, ಯುವಕರಲ್ಲಿ ಈ ಪ್ರಮಾಣ ಶೇ. 14.6 ರಷ್ಟಿದೆ. ಉದ್ಯೋಗ ಮಾರುಕಟ್ಟೆಗೆ ಪ್ರತಿವರ್ಷ ಲಕ್ಷಾಂತರ ಯುವಕರು ಸೇರ್ಪಡೆಯಾಗುತ್ತಿದ್ದು, ಅವರಿಗೆ ಸೂಕ್ತ ಉದ್ಯೋಗಾವಕಾಶ ಸೃಷ್ಟಿಸುವುದು ಪ್ರಸ್ತುತ ದೇಶದ ಎದುರಿಗಿರುವ ಪ್ರಮುಖ ಸವಾಲಾಗಿದೆ.