19 ವರ್ಷ ಕಿರಿಯ ಗಾಯಕಿಯೊಂದಿಗೆ ಭಾರತೀಯ ಮೂಲದ ಎಫ್‌ಬಿಐ ಮುಖ್ಯಸ್ಥ ಕಾಶ್ ಪಟೇಲ್ ಎಂಗೇಜ್‌ಮೆಂಟ್: ಇನ್‌ಸ್ಟಾಗ್ರಾಮ್‌ನಲ್ಲಿ ಉಂಗುರ ಪ್ರದರ್ಶಿಸಿದ ಅಲೆಕ್ಸಿಸ್!

ವಾಷಿಂಗ್ಟನ್: ಅಮೆರಿಕದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (FBI) ನಿರ್ದೇಶಕ, ಭಾರತೀಯ ಮೂಲದ ಕಾಶ್ ಪಟೇಲ್ (46) ಹಾಗೂ ಪ್ರಸಿದ್ಧ ಕಂಟ್ರಿ ಮ್ಯೂಸಿಕ್ ಗಾಯಕಿ ಅಲೆಕ್ಸಿಸ್ ವಿಲ್ಕಿನ್ಸ್ (27) ತಮ್ಮ ನಿಶ್ಚಿತಾರ್ಥವನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ.

ತಮಗಿಂತ 19 ವರ್ಷ ಕಿರಿಯರಾದ ಅಲೆಕ್ಸಿಸ್ ಅವರೊಂದಿಗೆ ವಜ್ರದ ಉಂಗುರ ಧರಿಸಿರುವ ಫೋಟೋವನ್ನು ಶೇರ್ ಮಾಡಿಕೊಂಡಿರುವ ಜೋಡಿ, ಸಾಮಾಜಿಕ ಜಾಲತಾಣಗಳಲ್ಲಿ ಶುಭ ಸುದ್ದಿಯನ್ನು ಹಂಚಿಕೊಂಡಿದೆ. ಫೋಟೋಗೆ “ಕಾನೂನನ್ನೇ ನನ್ನ ಕಡೆಗೆ ತಂದುಕೊಂಡೆ” ಎಂದು ಅಲೆಕ್ಸಿಸ್ ತಮಾಷೆಯಾಗಿ ಶೀರ್ಷಿಕೆ ನೀಡಿದ್ದು, ಕಾಶ್ ಪಟೇಲ್ ಅದನ್ನು ಹಾರ್ಟ್ ಮತ್ತು ರಿಂಗ್ ಎಮೋಜಿಗಳೊಂದಿಗೆ ಮರುಪೋಸ್ಟ್ ಮಾಡಿದ್ದಾರೆ.

ಪರಿಚಯ ಮತ್ತು ಪ್ರೀತಿ

ಇಬ್ಬರೂ 2022ರಲ್ಲಿ ನ್ಯಾಶ್‌ವಿಲ್‌ನಲ್ಲಿ ನಡೆದ ಸ್ನೇಹಿತರ ಕಾರ್ಯಕ್ರಮವೊಂದರಲ್ಲಿ ಪ್ರಥಮ ಬಾರಿಗೆ ಭೇಟಿಯಾಗಿದ್ದರು. ನಂತರ 2023ರಿಂದ ಪರಸ್ಪರ ಪ್ರೀತಿಸಲು ಆರಂಭಿಸಿದ ಇವರು, ಹಲವು ಸಾರ್ವಜನಿಕ ಕಾರ್ಯಕ್ರಮಗಳು ಹಾಗೂ ಕಾಶ್ ಪಟೇಲ್ ಅವರ ಎಫ್‌ಬಿಐ ಪದಗ್ರಹಣ ಸಮಾರಂಭದಲ್ಲೂ ಒಟ್ಟಿಗೆ ಕಾಣಿಸಿಕೊಂಡಿದ್ದರು.

ಸರ್ಕಾರಿ ವಿಮಾನ ದುರ್ಬಳಕೆ ಆರೋಪ ಮತ್ತು ವಿವಾದ 

ಫೆಬ್ರವರಿ 2025ರಲ್ಲಿ ಕಾಶ್ ಪಟೇಲ್ ಎಫ್‌ಬಿಐ ಮುಖ್ಯಸ್ಥರಾಗಿ ಅಧಿಕಾರ ವಹಿಸಿಕೊಂಡ ನಂತರ, ತಮ್ಮ ವೈಯಕ್ತಿಕ ಪ್ರವಾಸಗಳಿಗೆ ಮತ್ತು ಗೆಳತಿಯ ಕಾರ್ಯಕ್ರಮಗಳಿಗೆ ಸರ್ಕಾರಿ ವಿಮಾನಗಳನ್ನು ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು:

ಸಂಗೀತ ಕಚೇರಿ ಪ್ರವಾಸ (ಮೇ 2025): ವಾಷಿಂಗ್ಟನ್‌ನಿಂದ ಫಿಲಡೆಲ್ಫಿಯಾಗೆ ತೆರಳಲು ಎಫ್‌ಬಿಐ ಗಲ್ಫ್‌‌ಸ್ಟ್ರೀಮ್ ವಿಮಾನ ಬಳಸಿದ್ದು, ಅಲ್ಲಿ ಸುಮಾರು $35,000 ದಿಂದ $50,000 ಮೌಲ್ಯದ ವಿಐಪಿ ಸೂಟ್‌ನಲ್ಲಿ ಸಂಗೀತ ಕಚೇರಿ ವೀಕ್ಷಿಸಿದ್ದರು. ಈ ವೇಳೆ ಎಫ್‌ಬಿಐ ಭದ್ರತಾ ಸಿಬ್ಬಂದಿ ತಡರಾತ್ರಿಯವರೆಗೂ ಕಾಯಬೇಕಾಗಿ ಬಂದಿತ್ತು.

ವಿಶ್ವವಿದ್ಯಾಲಯ ಕಾರ್ಯಕ್ರಮ (ನವೆಂಬರ್ 2025): ಪೆನ್ ಸ್ಟೇಟ್ ಯೂನಿವರ್ಸಿಟಿಯಲ್ಲಿ ನಡೆದ ಅಲೆಕ್ಸಿಸ್ ಅವರ ಗಾಯನ ಕಾರ್ಯಕ್ರಮಕ್ಕೆ ತೆರಳಲು ಎಫ್‌ಬಿಐ ವಿಮಾನ ಬಳಸಲಾಗಿತ್ತು.

ಪಾಡ್‌ಕಾಸ್ಟ್ ವಿವಾದ (ಡಿಸೆಂಬರ್ 2025): ಬ್ರೌನ್ ಯೂನಿವರ್ಸಿಟಿ ಗುಂಡಿನ ದಾಳಿಯ ಆರೋಪಿಯ ಹುಡುಕಾಟ ನಡೆಯುತ್ತಿದ್ದ ಸಂದರ್ಭದಲ್ಲೇ, ಜೋಡಿ ತಮ್ಮ ಪ್ರೇಮ ಜೀವನದ ಕುರಿತು ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡಿದ್ದು ತೀವ್ರ ಟೀಕೆಗೆ ಗುರಿಯಾಗಿತ್ತು.

ಎಫ್‌ಬಿಐ ಹಾಗೂ ಕಾಶ್ ಪಟೇಲ್ ಸ್ಪಷ್ಟನೆ 

ಈ ವಿವಾದಗಳ ಕುರಿತು ಸ್ಪಷ್ಟನೆ ನೀಡಿದ್ದ ಎಫ್‌ಬಿಐ, “ಸುರಕ್ಷತಾ ನಿಯಮಾವಳಿಗಳ ಪ್ರಕಾರ ಎಫ್‌ಬಿಐ ನಿರ್ದೇಶಕರು ವೈಯಕ್ತಿಕ ಪ್ರವಾಸಗಳಿಗೂ ಎಫ್‌ಬಿಐ ವಿಮಾನವನ್ನೇ ಬಳಸುವುದು ಕಡ್ಡಾಯವಾಗಿದೆ. ಆದರೆ, ಈ ವೈಯಕ್ತಿಕ ಪ್ರಯಾಣದ ವೆಚ್ಚವನ್ನು ಅವರು ಮುಂಗಡವಾಗಿಯೇ ಸರ್ಕಾರಕ್ಕೆ ಪಾವತಿಸಿದ್ದಾರೆ” ಎಂದು ತಿಳಿಸಿತ್ತು.

ತಮ್ಮ ಮೇಲಿನ ಆರೋಪಗಳನ್ನು ತಳ್ಳಿಹಾಕಿದ್ದ ಕಾಶ್ ಪಟೇಲ್, “ನನ್ನ ಜೀವನದ ಸಂಗಾತಿ ಹಾಗೂ ದೇಶಪ್ರೇಮಿಯಾಗಿರುವ ಅಲೆಕ್ಸಿಸ್ ಮೇಲಿನ ವಿನಾಕಾರಣದ ದಾಳಿಗಳು ರಾಜಕೀಯ ಪ್ರೇರಿತ ಮತ್ತು ಆಧಾರರಹಿತ” ಎಂದು ತಿರುಗೇಟು ನೀಡಿದ್ದರು.