NMC MBBS Seats 2026: ಕರ್ನಾಟಕಕ್ಕೆ ಭಾರಿ ಬಂಪರ್: ರಾಜ್ಯದಲ್ಲಿ 1,650 ಹೊಸ ಎಂ.ಬಿ.ಬಿ.ಎಸ್ ಸೀಟುಗಳ ಸೇರ್ಪಡೆ!

ನವದೆಹಲಿ: ವೈದ್ಯಕೀಯ ಶಿಕ್ಷಣ ಪಡೆಯಲು ಬಯಸುವ ಅಭ್ಯರ್ಥಿಗಳಿಗೆ ರಾಷ್ಟ್ರೀಯ ವೈದ್ಯಕೀಯ ಆಯೋಗವು (NMC) ಸಿಹಿ ಸುದ್ದಿ ನೀಡಿದೆ. 2026-27ನೇ ಶೈಕ್ಷಣಿಕ ಸಾಲಿನ ನೀಟ್ ಯುಜಿ (NEET UG) ಕೌನ್ಸಿಲಿಂಗ್ ಪ್ರಕ್ರಿಯೆಯ ಮಧ್ಯದಲ್ಲೇ ಎನ್‌ಎಮ್‌ಸಿ ದೇಶಾದ್ಯಂತ ಒಟ್ಟು 13,186 ಹೊಸ ಎಂ.ಬಿ.ಬಿ.ಎಸ್ (MBBS) ಸೀಟುಗಳನ್ನು ಹೆಚ್ಚಿಸಿದೆ. ಇದರೊಂದಿಗೆ ದೇಶದ ಒಟ್ಟು ಎಂ.ಬಿ.ಬಿ.ಎಸ್ ಸೀಟುಗಳ ಸಂಖ್ಯೆ 836 ವೈದ್ಯಕೀಯ ಕಾಲೇಜುಗಳಲ್ಲಿ 1,40,214 ಕ್ಕೆ ಏರಿಕೆಯಾಗಿದೆ.

ಕರ್ನಾಟಕಕ್ಕೇ ಸಿಕ್ಕಿತು ಗರಿಷ್ಠ ಪಾಲು:

ಹೊಸ ಸೀಟುಗಳ ಹಂಚಿಕೆಯಲ್ಲಿ ಕರ್ನಾಟಕ ರಾಜ್ಯವು ದೇಶದಲ್ಲೇ ಮೊದಲ ಸ್ಥಾನದಲ್ಲಿದೆ. ಕರ್ನಾಟಕಕ್ಕೆ ಬರೋಬ್ಬರಿ 1,650 ಹೊಸ ಎಂ.ಬಿ.ಬಿ.ಎಸ್ ಸೀಟುಗಳು ಮಂಜೂರಾಗಿದ್ದು, ರಾಜ್ಯದ ಒಟ್ಟು ಸೀಟುಗಳ ಸಂಖ್ಯೆ 76 ಕಾಲೇಜುಗಳಲ್ಲಿ 15,745 ಕ್ಕೆ ತಲುಪಿದೆ. ಕರ್ನಾಟಕದ ನಂತರ ತಮಿಳುನಾಡು (1,250 ಸೀಟುಗಳು), ಬಿಹಾರ (1,240 ಸೀಟುಗಳು) ಹಾಗೂ ಉತ್ತರ ಪ್ರದೇಶ (1,200 ಸೀಟುಗಳು) ಹೆಚ್ಚಿನ ಸೀಟುಗಳನ್ನು ಪಡೆದುಕೊಂಡಿವೆ.

ಖಾಸಗಿ ಕಾಲೇಜುಗಳಲ್ಲೇ ಸಿಂಹಪಾಲು:

ಈ ಬಾರಿಯ ಸೀಟು ಹೆಚ್ಚಳದಲ್ಲಿ ಖಾಸಗಿ ವೈದ್ಯಕೀಯ ಕಾಲೇಜುಗಳ ಕೊಡುಗೆ ಶೇ. 79 ರಷ್ಟಿದೆ.

ಖಾಸಗಿ ಕಾಲೇಜುಗಳು: 391 ಖಾಸಗಿ ಕಾಲೇಜುಗಳಲ್ಲಿ 10,400 ಹೊಸ ಸೀಟುಗಳನ್ನು ಸೇರಿಸಲಾಗಿದ್ದು, ಒಟ್ಟು ಖಾಸಗಿ ಸೀಟುಗಳ ಸಂಖ್ಯೆ 76,243 ಕ್ಕೆ ಏರಿದೆ.

ಸರ್ಕಾರಿ ಕಾಲೇಜುಗಳು: 445 ಸರ್ಕಾರಿ ಕಾಲೇಜುಗಳಲ್ಲಿ 2,786 ಹೊಸ ಸೀಟುಗಳನ್ನು ಹೆಚ್ಚಿಸಲಾಗಿದ್ದು, ಒಟ್ಟು ಸರ್ಕಾರಿ ಸೀಟುಗಳ ಸಂಖ್ಯೆ 63,971 ಕ್ಕೆ ತಲುಪಿದೆ.

ಪ್ರಸ್ತುತ ನೀಟ್ ಯುಜಿ ಎರಡನೇ ಸುತ್ತಿನ (Round 2) ಕೌನ್ಸಿಲಿಂಗ್ ಪ್ರಕ್ರಿಯೆ ನಡೆಯುತ್ತಿದ್ದು, ಹೊಸ ಸೀಟ್‌ ಮ್ಯಾಟ್ರಿಕ್ಸ್ ಬಿಡುಗಡೆಯಾಗಿರುವುದರಿಂದ ಕಟ್-ಆಫ್ ಅಂಕಗಳಲ್ಲಿ ಬದಲಾವಣೆಯಾಗುವ ಸಾಧ್ಯತೆಯಿದೆ. ಇದು ಇನ್ನುಳಿದ ವೈದ್ಯಕೀಯ ಆಕಾಂಕ್ಷಿಗಳಿಗೆ ಸೀಟು ಪಡೆಯುವ ಆಶಾವಾದವನ್ನು ಹೆಚ್ಚಿಸಿದೆ.