ಪ್ರೇಮ ವಿವಾಹಕ್ಕೆ ಆಕ್ರೋಶ: ಆರು ಜನರ ಸಹಕಾರ ಪಡೆದು 3 ತಿಂಗಳ ಗರ್ಭಿಣಿ ಸೊಸೆ ಕೊಂದು ಶಿರಚ್ಛೇದಿಸಿದ ಮಾವ ಬಂಧನ!

ಧನ್‌ಬಾದ್: ಜಾರ್ಖಂಡ್‌ನ ಧನ್‌ಬಾದ್ ಜಿಲ್ಲೆಯ ಬಲಿಯಾಪುರ ಪೊಲೀಸ್ ಠಾಣಾ ವ್ಯಾಪ್ತಿಯ ಖೇರ್‌ಬಾಡಿಯಾ ಎಂಬ ದಟ್ಟ ಅರಣ್ಯ ಪ್ರದೇಶದಲ್ಲಿ 17 ವರ್ಷದ ಗರ್ಭಿಣಿ ಯುವತಿ ಪೂನಮ್ ಕುಮಾರಿಯ ಶಿರಚ್ಛೇದನ ಮಾಡಿ ಕೊಲೆ ಮಾಡಲಾದ ಅತ್ಯಂತ ಅಮಾನವೀಯ ಘಟನೆ ಬೆಳಕಿಗೆ ಬಂದಿದೆ.

ಘಟನೆಯ ವಿವರ:

ಗುರುವಾರದಿಂದ ನಾಪತ್ತೆಯಾಗಿದ್ದ ಪೂನಮ್ ಕುಮಾರಿಯ ರಕ್ತಸಿಕ್ತ ದೇಹ (ಮೊಣಕಾಲಿನಿಂದ ಕತ್ತಿನವರೆಗಿನ ಭಾಗ) ಶುಕ್ರವಾರ ಬೆಳಿಗ್ಗೆ ಬಲಿಯಾಪುರದ ಖೇರ್‌ಬಾಡಿಯಾ ಕಾಡಿನ ಪೊದೆಗಳಲ್ಲಿ ಪತ್ತೆಯಾಗಿತ್ತು. ಪೊಲೀಸರು ಕಾರ್ಯಾಚರಣೆ ನಡೆಸಿದಾಗ, ಆಕೆಯ ಕತ್ತರಿಸಿದ ತಲೆಯು ದೇಹದಿಂದ ಸುಮಾರು 100 ಮೀಟರ್ ದೂರದಲ್ಲಿದ್ದ ಮರದ ಕೆಳಗೆ ಪ್ಲಾಸ್ಟಿಕ್ ಚೀಲದಲ್ಲಿ ಸುತ್ತಿರುವ ಸ್ಥಿತಿಯಲ್ಲಿ ಪತ್ತೆಯಾಗಿದೆ.

ಘಟನಾ ಸ್ಥಳದಲ್ಲಿ ಧೂಪದ್ರವ್ಯ ಮತ್ತು ಪೂಜಾ ಸಾಮಗ್ರಿಗಳು ಕಂಡುಬಂದಿದ್ದರಿಂದ, ಪ್ರಾರಂಭದಲ್ಲಿ ಇದು ನರಬಲಿ ಇರಬಹುದು ಎಂಬ ವದಂತಿಗಳು ಸ್ಥಳೀಯವಾಗಿ ಹರಡಿದ್ದವು. ಆದರೆ ಪೊಲೀಸರು ತನಿಖೆ ಪೂರ್ಣಗೊಳ್ಳುವ ಮುನ್ನ ಯಾವುದೇ ತೀರ್ಮಾನಕ್ಕೆ ಬರಲು ಸಾಧ್ಯವಿಲ್ಲ ಎಂದು ತಿಳಿಸಿದ್ದಾರೆ.

ಪ್ರೇಮ ವಿವಾಹ ಮತ್ತು ಕೌಟುಂಬಿಕ ವೈಷಮ್ಯ:

ಪೂನಮ್ ಗಿರಿಡೀಹ್ ಜಿಲ್ಲೆಯ ತನ್ನ ಸ್ವಂತ ಊರಿನಿಂದ ವ್ಯಾಸಂಗಕ್ಕಾಗಿ ಧನ್‌ಬಾದ್‌ನ ತುಂಡಿ ಪ್ರದೇಶದಲ್ಲಿರುವ ಸಂಬಂಧಿಕರ ಮನೆಗೆ ಬಂದಿದ್ದಳು. ಅಲ್ಲಿ ಕೃಷ್ಣ ರವಾನಿ ಎಂಬುವವನ ಪರಿಚಯವಾಗಿ, ಇಬ್ಬರೂ ಪ್ರೀತಿಸಿ ಕುಟುಂಬದ ಇಚ್ಛೆಗೆ ವಿರುದ್ಧವಾಗಿ ಓಡಿಹೋಗಿ ಮದುವೆಯಾಗಿದ್ದರು. ನಂತರ ಬಲಿಯಾಪುರದಲ್ಲಿ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದರು.

ಪೂನಮ್‌ ಪ್ರಸ್ತುತ 3 ತಿಂಗಳ ಗರ್ಭಿಣಿಯಾಗಿದ್ದಳು. ಈ ಹಿಂದೆ ಪ್ರೇಮ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೃಷ್ಣ ರವಾನಿ ಜೈಲು ಪಾಲಾಗಿದ್ದನು. ಇದರಿಂದಾಗಿ ಕೃಷ್ಣನ ಕುಟುಂಬಕ್ಕೆ ಸಾಮಾಜಿಕವಾಗಿ ತೀವ್ರ ಮುಜುಗರ ಉಂಟಾಗಿತ್ತು. ಪೂನಮ್‌ನ ತಂದೆ ಕೂಡ ಈ ಮದುವೆಗೆ ವಿರೋಧ ವ್ಯಕ್ತಪಡಿಸಿದ್ದರು. ಪೊಲೀಸ್ ಠಾಣೆಯಲ್ಲಿ ಎರಡೂ ಕುಟುಂಬಗಳನ್ನು ಕರೆಸಿ ರಾಜಿ ಪಂಚಾಯಿತಿ ನಡೆಸಲು ಸಿದ್ಧತೆ ನಡೆಯುತ್ತಿರುವಾಗಲೇ ಈ ಕೃತ್ಯ ನಡೆದಿದೆ.

ಶ್ವಾನ ಪಡೆಯಿಂದ ಅಪರಾಧದ ಸುಳಿವು:

ರಾಂಚಿಯಿಂದ ಆಗಮಿಸಿದ ವಿಧಿವಿಜ್ಞಾನ (Forensic) ತಂಡ ಹಾಗೂ ಪೊಲೀಸ್ ಶ್ವಾನ ಪಡೆ (Dog Squad) ಸ್ಥಳ ಪರಿಶೀಲನೆ ನಡೆಸಿತು. ಕೃತ್ಯ ನಡೆದ ಸ್ಥಳದಲ್ಲಿ ಬಿಟ್ಟುಹೋಗಿದ್ದ ಒಂದು ಕಾಲಿನ ಚಪ್ಪಲಿಯ ವಾಸನೆಯನ್ನು ಹಿಡಿದ ಶ್ವಾನ ಪಡೆ, ಅಲ್ಲಿಂದ 4 ಕಿಲೋಮೀಟರ್ ದೂರದಲ್ಲಿದ್ದ ಆರೋಪಿ ಕೃಷ್ಣನ ಮನೆಗೆ ಕರೆದೊಯ್ದು ಪ್ರಮುಖ ಸಾಕ್ಷ್ಯ ಒದಗಿಸಿತು. ಆ ಚಪ್ಪಲಿ ಕೃಷ್ಣನ ಅತ್ತೆ (ಚಿಕ್ಕಮ್ಮ) ಅಲೋಮನಿ ದೇವಿಗೆ ಸೇರಿದ್ದಾಗಿತ್ತು.

ಆರೋಪಿಗಳ ಬಂಧನ:

ಧನ್‌ಬಾದ್ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (SP) ರಿತ್ವಿಕ್ ಶ್ರೀವಾಸ್ತವ್ ಅವರ ಮಾಹಿತಿಯಂತೆ, ಈ ಕೊಲೆಯ ಮುಖ್ಯ ಸಂಚುಕೋರ ಕೃಷ್ಣನ ತಂದೆ ಜಯರಾಮ್ ರವಾನಿ. ತಮ್ಮ ಸಾಮಾಜಿಕ ಅಂತಸ್ತಿಗೆ ಪೂನಮ್‌ ಕುಟುಂಬ ಸರಿಸಮಾನವಾಗಿಲ್ಲ ಮತ್ತು ಮಗ ಆಕೆಯ ಕಾರಣಕ್ಕೆ ಜೈಲಿಗೆ ಹೋಗಿ ಕುಟುಂಬದ ಗೌರವ ಹಾಳಾಯಿತು ಎಂಬ ಆಕ್ರೋಶದಿಂದ 6 ಜನರ ನೆರವಿನಿಂದ ಈ ಭೀಕರ ಕೊಲೆಯನ್ನು ಯೋಜಿಸಿ ನಡೆಸಿದ್ದಾನೆ.

ಪೋಲಿಸರು ಪ್ರಮುಖ ಆರೋಪಿ ಜಯರಾಮ್ ರವಾನಿ, ಆತನ ಅತ್ತೆ ಅಲೋಮನಿ ದೇವಿ ಸೇರಿದಂತೆ ಒಟ್ಟು ನಾಲ್ವರನ್ನು ಬಂಧಿಸಿದ್ದಾರೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದ್ದು, ಪೊಲೀಸರು ಶೀಘ್ರದಲ್ಲೇ ನ್ಯಾಯಾಲಯಕ್ಕೆ ದೋಷಾರೋಪಣೆ ಪಟ್ಟಿ (Charge Sheet) ಸಲ್ಲಿಸಲು ಸಿದ್ಧತೆ ನಡೆಸಿದ್ದಾರೆ.