BIG BREAKING: UPI ಪಾವತಿದಾರರಿಗೆ ಬಿಗ್ ರಿಲೀಫ್: ₹2,000 ವರೆಗಿನ ವಹಿವಾಟಿಗೆ ಇನ್ಮುಂದೆ ಶುಲ್ಕ ವಿಧಿಸುವಂತಿಲ್ಲ, ಬ್ಯಾಂಕುಗಳಿಗೆ ಆರ್‌ಬಿಐ ಹಾಗೂ ಕೇಂದ್ರದ ಕಟ್ಟುನಿಟ್ಟಿನ ಸೂಚನೆ!

ನವದೆಹಲಿ: ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ಬಳಸುವ ದೇಶದ ಕೋಟ್ಯಂತರ ಗ್ರಾಹಕರಿಗೆ ಕೇಂದ್ರ ಸರ್ಕಾರ ಬಿಗ್ ರಿಲೀಫ್ ನೀಡಿದೆ. 2,000 ರೂಪಾಯಿಯವರೆಗಿನ UPI (ಯುಪಿಐ) ವಹಿವಾಟುಗಳಿಗೆ ಬ್ಯಾಂಕುಗಳಾಗಲಿ ಅಥವಾ ಪಾವತಿ ಸೇವಾ ಸಂಸ್ಥೆಗಳಾಗಲಿ (PSPs) ಯಾವುದೇ ನೇರ ಅಥವಾ ಪರೋಕ್ಷ ಶುಲ್ಕವನ್ನು ವಿಧಿಸುವಂತಿಲ್ಲ ಎಂದು ಕೇಂದ್ರ ಹಣಕಾಸು ಸಚಿವಾಲಯವು ಸೋಮವಾರ ಅಧಿಕೃತವಾಗಿ ಸ್ಪಷ್ಟಪಡಿಸಿದೆ.

ಅಧಿಸೂಚನೆಯ ಮುಖ್ಯ ಅಂಶಗಳು

ಶುಲ್ಕ ರಹಿತ ವಹಿವಾಟು: 2,000 ರೂ.ವರೆಗಿನ ಎಲ್ಲಾ UPI ಪಾವತಿಗಳು ಹಾಗೂ ರೂಪೇ (RuPay) ಡೆಬಿಟ್ ಕಾರ್ಡ್ ಮೂಲಕ ನಡೆಸುವ ಪಾವತಿಗಳಿಗೆ ಸಂಪೂರ್ಣ ಶುಲ್ಕ ವಿನಾಯಿತಿ ಅನ್ವಯಿಸಲಿದೆ.

ಗ್ರಾಹಕರು ಮತ್ತು ವರ್ತಕರಿಗೆ ರಕ್ಷಣೆ: ಈ ನಿಯಮವು ಹಣ ಪಾವತಿಸುವ ಗ್ರಾಹಕರಿಗೂ ಹಾಗೂ ಪಾವತಿ ಸ್ವೀಕರಿಸುವ ಸಣ್ಣ ವರ್ತಕರಿಗೂ (Merchants) ಅನ್ವಯಿಸುತ್ತದೆ.

ಚಲಾವಣೆಯಲ್ಲಿರುವ ಕಾಯ್ದೆ: ‘ಪಾವತಿ ಮತ್ತು ಇತ್ಯರ್ಥ ವ್ಯವಸ್ಥೆಗಳ ಕಾಯಿದೆ, 2007’ (Payment and Settlement Systems Act, 2007) ರ ಸೆಕ್ಷನ್ 10A ಅಡಿಯಲ್ಲಿ ಹಣಕಾಸು ಸಚಿವಾಲಯವು ಈ ಗೆಜೆಟ್ ಅಧಿಸೂಚನೆಯನ್ನು ಹೊರಡಿಸಿದೆ.

ಸ್ಪಷ್ಟನೆಗೆ ಕಾರಣವೇನು?

ಇತ್ತೀಚೆಗೆ ಕೇಂದ್ರ ಸರ್ಕಾರವು ಪಾವತಿ ಕಾಯಿದೆಗೆ ಕೆಲವು ತಿದ್ದುಪಡಿಗಳನ್ನು ತಂದಿತ್ತು. ಇದರಿಂದಾಗಿ ಭವಿಷ್ಯದಲ್ಲಿ ಗೂಗಲ್ ಪೇ (Google Pay), ಫೋನ್ ಪೇ (PhonePe) ಅಥವಾ ಪೇಟಿಎಂ (Paytm) ನಂತಹ ಆ್ಯಪ್‌ಗಳ ಮೂಲಕ ಮಾಡುವ UPI ವಹಿವಾಟುಗಳಿಗೆ ಶುಲ್ಕ ವಿಧಿಸಲಾಗುತ್ತದೆ ಎಂಬ ಆತಂಕ ಸಾರ್ವಜನಿಕರಲ್ಲಿ ಸೃಷ್ಟಿಯಾಗಿತ್ತು.

ಸಾರ್ವಜನಿಕರಲ್ಲಿ ಉಂಟಾಗಿದ್ದ ಈ ಗೊಂದಲ ಮತ್ತು ವದಂತಿಗಳಿಗೆ ತೆರೆ ಎಳೆದಿರುವ ಹಣಕಾಸು ಸಚಿವಾಲಯ, ಡಿಜಿಟಲ್ ಪಾವತಿಯನ್ನು ಉತ್ತೇಜಿಸುವ ಉದ್ದೇಶದಿಂದ ಈ ಶೂನ್ಯ-ಶುಲ್ಕ (Zero-MDR) ವ್ಯವಸ್ಥೆಯನ್ನು ಮುಂದುವರಿಸಲಾಗುವುದು ಎಂದು ತಿಳಿಸಿದೆ.