ಹೆಂಡತಿಗೆ ‘ಐಫೋನ್ 18 ಪ್ರೋ’ ಗಿಫ್ಟ್ ನೀಡಲು ತಾನು ಇಟ್ಟುಕೊಂಡಿದ್ದ ಚಿನ್ನವನ್ನೇ ಮಾರಿದ ಪತಿ!

ನೋಯ್ಡಾ / ನವದೆಹಲಿ: ಭಾರತಾದ್ಯಂತ ಬಹುನಿರೀಕ್ಷಿತ ‘ಐಫೋನ್ 18 ಪ್ರೋ’ (iPhone 18 Pro) ಸರಣಿಯ ಸ್ಮಾರ್ಟ್‌ಫೋನ್‌ಗಳ ಅಧಿಕೃತ ಮಾರಾಟ ಇಂದು (ಸೆಪ್ಟೆಂಬರ್ 18, 2026) ಆರಂಭವಾಗಿದ್ದು, ದೇಶದ ಪ್ರಮುಖ ಆಪಲ್ ಸ್ಟೋರ್‌ಗಳ ಮುಂದೆ ಗ್ರಾಹಕರು ಗಂಟೆಗಟ್ಟಲೆ ಸಾಲಿನಲ್ಲಿ ನಿಂತಿದ್ದಾರೆ.

ಈ ನಡುವೆ ಉತ್ತರ ಪ್ರದೇಶದ ನೋಯ್ಡಾದಲ್ಲಿರುವ ‘ಡಿಎಲ್‌ಎಫ್ ಮಾಲ್ ಆಫ್ ಇಂಡಿಯಾ’ದ ಆಪಲ್ ಸ್ಟೋರ್ ಮುಂಭಾಗ ನಡೆದ ಸ್ವಾರಸ್ಯಕರ ಘಟನೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ.

ದೆಹಲಿ ಮೂಲದ ವ್ಯಕ್ತಿಯೊಬ್ಬರು ತಮ್ಮ ಪತ್ನಿಗೆ ಹೊಸ ಐಫೋನ್ 18 ಪ್ರೋ ಕೊಡಿಸಲು ತಾವಿಟ್ಟುಕೊಂಡಿದ್ದ ಚಿನ್ನದ ಒಡವೆಗಳನ್ನೇ ಮಾರಿ ಫೋನ್ ಖರೀದಿಸಿರುವುದಾಗಿ ಹೇಳಿಕೊಂಡಿದ್ದಾರೆ.

“ಇಂದು ಹಣವಿದೆ, ನಾಳೆಯ ಭವಿಷ್ಯ ಯಾರಿಗೆ ಗೊತ್ತು?”:

ಆಪಲ್ ಸ್ಟೋರ್ ತೆರೆಯುವ ಮುನ್ನವೇ ಸಾಲಿನಲ್ಲಿ ನಿಂತಿದ್ದ ಈ ದೆಹಲಿ ನಿವಾಸಿಯನ್ನು ಮಾಧ್ಯಮಗಳು ಮಾತನಾಡಿಸಿದಾಗ, “ನನ್ನ ಹೆಂಡತಿಗೆ ಬರ್ಗಂಡಿ (Burgundy) ಬಣ್ಣದ ಐಫೋನ್ 18 ಪ್ರೋ ಎಂದರೆ ತುಂಬಾ ಇಷ್ಟ. ಆಕೆ ಇದುವರೆಗೆ ಐಫೋನ್ ಬಳಸಿರಲಿಲ್ಲ, ಆಕೆಗೆ ಈ ಡಿವೈಸ್ ಅನ್ನು ಉಡುಗೊರೆಯಾಗಿ ನೀಡಲು ಬಂದಿದ್ದೇನೆ. ಇದನ್ನು ಕೊಳ್ಳಲು ನನ್ನ ಬಳಿ ಪೂರ್ತಿ ಹಣವಿರಲಿಲ್ಲ, ಹಾಗಾಗಿ ಮನೆ ಇಲ್ಲಿದ್ದ ಚಿನ್ನವನ್ನು ಮಾರಿ ಈ ಫೋನ್ ಖರೀದಿಸುತ್ತಿದ್ದೇನೆ. ಇಂದು ನಮ್ಮ ಬಳಿ ಹಣವಿದೆ, ನಾಳೆ ಹೇಗಿರುತ್ತದೋ ಗೊತ್ತಿಲ್ಲ. ಅದಕ್ಕೆಂದೇ ಇಂದಿನ ಕ್ಷಣವನ್ನು ಖುಷಿಯಿಂದ ಜೀವಿಸುತ್ತಿದ್ದೇವೆ” ಎಂದು ಭಾವುಕರಾಗಿ ನುಡಿದರು.

ಪಂಜಾಬ್‌ನಿಂದ ಬಂದು 3.5 ಲಕ್ಷ ರೂ. ಖರ್ಚು ಮಾಡಿದ ಯುವಕ:

ಇದಲ್ಲದೆ, ಪಂಜಾಬ್‌ನಿಂದ ಆಗಮಿಸಿದ್ದ ಗುರ್ದೀತಾ ಸಿಂಗ್ ಎಂಬ ಯುವಕ, ತನಗೆ ಶೀಘ್ರದಲ್ಲೇ ಮದುವೆಯಾಗಲಿದ್ದು, ತಮ್ಮ ಭಾವಿ ಪತ್ನಿಗೆ ಐಫೋನ್ 18 ಪ್ರೋ ಹಾಗೂ ತಮಗಾಗಿ ಐಫೋನ್ 18 ಪ್ರೋ ಮ್ಯಾಕ್ಸ್ ಖರೀದಿಸಲು ಬೆಳಗ್ಗೆ 6 ಗಂಟೆಯಿಂದಲೇ ಸಾಲಿನಲ್ಲಿ ನಿಂತಿದ್ದರು. ಇವೆರಡೂ ಫೋನ್‌ಗಳಿಗಾಗಿ ಅವರು ಬರೋಬ್ಬರಿ 3.5 ಲಕ್ಷ ರೂಪಾಯಿಗೂ ಹೆಚ್ಚು ಹಣ ವಿನಿಯೋಗಿಸಿದ್ದಾರೆ.

ಪ್ರೀ-ಆರ್ಡರ್ ಇಲ್ಲದೆ ಬಂದವರಿಗೆ ನಿರಾಶೆ:

ಸ್ಟೋರ್‌ನ ಹೊರಗೆ ವಿದ್ಯಾರ್ಥಿಗಳು, ಉದ್ಯೋಗಿಗಳು ಹಾಗೂ ವ್ಯಾಪಾರಿಗಳ ಉದ್ದನೆಯ ಸಾಲೇ ಕಂಡುಬಂದಿತ್ತು. ಆದರೆ ಮುಂಗಡ ಬುಕಿಂಗ್ (Pre-order) ಮಾಡಿಕೊಳ್ಳದೆ ಬಂದಿದ್ದ ಗ್ರಾಹಕರಿಗೆ ಸ್ಟೋರ್ ಒಳಗೆ ಪ್ರವೇಶಿಸಲು ಅನುಮತಿ ನೀಡಲಿಲ್ಲ. ಇದರಿಂದ ನಿರಾಶೆಗೊಂಡ ಕೆಲವರು ಒಳಗೆ ಹೋಗಲು ಹಣ ನೀಡುವುದಕ್ಕೂ ಸಿದ್ಧರಾಗಿದ್ದ ದೃಶ್ಯ ಕಂಡುಬಂತು.