ಬೆಂಗಳೂರು ಕಸದ ದಂಧೆಯಲ್ಲಿ 39,000 ಕೋಟಿ ಹಗರಣ? ಕಾಂಗ್ರೆಸ್ ಸರ್ಕಾರಕ್ಕೆ 10,000 ಕೋಟಿ ಕಿಕ್‌ಬ್ಯಾಕ್ ಆರೋಪ ಮಾಡಿದ ಆರ್‌ ಅಶೋಕ್!

ಬೆಂಗಳೂರು: ರಾಜಧಾನಿ ಬೆಂಗಳೂರಿನ ತ್ಯಾಜ್ಯ ವಿಲೇವಾರಿ ಹೆಸರಿನಲ್ಲಿ ಕರ್ನಾಟಕದ ಕಾಂಗ್ರೆಸ್ ಸರ್ಕಾರ ಬರೋಬ್ಬರಿ 39,000 ಕೋಟಿ ರೂಪಾಯಿ ಹಗರಣ ನಡೆಸಿದೆ ಎಂದು ಪ್ರತಿಪಕ್ಷ ನಾಯಕ ಆರ್. ಅಶೋಕ್ ಗಂಭೀರ ಆರೋಪ ಮಾಡಿದ್ದಾರೆ. ಈ ಮೆಗಾ ಟೆಂಡರ್ ಪ್ರಕ್ರಿಯೆಯಲ್ಲಿ ಆಡಳಿತ ರೂಢ ಸರ್ಕಾರಕ್ಕೆ ಬರೋಬ್ಬರಿ 10,000 ಕೋಟಿ ರೂಪಾಯಿ ಕಿಕ್‌ಬ್ಯಾಕ್ (ಲಂಚ) ಸಂದಾಯವಾಗಿದೆ ಎಂದು ಅವರು ಆಘಾತಕಾರಿ ಹೇಳಿಕೆ ನೀಡಿದ್ದಾರೆ.

ರಾಮ್‌ಕಿ ಗ್ರೂಪ್‌ಗೆ ನಂಟಿರುವ ದೆಹಲಿ ಮೂಲದ ‘ಎಂಎಸ್‌ಡಬ್ಲ್ಯೂ ಸೊಲ್ಯೂಷನ್ಸ್ ಲಿಮಿಟೆಡ್’ ಕಂಪನಿಗೆ ಈ ಬೃಹತ್ ಟೆಂಡರ್ ನೀಡಲಾಗಿದ್ದು, ಇದು ದೇಶದ ಇತಿಹಾಸದಲ್ಲೇ ಅತಿ ದೊಡ್ಡ ಹಗರಣಗಳಲ್ಲಿ ಒಂದಾಗಿದೆ ಎಂದು ಅಶೋಕ್ ವೀರೋಧ ವ್ಯಕ್ತಪಡಿಸಿದ್ದಾರೆ.

35 ವರ್ಷಗಳ ದೀರ್ಘಾವಧಿ ಟೆಂಡರ್!

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಆರ್. ಅಶೋಕ್, “ಬೆಂಗಳೂರಿನ ಕಸ ವಿಲೇವಾರಿ ಟೆಂಡರ್ ಅನ್ನು ಬರೋಬ್ಬರಿ 35 ವರ್ಷಗಳ ಅವಧಿಗೆ (30 ವರ್ಷ + 5 ವರ್ಷ ವಿಸ್ತರಣೆ) ನೀಡಲಾಗಿದೆ. ಈ ಹಿಂದೆ ಬಿಜೆಪಿ ಅವಧಿಯಲ್ಲಿ ಬೆಂಗಳೂರು ಅತ್ಯಂತ ಸ್ವಚ್ಛ ನಗರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿತ್ತು. ಆದರೆ ಈಗಿನ ಕಾಂಗ್ರೆಸ್ ಸರ್ಕಾರ ತ್ಯಾಜ್ಯ ನಿರ್ವಹಣೆಯ ನೆಪದಲ್ಲಿ ದೊಡ್ಡ ಮಟ್ಟದ ಆರ್ಥಿಕ ಅವ್ಯವಹಾರಕ್ಕೆ ಕೈಹಾಕಿದೆ” ಎಂದು ಕಿಡಿಕಾರಿದ್ದಾರೆ.

ಅಂಕಿ-ಅಂಶಗಳ ವ್ಯತ್ಯಾಸ ಹೀಗಿದೆ:

ಬಿಜೆಪಿ ನಾಯಕರು ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳ ಪ್ರಕಾರ, ಪ್ರಸ್ತುತ ಬೆಂಗಳೂರಿನ ಕಸದ ನಿರ್ವಹಣೆಗೆ ವಾರ್ಷಿಕವಾಗಿ 1,344 ಕೋಟಿ ರೂಪಾಯಿ ವೆಚ್ಚವಾಗುತ್ತಿದೆ.

• ಕಸ ಸಂಗ್ರಹಣೆ ಮತ್ತು ಸಾಗಣೆ: ₹514 ಕೋಟಿ

• ತ್ಯಾಜ್ಯ ಸಂಸ್ಕರಣೆ ಮತ್ತು ವಿಲೇವಾರಿ: ₹380 ಕೋಟಿ

• 11,000 ಪೌರಕಾರ್ಮಿಕರ ವೇತನ: ₹444 ಕೋಟಿ

ಆದರೆ, ಹೊಸ ಟೆಂಡರ್ ಪ್ರಕಾರ ಸದ್ಯ ಟನ್‌ಗೆ ಇರುವ ₹260 ಟಿಪ್ಪಿಂಗ್ ಶುಲ್ಕವನ್ನು ₹2,400 ಕ್ಕೆ ಏರಿಸಲಾಗಿದೆ. ಇದರಿಂದಾಗಿ ಮುಂದಿನ 30 ವರ್ಷಗಳಲ್ಲಿ ಸಾಮಾನ್ಯ ವೆಚ್ಚ ₹6,117 ಕೋಟಿ ಆಗಬೇಕಿದ್ದ ಜಾಗದಲ್ಲಿ, ಬರೋಬ್ಬರಿ ₹39,437 ಕೋಟಿ ಆಗಲಿದೆ. ಇದು ಸಾರ್ವಜನಿಕರ ತೆರಿಗೆ ಹಣದ ಮೇಲೆ ₹33,000 ಕೋಟಿಗೂ ಅಧಿಕ ನಷ್ಟ ಉಂಟುಮಾಡಲಿದೆ ಎಂದು ಅಶೋಕ್ ವಿವರಿಸಿದ್ದಾರೆ.

ನಿಯಮಗಳ ಉಲ್ಲಂಘನೆ ಮತ್ತು ರಾಜ್ಯಪಾಲರಿಗೆ ದೂರು

ಸರ್ಕಾರಿ ಸ್ವಾಮ್ಯದ ‘ರೈಟ್ಸ್’ (RITES) ಸಂಸ್ಥೆಯ ತಜ್ಞರ ಶಿಫಾರಸುಗಳನ್ನು ಬದಿಗಿಟ್ಟು, ಮಾನ್ಯತೆ ಇಲ್ಲದ ಖಾಸಗಿ ಕನ್ಸಲ್ಟೆಂಟ್ ಸಲಹೆ ಪಡೆದು ಈ ಟೆಂಡರ್ ನೀಡಲಾಗಿದೆ. ಅಲ್ಲದೆ ಹಣಕಾಸು ಇಲಾಖೆ ಎತ್ತಿದ್ದ ಆಕ್ಷೇಪಗಳನ್ನೂ ಸರ್ಕಾರ ಗಾಳಿಗೆ ತೂರಿದೆ. ಇಷ್ಟೇ ಅಲ್ಲದೆ, 2016 ರಲ್ಲಿ ಬಿಬಿಎಂಪಿಯಿಂದಲೇ ಬ್ಲಾಕ್‌ಲಿಸ್ಟ್ ಆಗಿದ್ದ ರಾಮ್‌ಕಿ ಸಂಸ್ಥೆಗೆ ಮತ್ತೆ ಮಣೆ ಹಾಕಿರುವುದರ ಹಿಂದೆ ದೊಡ್ಡ ಕೈವಾಡವಿದೆ ಎಂದು ಅವರು ಆರೋಪಿಸಿದ್ದಾರೆ.

ಈ ಕುರಿತು ತನಿಖೆ ನಡೆಸುವಂತೆ ಆಗ್ರಹಿಸಿ ಆರ್. ಅಶೋಕ್ ಅವರು ರಾಜಭವನದಲ್ಲಿ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಅವರನ್ನು ಭೇಟಿಯಾಗಿ ಅಧಿಕೃತ ದೂರು ಸಲ್ಲಿಸಿದ್ದಾರೆ. ಟೆಂಡರ್ ಅನ್ನು ತಕ್ಷಣವೇ ರದ್ದುಗೊಳಿಸಿ, ಸಮಗ್ರ ತನಿಖೆಗೆ ಆದೇಶಿಸಬೇಕೆಂದು ಅವರು ಆಗ್ರಹಿಸಿದ್ದಾರೆ.