ಬಿಳಿ ಟಿ-ಶರ್ಟ್‌ನಿಂದ ಬಣ್ಣದ ಶರ್ಟ್‌ಗೆ: ‘ಛಾತ್ರೋನ್ ಕಿ ಗೂಂಜ್’ ಕಾರ್ಯಕ್ರಮದಲ್ಲಿ ರಾಹುಲ್ ಗಾಂಧಿ ಹೊಸ ಲುಕ್, ಶರ್ಟ್ ಬದಲಾವಣೆ ಹಿಂದಿನ ರಹಸ್ಯ!

ನವದೆಹಲಿ: ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರು ತಮ್ಮ ರಾಜಕೀಯ ಪ್ರಚಾರಗಳ ಜೊತೆಗೆ ತಮ್ಮ ಉಡುಗೆ-ತೊಡುಗೆಯ ಶೈಲಿಯ ಬದಲಾವಣೆಯಿಂದಲೂ ಇದೀಗ ಗಮನ ಸೆಳೆಯುತ್ತಿದ್ದಾರೆ. 2022 ರ ‘ಭಾರತ್ ಜೋಡೋ ಯಾತ್ರೆ’ಯ ಸಮಯದಲ್ಲಿ ಬಿಳಿ ಟಿ-ಶರ್ಟ್‌ಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕ ಹೊಸ ಟ್ರೆಂಡ್ ಸೃಷ್ಟಿಸಿದ್ದ ಅವರು, ಇದೀಗ ತಮ್ಮ ಶೈಲಿಯನ್ನು ಬದಲಾಯಿಸಿದ್ದು, ಆಕರ್ಷಕ ಬಣ್ಣದ, ಹಾಫ್-ಸ್ಲೀವ್ ಶರ್ಟ್‌ಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.

ಯುವಜನರನ್ನು ಮತ್ತು ‘Gen Z’ (ಜನ್ ಝೆಡ್) ಮತದಾರರನ್ನು ಸೆಳೆಯುವ ಉದ್ದೇಶದಿಂದ ನಡೆಯುತ್ತಿರುವ “ಛಾತ್ರೋನ್ ಕಿ ಗೂಂಜ್” ದೇಶವ್ಯಾಪಿ ಕಾರ್ಯಕ್ರಮದಲ್ಲಿ ರಾಹುಲ್ ಗಾಂಧಿ ಈ ಹೊಸ ಲುಕ್‌ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಪೇಪರ್ ಲೀಕ್, ನಿರುದ್ಯೋಗ ಮತ್ತು ಮಹಿಳಾ ಸುರಕ್ಷತೆಯಂತಹ ಪ್ರಮುಖ ವಿಚಾರಗಳ ಬಗ್ಗೆ ವಿದ್ಯಾರ್ಥಿಗಳೊಂದಿಗೆ ಅವರು ಸಂವಾದ ನಡೆಸುತ್ತಿದ್ದಾರೆ.

ಈ ಕಾರ್ಯಕ್ರಮದ ಭಾಗವಾಗಿ ಅವರು ಕೋಟಾದಲ್ಲಿ ನೀಲಿ ಬಣ್ಣದ ಶರ್ಟ್, ಅಲಹಾಬಾದ್‌ನಲ್ಲಿ ಗುಲಾಬಿ ಬಣ್ಣದ ಶರ್ಟ್ ಮತ್ತು ಪುಣೆಯಲ್ಲಿ ಹಳದಿ ಶರ್ಟ್ ಧರಿಸಿ ವಿದ್ಯಾರ್ಥಿಗಳೊಂದಿಗೆ ಬೆರೆತಿದ್ದಾರೆ. ವಿಶೇಷವಾಗಿ ಪುಣೆಯಲ್ಲಿ ನಡೆದ ಕಾರ್ಯಕ್ರಮವು ಯುವತಿಯರು ಮತ್ತು ದುಡಿಯುವ ಮಹಿಳೆಯರ ಮೇಲೆ ಕೇಂದ್ರೀಕೃತವಾಗಿತ್ತು.

ಮುಂಬರುವ ಚುನಾವಣೆಗಳಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿರುವ ಯುವಜನತೆ ಮತ್ತು ಮಹಿಳಾ ಮತದಾರರನ್ನು ಸೆಳೆಯುವುದು ಕಾಂಗ್ರೆಸ್‌ನ ಪ್ರಮುಖ ಗುರಿಯಾಗಿದೆ. ಬಿಜೆಪಿ ಈ ಹಿಂದೆ ಯಶಸ್ವಿಯಾಗಿ ಬಳಸಿಕೊಂಡಿದ್ದ ಇದೇ ತಂತ್ರವನ್ನು ಇದೀಗ ಕಾಂಗ್ರೆಸ್ ಹೊಸ ರೂಪದಲ್ಲಿ, ವಿಶೇಷವಾಗಿ ಜನ್ ಝೆಡ್ ಮತದಾರರನ್ನು ದೃಷ್ಟಿಯಲ್ಲಿಟ್ಟುಕೊಂಡು ಅಳವಡಿಸಿಕೊಳ್ಳುತ್ತಿದೆ. ರಾಹುಲ್ ಗಾಂಧಿ ಅವರ ಈ ‘ಕಲರ್‌ಫುಲ್’ ಬದಲಾವಣೆ ಈ ಕಾರ್ಯತಂತ್ರದ ಒಂದು ಪ್ರಮುಖ ಭಾಗವಾಗಿದೆ.