ಅಮೆರಿಕ ಶಿಕ್ಷಣಕ್ಕೆ ಯಾರು ಹಣ ನೀಡಿದ್ದು? ಆರ್‌ಟಿಐ ದೂರಿಗೆ ಬೋಸ್ಟನ್ ಯೂನಿವರ್ಸಿಟಿ ಪತ್ರ ತೋರಿಸಿ ಸ್ಪಷ್ಟನೆ ನೀಡಿದ CJP ಸಂಸ್ಥಾಪಕ!

ನವದೆಹಲಿ: ತಮ್ಮ ಅಮೆರಿಕದ ಉನ್ನತ ಶಿಕ್ಷಣದ ಕುರಿತು ಆರ್‌ಟಿಐ ಕಾರ್ಯಕರ್ತರೊಬ್ಬರು ಎತ್ತಿದ್ದ ಪ್ರಶ್ನೆಗಳು ಹಾಗೂ ಕುಟುಂಬದ ಆಸ್ತಿ ತನಿಖೆಗೆ ಆಗ್ರಹಿಸಿದ್ದ ದೂರಿಗೆ ಕಾಕ್ರೋಚ್ ಜನತಾ ಪಾರ್ಟಿ (CJP) ಸಂಸ್ಥಾಪಕ ಅಭಿಜಿತ್ ದೀಪ್ಕೆ ತೀವ್ರ ತಿರುಗೇಟು ನೀಡಿದ್ದಾರೆ. ತಮ್ಮ ಬೋಸ್ಟನ್ ಯೂನಿವರ್ಸಿಟಿಯ ಸ್ಕಾಲರ್‌ಶಿಪ್ ಪತ್ರವನ್ನು ಬಹಿರಂಗಪಡಿಸುವ ಮೂಲಕ, ತಮ್ಮ ಶಿಕ್ಷಣಕ್ಕೆ ಸ್ಕಾಲರ್‌ಶಿಪ್ ಮತ್ತು ಶಿಕ್ಷಣ ಸಾಲವೇ ಆಧಾರವಾಗಿತ್ತು ಎಂದು ಸ್ಪಷ್ಟಪಡಿಸಿದ್ದಾರೆ.

ಹಿರಿಯ ಪತ್ರಕರ್ತೆ ಬರ್ಖಾ ದತ್ ಅವರಿಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ದೀಪ್ಕೆ, “ನನ್ನ ಶಿಕ್ಷಣವು ಬೋಸ್ಟನ್ ಯೂನಿವರ್ಸಿಟಿ ನೀಡಿದ ಸ್ಕಾಲರ್‌ಶಿಪ್‌ನಿಂದ ಸಂಪೂರ್ಣಗೊಂಡಿದೆ. ಜೊತೆಗೆ ನಾನು ಪಡೆದಿರುವ ಎಜುಕೇಶನ್ ಲೋನ್ ಅನ್ನು ನಾನೇ ಮರುಪಾವತಿಸುತ್ತಿದ್ದೇನೆ” ಎಂದು ತಿಳಿಸಿದರು.

ಆರ್‌ಟಿಐ ದೂರಿನ ಹಿನ್ನೆಲೆ:

ಆಗಸ್ಟ್ 1 ರಂದು ಸೂರತ್ ಮೂಲದ ಆರ್‌ಟಿಐ ಕಾರ್ಯಕರ್ತ ಅಮಿತ್ ತಿವಾರಿ, ಮಹಾರಾಷ್ಟ್ರ ಸರ್ಕಾರ ಸೇರಿದಂತೆ ವಿವಿಧ ಪ್ರಾಧಿಕಾರಗಳಿಗೆ ದೂರು ನೀಡಿದ್ದರು. ಅಭಿಜಿತ್ ದೀಪ್ಕೆ ಅವರ ತಂದೆ ಭಗವಾನ್‌ರಾವ್ ದೀಪ್ಕೆ (MIDC ನಿವೃತ್ತ ಜೂನಿಯರ್ ಎಂಜಿನಿಯರ್) ಅವರ ಮಾಸಿಕ ವೇತನ ₹60,000-65,000 ಆಗಿರುವಾಗ ಮಕ್ಕಳಿಗೆ ಅಮೆರಿಕದಲ್ಲಿ ಕೋಟ್ಯಂತರ ರೂಪಾಯಿ ಖರ್ಚು ಮಾಡಿ ಓದಿಸಲು ಹೇಗೆ ಸಾಧ್ಯವಾಯಿತು ಎಂದು ಪ್ರಶ್ನಿಸಿ ತನಿಖೆಗೆ ಒತ್ತಾಯಿಸಿದ್ದರು.

ಪಾರ್ಟಿ ಫಂಡಿಂಗ್ ಮತ್ತು ನೀಟ್ ಪ್ರತಿಭಟನೆ:

ಸಿಜೆಪಿ (CJP) ಪಕ್ಷದ ಆರ್ಥಿಕ ನಿರ್ವಹಣೆ ಕುರಿತು ಮಾತನಾಡಿದ ದೀಪ್ಕೆ, “ಮುಂದಿನ ದಿನಗಳಲ್ಲಿ ಪಕ್ಷದ ಚಟುವಟಿಕೆಗಳಿಗೆ ಪಾರದರ್ಶಕವಾಗಿ ಸಾರ್ವಜನಿಕರಿಂದ ಕ್ರೌಡ್‌ಫಂಡಿಂಗ್ (ಸಾರ್ವಜನಿಕ ದೇಣಿಗೆ) ಸಂಗ್ರಹಿಸಲಾಗುವುದು” ಎಂದಿದ್ದಾರೆ. ಅಲ್ಲದೆ ನೀಟ್ ಪ್ರಶ್ನೆಪತ್ರಿಕೆ ಸೋರಿಕೆ ವಿರೋಧಿ ಹೋರಾಟದ ವೇಳೆ ಸಾರ್ವಜನಿಕರು ಹಾಗೂ ದೆಹಲಿ ಪೊಲೀಸರ ಕೆಲ ಸಿಬ್ಬಂದಿ ಕೂಡ ತಮಗೆ ಆಹಾರ ಮತ್ತು ನೀರಿನ ನೆರವು ನೀಡಿದ್ದರು ಎಂದು ಸ್ಮರಿಸಿದರು.

ಇತ್ತೀಚೆಗೆ ಹಿರಿಯ ವಕೀಲ ಕಪಿಲ್ ಸಿಬಲ್ ಅವರು ಬಂಧಿತ ಪ್ರತಿಭಟನಾಕಾರರಿಗೆ ₹1 ಕೋಟಿ ಕಾನೂನು ನೆರವು ನೀಡುವುದಾಗಿ ಘೋಷಿಸಿದ ಬೆನ್ನಲ್ಲೇ CJPಯ ಆರ್ಥಿಕತೆ ಮತ್ತು ಕಾನೂನು ಮಾನ್ಯತೆ ಕುರಿತು ಆರ್‌ಟಿಐ ಕಾರ್ಯಕರ್ತರು ಚುನಾವಣಾ ಆಯೋಗಕ್ಕೂ ದೂರು ನೀಡಿದ್ದಾರೆ. ಆದರೆ ಈ ಎಲ್ಲಾ ಆರೋಪಗಳನ್ನು ಸಿಜೆಪಿ ರಾಜಕೀಯ ಪ್ರೇರಿತ ಎಂದು ತಳ್ಳಿಹಾಕಿದೆ.