20ರ ಯುವತಿ ಜೊತೆ 72ರ ಫುಟ್ಬಾಲ್ ದಿಗ್ಗಜ 2ನೇ ಇನಿಂಗ್ಸ್: ಸಮಾಜದ ಮಾತಿಗೆ ಕಿವಿಗೊಡದೆ ಮದುವೆಯಾದ ದತುಕ್ ಅಬ್ದಾಹ್ ಅಲಿಫ್!

ಮಲೇಷ್ಯಾ: “ಪ್ರೀತಿ ಕುರುಡು” ಎಂಬ ಮಾತನ್ನು ನಾವೆಲ್ಲರೂ ಕೇಳಿದ್ದೇವೆ. ಆದರೆ ಪ್ರೀತಿಗೆ ವಯಸ್ಸಿನ ಗಡಿಯಾಗಲಿ, ಕಾಲದ ಹಂಗಾಗಲಿ ಇಲ್ಲ ಎಂಬುದನ್ನು ಈ ಅಪರೂಪದ ಜೋಡಿ ಮತ್ತೊಮ್ಮೆ ಸಾಬೀತುಪಡಿಸಿದೆ. ಒಂದು ಕಾಲದಲ್ಲಿ ಮಲೇಷ್ಯಾ ಫುಟ್ಬಾಲ್ ಮೈದಾನದಲ್ಲಿ ತಮ್ಮ ಅದ್ಭುತ ಆಟದ ಮೂಲಕ ಅಭಿಮಾನಿಗಳ ಮನಗೆದ್ದಿದ್ದ 72 ವರ್ಷದ ಫುಟ್ಬಾಲ್ ದಿಗ್ಗಜ ದತುಕ್ ಅಬ್ದಾಹ್ ಅಲಿಫ್ , ಇದೀಗ ತಮ್ಮ ಜೀವನದ ಹೊಸ ಅಧ್ಯಾಯಕ್ಕೆ ಕಾಲಿಟ್ಟಿದ್ದಾರೆ.

ತಮಗಿಂತ ಬರೋಬ್ಬರಿ 52 ವರ್ಷ ಚಿಕ್ಕವಳಾದ 20 ವರ್ಷದ ಯುವತಿಯೊಂದಿಗೆ ಅವರು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವುದು ಜಾಗತಿಕ ಮಟ್ಟದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಆಗಸ್ಟ್ 27ರಂದು ನೆರವೇರಿದ ವಿವಾಹ:

ವರದಿಗಳ ಪ್ರಕಾರ, ಆಗಸ್ಟ್ 27ರಂದು ಮಲೇಷ್ಯಾದ ಕೌಲಾ ತೆರೆಂಗಾನುನಲ್ಲಿ ಈ ಮದುವೆ ಸರಳವಾಗಿ ನೆರವೇರಿದೆ. ಸಾಂಪ್ರದಾಯಿಕ ಮಲಯ ಉಡುಪಿನಲ್ಲಿ ಮಿಂಚಿದ ಈ ನವಜೋಡಿಯ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಮಿಶ್ರ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ.

ಕುಟುಂಬದ ಪೂರ್ಣ ಸಮ್ಮತಿ:

ಈ ಮದುವೆಯ ಕುರಿತು ಪ್ರತಿಕ್ರಿಯಿಸಿರುವ ಅಬ್ದಾಹ್ ಅವರ ಸಹೋದರ ಹಾಗೂ ಮಲೇಷ್ಯಾದ ಮಾಜಿ ಫುಟ್ಬಾಲ್ ಕೋಚ್ ಯುನುಸ್ ಅಲಿಫ್, “ಆಗಸ್ಟ್ 27ರಂದು ಇಬ್ಬರ ಮದುವೆ ಸಂಪ್ರದಾಯಬದ್ಧವಾಗಿ ನಡೆದಿದೆ. ಎರಡೂ ಕುಟುಂಬದವರು ಪರಸ್ಪರ ಒಪ್ಪಿಗೆ ಸೂಚಿಸಿ, ಆಶೀರ್ವದಿಸಿದ್ದಾರೆ. ಇಬ್ಬರೂ ಸಂತೋಷದಿಂದ ಹೊಸ ಜೀವನ ನಡೆಸಲಿ ಎಂದು ನಾವು ಹಾರೈಸುತ್ತೇವೆ” ಎಂದು ಸ್ಪಷ್ಟಪಡಿಸಿದ್ದಾರೆ.

ಯಾರು ಈ ದತುಕ್ ಅಬ್ದಾಹ್ ಅಲಿಫ್?

ಅಂತಾರಾಷ್ಟ್ರೀಯ ಸಾಧನೆ: 1975ರಿಂದ 1980ರ ಅವಧಿಯಲ್ಲಿ ಮಲೇಷ್ಯಾ ರಾಷ್ಟ್ರೀಯ ತಂಡದ ಪ್ರಮುಖ ಮಿಡ್‌ಫೀಲ್ಡರ್ ಆಗಿ 60 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿ 13 ಗೋಲುಗಳನ್ನು ಗಳಿಸಿದ್ದಾರೆ.

ಒಲಿಂಪಿಕ್ಸ್ ಅರ್ಹತೆ: 1980ರ ಮಾಸ್ಕೋ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದ ಮಲೇಷ್ಯಾದ ಸುವರ್ಣ ಫುಟ್ಬಾಲ್ ತಂಡದ ಪ್ರಮುಖ ಸದಸ್ಯರಲ್ಲಿ ಇವರೂ ಒಬ್ಬರಾಗಿದ್ದರು.

ಸಾಮಾಜಿಕ ಜಾಲತಾಣಗಳಲ್ಲಿ ವಯಸ್ಸಿನ ಅಂತರದ ಬಗ್ಗೆ ಟೀಕೆಗಳು ಕೇಳಿಬಂದರೂ, “ಸಮಾಜದ ಲೆಕ್ಕಾಚಾರಕ್ಕಿಂತ ಪರಸ್ಪರ ಗೌರವ, ನಂಬಿಕೆ ಮತ್ತು ಸಮ್ಮತಿ ಮುಖ್ಯ” ಎಂದು ಅನೇಕರು ಈ ಜೋಡಿಗೆ ಬೆಂಬಲ ಸೂಚಿಸಿದ್ದಾರೆ.