ಪ್ರೇಮ ಸಂಬಂಧ ವಿರೋಧಿಸಿ 21 ವರ್ಷದ ಸಹೋದರಿ ಕತ್ತು ಹಿಸುಕಿ ಕೊಲೆಗೈದ ಅಪ್ರಾಪ್ತ ಸಹೋದರರು: ಆತ್ಮಹತ್ಯೆಯಂತೆ ಬಿಂಬಿಸಲು ಯತ್ನಿಸಿ ಸಿಕ್ಕಿಬಿದ್ದಿದ್ದೇಗೆ?

ಲಕ್ನೋ (ಉತ್ತರ ಪ್ರದೇಶ): ಉತ್ತರ ಪ್ರದೇಶದ ಭದೋಹಿ ಜಿಲ್ಲೆಯಲ್ಲಿ ಸಹೋದರಿಯೊಬ್ಬಳ ಪ್ರೇಮ ಸಂಬಂಧವನ್ನು ವಿರೋಧಿಸಿ, ಅಪ್ರಾಪ್ತ ಸಹೋದರರೇ ಅವಳನ್ನು ಕತ್ತು ಹಿಸುಕಿ ಕೊಲೆ ಮಾಡಿರುವ ಭೀಕರ ಘಟನೆ ಬೆಳಕಿಗೆ ಬಂದಿದೆ. ಕೊಲೆಯ ಬಳಿಕ ಅದನ್ನು ಆತ್ಮಹತ್ಯೆಯೆಂದು ಬಿಂಬಿಸಲು ಮೃತದೇಹವನ್ನು ಮನೆಯೊಳಗೆ ನೇಣುಹಾಕಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಗೋಪಿಗಂಜ್ ಪೊಲೀಸ್ ಠಾಣಾ ವ್ಯಾಪ್ತಿಯ ಜಖಾನ್ ಗ್ರಾಮದ ಟೆರಾಸ್ ಬಿಂಡ್ ಎಂಬುವರ ಪುತ್ರಿ ಖುಷಿ ಬಿಂಡ್ (21) ಎಂಬುವವರ ಮೃತದೇಹ ನವೆಂಬರ್ 4 ರಂದು ಮನೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಮರಣೋತ್ತರ ಪರೀಕ್ಷಾ ವರದಿಯಲ್ಲಿ ಗಂಟಲು ಹಿಸುಕಿ ಕೊಲೆ ಮಾಡಿ ಬಳಿಕ ಶವವನ್ನು ನೇಣುಹಾಕಿರುವುದು ದೃಢಪಟ್ಟಿದೆ. ತಂದೆಯ ದೂರಿನ ಮೇರೆಗೆ ತನಿಖೆ ಕೈಗೊಂಡ ಪೊಲೀಸರು, ವಿಚಾರಣೆ ವೇಳೆ ಮೃತರ ಕಿರಿಯ ಸಹೋದರರಾದ 18 ವರ್ಷದ ಸೂರಜ್ ಬಿಂಡ್ ಹಾಗೂ ಮತ್ತೋರ್ವ 15 ವರ್ಷದ ಅಪ್ರಾಪ್ತ ಸಹೋದರ ತಪ್ಪೊಪ್ಪಿಕೊಂಡಿದ್ದಾರೆ ಎಂದು ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಶುಭಮ್ ಅಗರ್ವಾಲ್ ತಿಳಿಸಿದ್ದಾರೆ.

ಘಟನೆಯ ಹಿನ್ನೆಲೆ: ಯುವತಿಯೊಬ್ಬಳು ಯುವಕನೊಂದಿಗೆ ಫೋನ್‌ನಲ್ಲಿ ಮಾತನಾಡುತ್ತಿರುವುದನ್ನು ಸಹೋದರರು ವಿರೋಧಿಸಿದ್ದು, ಈ ವಿಚಾರವಾಗಿ ನಡೆದ ಜಗಳದಲ್ಲಿ ಆಕೆಯನ್ನು ಕತ್ತು ಹಿಸುಕಿ ಕೊಲೆ ಮಾಡಲಾಗಿದೆ.

ಆತ್ಮಹತ್ಯೆಯ ನಾಟಕ: ಕೊಲೆಯ ನಂತರ ಪ್ರಕರಣವನ್ನು ಮುಚ್ಚಿಹಾಕಲು ಮತ್ತು ಆತ್ಮಹತ್ಯೆಯಂತೆ ಬಿಂಬಿಸಲು ಶವವನ್ನು ಮನೆಯಲ್ಲಿ ನೇಣುಹಾಕಲಾಗಿತ್ತು.

ಮರಣೋತ್ತರ ಪರೀಕ್ಷೆ ರಹಸ್ಯ: ಆರಂಭದಲ್ಲಿ ಆತ್ಮಹತ್ಯೆ ಎಂದು ಶಂಕಿಸಲಾಗಿದ್ದರೂ, ಮರಣೋತ್ತರ ಪರೀಕ್ಷಾ ವರದಿಯಲ್ಲಿ ಕೊಲೆ ಎಂಬುದು ಬಹಿರಂಗಗೊಂಡಿದೆ.

ಪೊಲೀಸ್ ಕ್ರಮ: ಸಂತ್ರತೆಯ ತಂದೆಯ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ಆರೋಪಿ ಸಹೋದರರನ್ನು ವಶಕ್ಕೆ ಪಡೆದು ವಿಚಾರಣೆ ಮುಂದುವರೆಸಲಾಗಿದೆ.