ಸಾರಿಗೆ ಇಲಾಖೆಯ ನಿವೃತ್ತ ಭ್ರಷ್ಟ ಅಧಿಕಾರಿಗೆ ಶಾಕ್: ಮನೆಯಲ್ಲಿ ಸಿಕ್ತು 13 ಕೆಜಿ ಚಿನ್ನ, 9 ಕೆಜಿ ಬೆಳ್ಳಿ ಸೇರಿ 35 ಕೋಟಿ ಅಕ್ರಮ ಆಸ್ತಿ!

ಲಕ್ನೋ: ಉತ್ತರ ಪ್ರದೇಶದ ಭ್ರಷ್ಟಾಚಾರ ನಿಗ್ರಹ ದಳ (Vigilance Establishment) ಭ್ರಷ್ಟ ಅಧಿಕಾರಿಯೊಬ್ಬರ ಮನೆ ಮೇಲೆ ನಡೆಸಿದ ದಾಳಿಯಲ್ಲಿ ಬರೋಬ್ಬರಿ 35 ಕೋಟಿ ರೂಪಾಯಿ ಮೌಲ್ಯದ ಅಕ್ರಮ ಆಸ್ತಿಯನ್ನು ಪತ್ತೆಹಚ್ಚಿದೆ.

ಆಗ್ರಾದ ಮಾಜಿ ಸಹಾಯಕ ಪ್ರಾದೇಶಿಕ ಸಾರಿಗೆ ಅಧಿಕಾರಿ (ARTO) ಲಲಿತ್ ಕುಮಾರ್ ಅವರಿಗೆ ಸೇರಿದ ಲಕ್ನೋದ ಅಲಿಗಂಜ್‌ನಲ್ಲಿರುವ ನಿವಾಸದ ಮೇಲೆ ಮಂಗಳವಾರ ಮತ್ತು ಬುಧವಾರ ವಿಜಿಲೆನ್ಸ್ ತಂಡ ಸರ್ಚ್ ವಾರಂಟ್‌ನೊಂದಿಗೆ ಈ ದಾಳಿ ನಡೆಸಿದೆ. ಆದಾಯಕ್ಕಿಂತ ಹೆಚ್ಚು ಆಸ್ತಿ ಗಳಿಕೆ (Disproportionate Assets) ಪ್ರಕರಣದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.

ಏನೇನು ಜಪ್ತಿ ಮಾಡಲಾಗಿದೆ?

ನಗದು: ಮನೆಯ ವಿವಿಧ ಮೂಲೆಗಳಲ್ಲಿ ಪ್ಯಾಕೆಟ್‌ಗಳಲ್ಲಿ ಬಚ್ಚಿಟ್ಟಿದ್ದ ₹1.62 ಕೋಟಿ ನಗದನ್ನು ವಶಪಡಿಸಿಕೊಳ್ಳಲಾಗಿದೆ.

ಚಿನ್ನ ಮತ್ತು ಬೆಳ್ಳಿ: ಸುಮಾರು 13 ಕೆಜಿ ಚಿನ್ನ (ಬಿಸ್ಕೆಟ್, ಗಟ್ಟಿ ಮತ್ತು ಆಭರಣ ರೂಪದಲ್ಲಿ) ಹಾಗೂ 9 ಕೆಜಿ ಬೆಳ್ಳಿಯನ್ನು ಜಪ್ತಿ ಮಾಡಲಾಗಿದ್ದು, ಇವುಗಳ ಮೌಲ್ಯವೇ ಬರೋಬ್ಬರಿ ₹20 ಕೋಟಿ ಎಂದು ಅಂದಾಜಿಸಲಾಗಿದೆ.

ಸ್ಥಿರ ಆಸ್ತಿಗಳು: ಲಕ್ನೋ, ನೋಯ್ಡಾ, ಬಾರಾಬಂಕಿ ಮತ್ತು ರಾಯ್‌ಬರೇಲಿ ಜಿಲ್ಲೆಗಳಲ್ಲಿರುವ ಹಲವು ವಸತಿ ಮನೆಗಳು, ನಿವೇಶನಗಳು, ಕೃಷಿ ಭೂಮಿ ಹಾಗೂ ಫ್ಲಾಟ್‌ ಬುಕಿಂಗ್‌ಗೆ ಸಂಬಂಧಿಸಿದ ದಾಖಲೆಗಳು ಪತ್ತೆಯಾಗಿದ್ದು, ಇವುಗಳ ಮೌಲ್ಯ ಸುಮಾರು ₹13 ಕೋಟಿ ಎನ್ನಲಾಗಿದೆ.

ಹೂಡಿಕೆಗಳು: ಬ್ಯಾಂಕ್ ಡೆಪಾಸಿಟ್‌ಗಳು, ಪೋಸ್ಟ್ ಆಫೀಸ್ ಯೋಜನೆಗಳು ಮತ್ತು ಮ್ಯೂಚುಯಲ್ ಫಂಡ್‌ಗಳಲ್ಲಿ ₹1 ಕೋಟಿಗೂ ಅಧಿಕ ಹೂಡಿಕೆ ಮಾಡಿರುವುದು ಬೆಳಕಿಗೆ ಬಂದಿದೆ.

ದಾಳಿಯ ವೇಳೆ ಟೊಯೋಟಾ ಇನ್ನೋವಾ, ಹ್ಯುಂಡೈ i20 ಕಾರುಗಳು ಹಾಗೂ ಒಂದು ರಿವಾಲ್ವರ್ ಅನ್ನು ಸಹ ವಶಪಡಿಸಿಕೊಳ್ಳಲಾಗಿದೆ. ಈ ಯಶಸ್ವಿ ಕಾರ್ಯಾಚರಣೆ ನಡೆಸಿದ ಲಕ್ನೋ ಸೆಕ್ಟರ್ ವಿಜಿಲೆನ್ಸ್ ತಂಡಕ್ಕೆ ಡಿಜಿಪಿ ₹1 ಲಕ್ಷ ನಗದು ಬಹುಮಾನ ಘೋಷಿಸಿದ್ದಾರೆ. ಸದ್ಯ ಅಧಿಕಾರಿಗಳು ವಶಪಡಿಸಿಕೊಂಡ ದಾಖಲೆಗಳ ಪರಿಶೀಲನೆ ನಡೆಸುತ್ತಿದ್ದು, ತನಿಖೆ ಮುಂದುವರಿದಿದೆ.