IAS ಕನಸು, ಚಹಾ ಅಂಗಡಿ ಬಂಡವಾಳ: ಸಂಕಷ್ಟಕ್ಕೂ ಜಗ್ಗದ ಉತ್ತರ ಪ್ರದೇಶದ ಮೂವರು ಸಹೋದರಿಯರ ಸ್ಪೂರ್ತಿದಾಯಕ ಕಥೆ

ಉತ್ತರ ಪ್ರದೇಶ: ಮಹಾರಾಜ್‌ಗಂಜ್ ಜಿಲ್ಲೆಯ ವರ್ತಿಕಾ, ವಂದಿತಾ ಹಾಗೂ ಅವರ ಕಿರಿಯ ಸಹೋದರಿ (ಅವಂತಿಕಾ) ತಮ್ಮ ಐಎಎಸ್ (IAS) ಅಧಿಕಾರಿಯಾಗುವ ಕನಸನ್ನು ನನಸಾಗಿಸಿಕೊಳ್ಳಲು ಹಗಲಿರುಳು ಶ್ರಮಿಸುತ್ತಿದ್ದಾರೆ. ವಿಶ್ವವಿದ್ಯಾಲಯದ ಮುಖ್ಯ ದ್ವಾರದ ಬಳಿ ಚಹಾ ಅಂಗಡಿ ನಡೆಸುತ್ತಾ ಅಧ್ಯಯನ ಮಾಡುತ್ತಿರುವ ಈ ಸಹೋದರಿಯರ ಛಲ ಹಾಗೂ ಪರಿಶ್ರಮದ ಕಥೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆಗೆ ಪಾತ್ರವಾಗಿದೆ.

ಇವರ ತಂದೆ ರಾಮಸಕಲ್ ಉಪಾಧ್ಯಾಯ ಅವರು ವಿಮಾ ಸಂಸ್ಥೆಯೊಂದರಲ್ಲಿ ಮ್ಯಾನೇಜರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಆದರೆ, 2017ರಲ್ಲಿ ಅವರು ಪಾರ್ಶ್ವವಾಯು (Paralysis) ಪೀಡಿತರಾಗಿ ಕೆಲಸ ಕಳೆದುಕೊಂಡ ನಂತರ ಕುಟುಂಬ ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿತು. ಆರಂಭದಲ್ಲಿ ಟ್ಯೂಷನ್ ಹೇಳಿಕೊಟ್ಟು ಜೀವನ ಸಾಗಿಸಲು ಯತ್ನಿಸಿದರೂ ಕುಟುಂಬ ನಿಭಾಯಿಸುವುದು ಕಷ್ಟವಾಯಿತು. ಕೊನೆಗೆ ₹8,000 ಬಂಡವಾಳದೊಂದಿಗೆ ವಿಶ್ವವಿದ್ಯಾಲಯದ ಗೇಟ್ ಬಳಿ ‘ಬಿ ಬಿಲೀವರ್’ (B believer) ಎಂಬ ಚಹಾ ಅಂಗಡಿ ತೆರೆದರು.

ಸಾಮಾಜಿಕ ಆಕ್ಷೇಪಗಳನ್ನು ಎದುರಿಸಿಯೂ, ಮುಂಜಾನೆಯಿಂದ ಸಂಜೆಯವರೆಗೆ ಅಂಗಡಿಯಲ್ಲಿ ಶ್ರಮಿಸುವ ಈ ಸಹೋದರಿಯರು, ರಾತ್ರಿ 10 ಗಂಟೆಯ ನಂತರ ಕನಿಷ್ಠ ಮೂರು ಗಂಟೆಗಳ ಕಾಲ ಏಕಾಗ್ರತೆಯಿಂದ ವ್ಯಾಸಂಗ ಮಾಡುತ್ತಾರೆ. ಹಿರಿಯ ಸಹೋದರಿ ವರ್ತಿಕಾ ಪದವಿ ಮುಗಿಸಿ ಯುಪಿಎಸ್‌ಸಿ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದು, ಕಿರಿಯ ಸಹೋದರಿಯರೂ ಶಾಲಾ ಶಿಕ್ಷಣದ ಜೊತೆಗೆ ಐಎಎಸ್ ಕನಸಿನೊಂದಿಗೆ ಅಧ್ಯಯನ ಮುಂದುವರಿಸಿದ್ದಾರೆ.

ಈ ಸಹೋದರಿಯರ ಕಥೆ ವೈರಲ್ ಆಗುತ್ತಿದ್ದಂತೆ, ಗೋರಖ್‌ಪುರ ಜಿಲ್ಲಾಧಿಕಾರಿ ದೀಪಕ್ ಮೀನಾ ಅವರು ಖುದ್ದಾಗಿ ದೂರವಾಣಿ ಕರೆ ಮಾಡಿ ಅಭಿನಂದನೆ ಸಲ್ಲಿಸಿದ್ದಾರೆ. ತಮ್ಮ ನಿವಾಸಕ್ಕೆ ಆಹ್ವಾನಿಸಿರುವ ಜಿಲ್ಲಾಧಿಕಾರಿಗಳು, ಸರ್ಕಾರದ ವತಿಯಿಂದ ಅಗತ್ಯ ನೆರವು ನೀಡುವ ಭರವಸೆ ನೀಡಿದ್ದು, ಸಹೋದರಿಯರ ಆತ್ಮವಿಶ್ವಾಸವನ್ನು ಮತ್ತಷ್ಟು ಹೆಚ್ಚಿಸಿದೆ.