SUDDIKSHANA KANNADA NEWS/ DAVANAGERE/ DATE:05-03-2024
ದಾವಣಗೆರೆ: ನಮನ ಅಕಾಡೆಮಿಯು ಸತತ 4ನೇ ವರ್ಷಗಳಿಂದಲೂ ಶಿವರಾತ್ರಿಯಂದು ವಿಶೇಷ ಕಾರ್ಯಕ್ರಮ ನಡೆಸಿಕೊಂಡು ಬರುತ್ತಿದ್ದು ಈ ವರ್ಷವೂ ಮಾರ್ಚ್ 8ರ ಶಿವರಾತ್ರಿ ಹಬ್ಬದಂದು ಕನ್ನಡ ಮತ್ತು ಸಂಸ್ಕೃತಿ
ಇಲಾಖೆಯ ಸಹಕಾರದೊಂದಿಗೆ “ಶಿವಸ್ಮರಣೆ ನೃತ್ಯ ಜಾಗರಣೆ” ಹಮ್ಮಿಕೊಂಡಿದೆ.
ಶಿವರಾತ್ರಿಯಂದು ರಾತ್ರಿ 9 ಗಂಟೆಯಿಂದ ಬೆಳಗಿನ ಜಾವ 3 ಗಂಟೆಯವರೆಗೆ ದಾವಣಗೆರೆಯ ಪ್ರತಿಷ್ಠಿತ ನಾಲ್ಕು ದೇವಸ್ಥಾನಗಳಲ್ಲಿ ಒಂದರ ನಂತರ ಒಂದರಂತೆ ನೃತ್ಯಸೇವೆಯನ್ನು ಮಾಡುವ ಮೂಲಕ ಶಿವನಿಗೆ “ಶಿವಸ್ಮರಣೆ”ಯನ್ನು
ನೃತ್ಯ ಜಾಗರಣೆಯ ಮೂಲಕ ಸಮರ್ಪಿಸುತ್ತಿದೆ ಎಂದು ನಮನ ಅಕಾಡೆಮಿ ಉಪಾಧ್ಯಕ್ಷ ದಿನೇಶ್ ಕೆ. ಶೆಟ್ಟಿ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.
ಅಂದು ರಾತ್ರಿ 9.30 ಕ್ಕೆ ನಗರದ ರಿಂಗ್ ರಸ್ತೆಯಲ್ಲಿರುವ “ಶ್ರೀ ಶಾರದಾ ಮಂದಿರ”ದಲ್ಲಿ ಕಾರ್ಯಕ್ರಮಕ್ಕೆ ಚಾಲನೆ ಸಿಗಲಿದೆ. ಮುಖ್ಯ ಅತಿಥಿಗಳಾಗಿ ದಾವಣಗೆರೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕ ರವಿಚಂದ್ರ ಮತ್ತು ಶ್ರೀ ಶಂಕರ ಸೇವಾ ಸಂಘದ ಅಧ್ಯಕ್ಷ ಡಾ. ಬಿ.ಟಿ. ಅಚ್ಯುತ್‌ರವರು ಭಾಗವಹಿಸಲಿದ್ದಾರೆ. ನಮನ ಅಕಾಡೆಮಿಯ ಗೌರವಾಧ್ಯಕ್ಷ ಡಾ. ಎ. ಎಂ. ಶಿವಕುಮಾರ್, ನಮನ ಅಕಾಡೆಮಿಯ ಉಪಾಧ್ಯಕ್ಷ ದಿನೇಶ್ ಕೆ. ಶೆಟ್ಟಿ, ನಾಗಭೂಷಣ್ ಆರ್.ಎಲ್. ಹಾಗೂ ಅಕಾಡೆಮಿಯ ನಿರ್ದೇಶಕರು ಹಾಜರಿರುವರು ಎಂದು ಹೇಳಿದರು.
ರಾತ್ರಿ 11ಕ್ಕೆ ಜಯದೇವ ಸರ್ಕಲ್‌ನಲ್ಲಿರುವ ಶ್ರೀ ಕೂಡಲಿ ಶಂಕರ ಮಠದಲ್ಲಿ, ರಾತ್ರಿ 12.30 ಕ್ಕೆ ಗೀತಾಂಜಲಿ ಟಾಕೀಸ್ ಪಕ್ಕದಲ್ಲಿರುವ ಶ್ರೀ ಲಿಂಗೇಶ್ವರ ದೇವಸ್ಥಾನದಲ್ಲಿ ಹಾಗೂ ರಾತ್ರಿ 2.00 ಕ್ಕೆ ವಿದ್ಯಾನಗರದ ಶ್ರೀ ಶಿವ ಪಾರ್ವತಿ ದೇವಸ್ಥಾನದಲ್ಲಿ ನೃತ್ಯ ಸೇವೆಯನ್ನು ಮಾಡುವುದರ ಮೂಲಕ ಶಿವನಿಗೆ ನೃತ್ಯ ಜಾಗರಣೆಯನ್ನು ಸಮರ್ಪಿಸಲಿದ್ದಾರೆ ಎಂದು ಮಾಹಿತಿ ನೀಡಿದರು.
ಶಿವಸ್ಮರಣೆ ನೃತ್ಯ ಜಾಗರಣೆಯಲ್ಲಿ ನಮನ ಅಕಾಡೆಮಿಯ ಗುರು ವಿದುಷಿ ಮಾಧವಿ ಡಿ.ಕೆ. ಮತ್ತು ಅವರ ಶಿಷ್ಯಂದಿರಾದ ಕುಮಾರಿ ಯುಕ್ತಿ ಎಸ್., ಗೌರಿ ಬಿ.ಟಿ., ನಿಧಿ ಪಿ. ಧೂಳೆಹೊಳೆ, ಋತು ಹಿರೇಮಠ್, ಪವನ್ ಕುಮಾರ್ ಎನ್.ಟಿ., ಸಂಸ್ಕೃತಿ ಜೆ. ಆಚಾರ್, ಸಂಜನ ಎನ್. ಹಾಗೂ ನೀಲು ಅರೋರ್ ಎಸ್. ಇವರು ನೃತ್ಯವನ್ನು ಸಮರ್ಪಿಸಲಿದ್ದಾರೆ ಎಂದರು.
ಕಾರ್ಯಕ್ರಮಕ್ಕೆ ಎಲ್ಲರೂ ಬಂದು ಪ್ರೋತ್ಸಾಹಿಸಿ, ವಿನೂತನ “ಶಿವಸ್ಮರಣೆ ನೃತ್ಯ ಜಾಗರಣೆ”ಗೆ ಸಾಕ್ಷಿಯಾಗಬೇಕೆಂದು “ನಮನ ಅಕಾಡೆಮಿ”ಯ ಆಡಳಿತ ಮಂಡಳಿ, ಶಿಷ್ಯವೃಂದ, ಪೋಷಕರಲ್ಲಿ ಮನವಿ ಮಾಡುವುದಾಗಿ ತಿಳಿಸಿದರು. ಗೋಷ್ಠಿಯಲ್ಲಿ ವಿದುಷಿ ಮಾಧವಿ ಡಿ. ಕೆ. ಮತ್ತಿತರರು ಹಾಜರಿದ್ದರು.
