ಭಾರತಕ್ಕೆ ದಾವೂದ್ ಇಬ್ರಾಹಿಂ ಆಪ್ತ, ಡ್ರಗ್ ಕಿಂಗ್‌ಪಿನ್ ಸಲೀಂ ಡೋಲಾ ಹಸ್ತಾಂತರ: ಟರ್ಕಿಯಿಂದ ದೆಹಲಿಗೆ ಆಗಮನ

ನವದೆಹಲಿ: ಭೂಗತ ಪಾತಕಿ ದಾವೂದ್ ಇಬ್ರಾಹಿಂನ ಆಪ್ತ ಹಾಗೂ ಅಂತರಾಷ್ಟ್ರೀಯ ಮಾದಕವಸ್ತು ಜಾಲದ ಪ್ರಮುಖ ಸೂತ್ರಧಾರಿ ಸಲೀಂ ಡೋಲಾನನ್ನು ಟರ್ಕಿಯಿಂದ ಭಾರತಕ್ಕೆ ಯಶಸ್ವಿಯಾಗಿ ಹಸ್ತಾಂತರಿಸಲಾಗಿದೆ.

ಟರ್ಕಿಯ ಇಸ್ತಾಂಬುಲ್‌ನಲ್ಲಿ ಅಡಗಿ ಕುಳಿತಿದ್ದ ಈತನನ್ನು ಭಾರತದ ಗುಪ್ತಚರ ಸಂಸ್ಥೆಗಳು ಮತ್ತು ಟರ್ಕಿ ಪೊಲೀಸರ ಜಂಟಿ ಕಾರ್ಯಾಚರಣೆಯ ಮೂಲಕ ಬಂಧಿಸಲಾಗಿತ್ತು. ಇಂದು (ಏಪ್ರಿಲ್ 28) ದೆಹಲಿಯ ತಾಂತ್ರಿಕ ವಿಮಾನ ನಿಲ್ದಾಣಕ್ಕೆ ಡೋಲಾನನ್ನು ಕರೆತರಲಾಗಿದ್ದು, ಬಳಿಕ ಹೆಚ್ಚಿನ ವಿಚಾರಣೆಗಾಗಿ ಮುಂಬೈ ಪೊಲೀಸರಿಗೆ ಹಸ್ತಾಂತರಿಸಲಾಗುವುದು.

ಹಿನ್ನೆಲೆ:

ಮುಂಬೈನ ಡೋಂಗ್ರಿ ನಿವಾಸಿಯಾದ ಸಲೀಂ ಡೋಲಾ, ಕಳೆದ ಒಂದು ದಶಕದಿಂದ ವಿದೇಶದಲ್ಲಿ ತಲೆಮರೆಸಿಕೊಂಡು ಸಿಂಥೆಟಿಕ್ ಡ್ರಗ್ಸ್ (MD) ಮತ್ತು ಫೆಂಟಾನಿಲ್ ಮಾತ್ರೆಗಳ ತಯಾರಿಕೆ ಹಾಗೂ ಮಾರಾಟದ ಬೃಹತ್ ಜಾಲವನ್ನು ನಡೆಸುತ್ತಿದ್ದನು. ಕಳೆದ ವರ್ಷ ಈತನ ಮಗ ತಾಹಿರ್ ಡೋಲಾನನ್ನು ಸಹ ಯುಎಇಯಿಂದ ಗಡಿಪಾರು ಮಾಡಲಾಗಿತ್ತು. ಸದ್ಯ ಈತನ ಬಂಧನವು ದಾವೂದ್ ಇಬ್ರಾಹಿಂನ ‘ಡಿ-ಕಂಪನಿ’ಯ ಆರ್ಥಿಕ ಮೂಲಗಳಿಗೆ ದೊಡ್ಡ ಹೊಡೆತ ನೀಡಿದಂತಾಗಿದೆ.