40, 50, 60 ರ ಹರೆಯದ ಮಹಿಳೆಯರ ವಯಸ್ಸಿಗೆ ತಕ್ಕ ಫಿಟ್‌ನೆಸ್: ಮಹಿಳೆಯರ ಆರೋಗ್ಯಕ್ಕಾಗಿ ಸೆಲೆಬ್ರಿಟಿ ಪೌಷ್ಟಿಕತಜ್ಞೆಯ ಮಹತ್ವದ ಸಲಹೆಗಳು

ನವದೆಹಲಿ: ವಯಸ್ಸಾದಂತೆ ಮಹಿಳೆಯರ ದೇಹದಲ್ಲಿ ಹಲವು ಹಾರ್ಮೋನ್ ಬದಲಾವಣೆಗಳು ಹಾಗೂ ದೈಹಿಕ ನೊವುಗಳು ಸಾಮಾನ್ಯ. ಆದರೆ ಸರಿಯಾದ ಜೀವನಶೈಲಿ ಮತ್ತು ಆರೋಗ್ಯಕರ ಅಭ್ಯಾಸಗಳ ಮೂಲಕ ಈ ವಯಸ್ಸಿನಲ್ಲೂ ಸದೃಢ ಹಾಗೂ ಸಂತೋಷದ ಜೀವನ ನಡೆಸಬಹುದು. ಈ ನಿಟ್ಟಿನಲ್ಲಿ, ಪ್ರಸಿದ್ಧ ಪೌಷ್ಟಿಕತಜ್ಞೆ ರುಜುತಾ ದಿವೇಕರ್  ಅವರು 40, 50 ಮತ್ತು 60 ರ ಹರೆಯದ ಮಹಿಳೆಯರಿಗಾಗಿ ಮೂರು ಪ್ರಮುಖ ಆರೋಗ್ಯ ಸಲಹೆಗಳನ್ನು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

ವಯಸ್ಸಿಗೆ ತಕ್ಕಂತೆ ದೇಹದ ಚಯಾಪಚಯ ಕ್ರಿಯೆ ಬದಲಾಗುವುದರಿಂದ, ತ್ವರಿತ ತೂಕ ಇಳಿಕೆಯ ಬೆನ್ನಟ್ಟುವ ಬದಲು ದೈಹಿಕ ಸ್ವಾಸ್ಥ್ಯದ ಕಡೆಗೆ ಹೆಚ್ಚು ಗಮನಹರಿಸಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.

ದೈನಂದಿನ ಚಲನವಲನ ಮತ್ತು ಯೋಗ: ಭಂಗಿ ಸುಧಾರಿಸಲು, ಬೆನ್ನು, ಸೊಂಟ ಹಾಗೂ ಭುಜಗಳನ್ನು ಬಲಪಡಿಸಲು ಯೋಗಾಸನಗಳು, ವಿಶೇಷವಾಗಿ ತಲೆಕೆಳಗಾಗಿ ನಿಲ್ಲುವ ಆಸನಗಳು (ಶೀರ್ಷಾಸನ, ಸರ್ವಾಂಗಾಸನ) ಸಹಕಾರಿ. ಆದರೆ ಆರೋಗ್ಯದ ಸ್ಥಿತಿಗೂ ಅನುಗುಣವಾಗಿ ತಜ್ಞರ ಮಾರ್ಗದರ್ಶನದಲ್ಲಿ ಇದನ್ನು ಮಾಡಬೇಕು.

ಪೌಷ್ಟಿಕಾಂಶಯುಕ್ತ ಆಹಾರ: ಹಾರ್ಮೋನುಗಳ ಸಮತೋಲನಕ್ಕಾಗಿ ವಾರದ ಆಹಾರದಲ್ಲಿ ಗೆಣಸು, ಬೀಟ್‌ರೂಟ್‌ನಂತಹ ಬೇರು ತರಕಾರಿಗಳನ್ನು (Root Veggies), ಸಿರಿಧಾನ್ಯಗಳು (Millets) ಮತ್ತು ಕಡಲೆಕಾಯಿಯನ್ನು ನಿಯಮಿತವಾಗಿ ಸೇರಿಸಿಕೊಳ್ಳಬೇಕು.

ತ್ವರಿತ ತೂಕ ಇಳಿಕೆಗೆ ಒತ್ತಡ ಬೇಡ: ಅತಿವೇಗವಾಗಿ ತೂಕ ಇಳಿಸಿಕೊಳ್ಳುವ ತಪ್ಪು ದಾರಿ ತುಳಿಯುವ ಬದಲು, ತಾಳ್ಮೆ ಮತ್ತು ಸ್ಥಿರತೆಯಿಂದ ಆರೋಗ್ಯ ಕಾಪಾಡಿಕೊಳ್ಳಿ. ತೂಕಕ್ಕಿಂತ ಸೊಂಟ ಹಾಗೂ ಸೊಂಟ-ಶ್ರೋಣಿಯ ಅನುಪಾತವನ್ನು ಗಮನಿಸುವುದು ಉತ್ತಮ.

ಆರೋಗ್ಯಕರ ವೃದ್ಧಾಪ್ಯ ಎಂದರೆ 25 ವರ್ಷದ ಯೌವನದ ದೇಹವನ್ನು ಮರಳಿ ಪಡೆಯುವುದಲ್ಲ, ಬದಲಿಗೆ ಭವಿಷ್ಯದಲ್ಲಿ ದೃಢತೆ ಹಾಗೂ ಚೈತನ್ಯದಿಂದ ಜೀವಿಸುವುದಾಗಿದೆ ಎಂದು ರುಜುತಾ ದಿವೇಕರ್ ತಿಳಿಸಿದ್ದಾರೆ.