“ವೋಟ್ ಕಳವು ಅಹಂಕಾರ ತರುತ್ತದೆ”: ದೆಹಲಿ ಸಚಿವರ ಹಲ್ಲೆ ವಿಡಿಯೋ ಉಲ್ಲೇಖಿಸಿ ಬಿಜೆಪಿ ವಿರುದ್ಧ ರಾಹುಲ್ ಗಾಂಧಿ ವಾಗ್ದಾಳಿ!

ನವದೆಹಲಿ: ದೆಹಲಿಯ ತಿಲಕ್ ನಗರದಲ್ಲಿ ರಸ್ತೆ ಕಾಮಗಾರಿ ಪರಿಶೀಲನೆ ನಡೆಸುತ್ತಿದ್ದ ವೇಳೆ ದೆಹಲಿ ಪಿಡಬ್ಲ್ಯೂಡಿ ಸಚಿವ ಪರ್ವೇಶ್ ಸಾಹಿಬ್ ಸಿಂಗ್ ವರ್ಮಾ ಅವರು ಯುವಕನೊಬ್ಬನಿಗೆ ಕಪಾಳಮೋಕ್ಷ ಮಾಡಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ರಾಜಕೀಯ ವಾಗ್ದಾಳಿಗೆ ಕಾರಣವಾಗಿದೆ. ಈ ಘಟನೆಯನ್ನು ಉಲ್ಲೇಖಿಸಿ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರು ಬಿಜೆಪಿ ವಿರುದ್ಧ ತೀವ್ರ ಪ್ರಹಾರ ನಡೆಸಿದ್ದಾರೆ.

ರಾಹುಲ್ ಗಾಂಧಿ ಆರೋಪ:

ಘಟನೆ ಕುರಿತು ‘ಎಕ್ಸ್’ (ಟ್ವಿಟರ್) ನಿಕಟವಾಗಿ ಪ್ರತಿಕ್ರಿಯಿಸಿರುವ ರಾಹುಲ್ ಗಾಂಧಿ, “ಕ್ಯಾಮೆರಾ ಹಿಡಿದು ವಿಡಿಯೋ ಮಾಡುತ್ತಿದ್ದ ಯುವಕನಿಗೆ ಸಚಿವರು ಹೊಡೆದಿದ್ದಾರೆ. ಇದು ಮತದಾರರ ಭಯವೇ ಇಲ್ಲದ ಅಧಿಕಾರದ ಮುಖ. ಬೀದಿಯಲ್ಲಿ ಪ್ರಶ್ನೆ ಕೇಳಿದರೆ ಕಪಾಳಮೋಕ್ಷ, ಪರೀಕ್ಷೆ ಪ್ರಶ್ನೆಪತ್ರಿಕೆ ಸೋರಿಕೆ ಬಗ್ಗೆ ಕೇಳಿದರೆ ಲಾಠಿಚಾರ್ಜ್, ಸಂಸತ್ತಿನಲ್ಲಿ ಪ್ರಶ್ನಿಸಿದರೆ ಮೈಕ್ ಆಫ್ ಮಾಡಲಾಗುತ್ತದೆ” ಎಂದು ವಾಗ್ದಾಳಿ ನಡೆಸಿದರು. ಅಲ್ಲದೆ, “ವೋಟ್ ಕಳವು ಕೇವಲ ಚುನಾವಣಾ ಫಲಿತಾಂಶವನ್ನು ತರುವುದಿಲ್ಲ, ಅದರ ಜೊತೆಗೆ ಅಹಂಕಾರವನ್ನೂ ತರುತ್ತದೆ” ಎಂದು ಆರೋಪಿಸಿದರು.

ಸಚಿವರ ಸ್ಪಷ್ಟನೆ ಹಾಗೂ ಸಮರ್ಥನೆ:

ರಾಹುಲ್ ಗಾಂಧಿ ಅವರ ಆರೋಪಕ್ಕೆ ತಿರುಗೇಟು ನೀಡಿರುವ ಸಚಿವ ಪರ್ವೇಶ್ ವರ್ಮಾ, “ರಾಹುಲ್ ಜೀ, ನಿಮಗೆ ಏನೂ ತಿಳಿದಿಲ್ಲ” ಎಂದಿದ್ದಾರೆ. ವೈರಲ್ ವಿಡಿಯೋ ಅರ್ಧಸತ್ಯದಿಂದ ಕೂಡಿದೆ ಎಂದಿರುವ ಸಚಿವರು, ಆಮ್ ಆದ್ಮಿ ಪಾರ್ಟಿ (AAP) ಶಾಸಕ ಜರ್ನೈಲ್ ಸಿಂಗ್ ಕರೆಸಿದ್ದ ಕಾರ್ಯಕರ್ತರು ತಮ್ಮ ಕುಟುಂಬದವರನ್ನು ನಿಂದಿಸಿದ್ದರಿಂದ ಕೋಪಗೊಂಡು ಸಾಮಾನ್ಯ ಮನುಷ್ಯನಂತೆ ಪ್ರತಿಕ್ರಿಯಿಸಿದ್ದಾಗಿ ಸಮರ್ಥಿಸಿಕೊಂಡಿದ್ದಾರೆ.

ಘಟನೆಯಲ್ಲಿ ಹಲ್ಲೆಗೊಳಗಾದ ಸಾಹೇಬ್ ಸಿಂಗ್ ಅವರು ಆಪ್ ಶಾಸಕರ ಸಾಮಾಜಿಕ ಜಾಲತಾಣ ನಿರ್ವಹಣೆ ಮಾಡುತ್ತಿದ್ದು, ವಿಕಾಸಪುರಿ ಪೊಲೀಸ್ ಠಾಣೆಯಲ್ಲಿ ಸಚಿವರ ವಿರುದ್ಧ ದೂರು ದಾಖಲಿಸಿದ್ದಾರೆ. ದೆಹಲಿ ಪೊಲೀಸರು ಪ್ರಕರಣದ ತನಿಖೆ ನಡೆಸುತ್ತಿದ್ದಾರೆ.