Home ಕ್ರೈಂ ನ್ಯೂಸ್ “ಇದು ವಿದಾಯ, ಫೋಟೋ ಶೂಟ್ ಅಲ್ಲ”: ಖ್ಯಾತ ನಿರ್ದೇಶಕ ಭಾಗ್ಯರಾಜ್ ನಿಧನ ಬೆನ್ನಲ್ಲೇ ಕ್ಯಾಮೆರಾ ಕಣ್ಣುಗಳಿಗೆ ರಾಧಿಕಾ ಕ್ಲಾಸ್!
ಕ್ರೈಂ ನ್ಯೂಸ್ದಾವಣಗೆರೆನವದೆಹಲಿಬೆಂಗಳೂರುಸಿನಿಮಾ

“ಇದು ವಿದಾಯ, ಫೋಟೋ ಶೂಟ್ ಅಲ್ಲ”: ಖ್ಯಾತ ನಿರ್ದೇಶಕ ಭಾಗ್ಯರಾಜ್ ನಿಧನ ಬೆನ್ನಲ್ಲೇ ಕ್ಯಾಮೆರಾ ಕಣ್ಣುಗಳಿಗೆ ರಾಧಿಕಾ ಕ್ಲಾಸ್!

Share
ರಾಧಿಕಾ
Share

ಚೆನ್ನೈ: ತಮಿಳು ಚಿತ್ರರಂಗದ ಹಿರಿಯ ಮತ್ತು ಖ್ಯಾತ ನಿರ್ದೇಶಕ ಕೆ. ಭಾಗ್ಯರಾಜ್ (73) ಅವರ ನಿಧನದ ಬೆನ್ನಲ್ಲೇ, ಅವರ ಅಂತ್ಯಕ್ರಿಯೆಯ ಸಂದರ್ಭದಲ್ಲಿ ಪಾಪರಾಜಿಗಳು ಹಾಗೂ ಸಾರ್ವಜನಿಕರ ವರ್ತನೆಯ ವಿರುದ್ಧ ಹಿರಿಯ ನಟಿ ರಾಧಿಕಾ ಶರತ್‌ಕುಮಾರ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

“ಅಂತ್ಯಕ್ರಿಯೆ ಎಂಬುದು ಗೌರವಯುತ ವಿದಾಯವೇ ಹೊರತು, ಕಂಟೆಂಟ್ ಕ್ರಿಯೇಷನ್ ಮಾಡುವ ಫೋಟೋ ಶೂಟ್ ಜಾಗವಲ್ಲ” ಎಂದು ಅವರು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಜೂನ್ 27 ರಂದು ಹೃದಯಾಘಾತದಿಂದ ನಿಧನರಾದ ಕೆ. ಭಾಗ್ಯರಾಜ್ ಅವರ ಅಂತಿಮ ಸಂಸ್ಕಾರ ಜೂನ್ 28 ರಂದು ಚೆನ್ನೈನ ಬೆಸೆಂಟ್ ನಗರ ಚಿತಾಗಾರದಲ್ಲಿ ಸಕಲ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿತು. ಈ ವೇಳೆ ಚಿತ್ರರಂಗದ ಗಣ್ಯರು ಹಾಗೂ ಕುಟುಂಬಸ್ಥರು ತೀವ್ರ ದುಃಖದಲ್ಲಿದ್ದಾಗ, ಕೆಲವು ಮಾಧ್ಯಮ ಪ್ರತಿನಿಧಿಗಳು ಮತ್ತು ಸಾರ್ವಜನಿಕರು ಮೊಬೈಲ್ ಕ್ಯಾಮೆರಾಗಳನ್ನು ಕುಟುಂಬಸ್ಥರ ಮುಖದ ಹತ್ತಿರ ಜೂಮ್ ಮಾಡುವುದು ಮತ್ತು ಸೆಲ್ಫಿ ತೆಗೆದುಕೊಳ್ಳಲು ಮುಗಿಬೀಳುತ್ತಿದ್ದರು.

ಇದನ್ನು ಕಂಡು ಕೆರಳಿದ ನಟಿ ರಾಧಿಕಾ ಶರತ್‌ಕುಮಾರ್, ಸ್ಥಳದಲ್ಲೇ ಜನರ ಸಾರ್ವಜನಿಕ ವರ್ತನೆಯನ್ನು ಖಂಡಿಸಿ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಈ ಕುರಿತು ಸೋಷಿಯಲ್ ಮೀಡಿಯಾ ಹಾಗೂ ಮಾಧ್ಯಮಗಳೊಂದಿಗೆ ಮಾತನಾಡಿದ ರಾಧಿಕಾ, “ಸಿನಿಮಾ ನಮ್ಮ ವೃತ್ತಿಯಷ್ಟೇ, ಆದರೆ ನಾವೂ ಕೊನೆಯಲ್ಲಿ ಮನುಷ್ಯರೇ. ಟಿಆರ್‌ಪಿ ರೇಟಿಂಗ್‌ಗಾಗಿ ಡ್ರಾಮಾ ಬೇಕಿದ್ದರೆ ನಾನೇ ಮಾಡಿಕೊಡುತ್ತೇನೆ, ದಯವಿಟ್ಟು ಇಂತಹ ದುಃಖದ ಸಮಯದಲ್ಲಿ ಕುಟುಂಬದ ಖಾಸಗಿತನವನ್ನು ಗೌರವಿಸಿ. ಕಂಟೆಂಟ್‌ಗಿಂತ ಮಾನವೀಯತೆ ದೊಡ್ಡದಾಗಿರಬೇಕು” ಎಂದು ಭಾವುಕರಾಗಿ ಮನವಿ ಮಾಡಿದ್ದಾರೆ. ಅಲ್ಲದೆ, ಸೆಲೆಬ್ರಿಟಿಗಳ ಅಂತ್ಯಕ್ರಿಯೆಯ ಮಾಧ್ಯಮ ಕವರೇಜ್‌ಗೆ ಸರ್ಕಾರ ಕಟ್ಟುನಿಟ್ಟಿನ ನಿಯಮಗಳನ್ನು ರೂಪಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಮತ್ತೊಂದೆಡೆ, ಭಾಗ್ಯರಾಜ್ ಅವರ ಪತ್ನಿ ಪೂರ್ಣಿಮಾ ಅವರು ಶವವಾಹನದಲ್ಲಿ ಹೋಗುತ್ತಿದ್ದಾಗ ವಿಡಿಯೋ ಮಾಡಲು ಯತ್ನಿಸಿದ ಜನರನ್ನು ನಟಿ ಸುಹಾಸಿನಿ ಮಣಿರತ್ನಂ ಅವರು ಕೂಡ ತಡೆದು ತರಾಟೆಗೆ ತೆಗೆದುಕೊಂಡ ಘಟನೆ ನಡೆದಿದೆ. ಇತ್ತೀಚೆಗಷ್ಟೇ ನಿರ್ದೇಶಕ ಭಾರತಿರಾಜ ಅವರ ಅಂತ್ಯಕ್ರಿಯೆಯಲ್ಲೂ ಇಂಥದ್ದೇ ಅರಾಜಕತೆ ಸೃಷ್ಟಿಯಾಗಿದ್ದನ್ನು ನಟಿ ರಾಧಿಕಾ ಈ ಸಂದರ್ಭದಲ್ಲಿ ನೆನಪಿಸಿಕೊಂಡಿದ್ದಾರೆ.

Share

Recent Posts

Recent Comments

No comments to show.
Related Articles