ಕೆನಡಾದಿಂದ ವಾಪಸಾಗಿದ್ದ 20 ವರ್ಷದ ಯುವಕ ಶವವಾಗಿ ಪತ್ತೆ: ಹಣಕ್ಕಾಗಿ ಕರೆಂಟ್ ಶಾಕ್ ನೀಡಿ ಕೊಲೆ, ಪೋಷಕರ ಗಂಭೀರ ಆರೋಪ!

ಪಂಜಾಬ್: ಕೆನಡಾದಿಂದ ಭಾರತಕ್ಕೆ ವಾಪಸಾಗಿ ಕೇವಲ ಎರಡು ತಿಂಗಳಾಗಿದ್ದ 20 ವರ್ಷದ ಯುವಕನೊಬ್ಬ ಪಂಜಾಬ್‌ನ ಮೋಗಾ ಜಿಲ್ಲೆಯಲ್ಲಿ ತನ್ನ ನೆರೆಮನೆ ವ್ಯಕ್ತಿಯ ಮನೆಯಲ್ಲಿ ಶವವಾಗಿ ಪತ್ತೆಯಾಗಿರುವ ದಾರುಣ ಘಟನೆ ವರದಿಯಾಗಿದೆ.

ಮೃತನನ್ನು ಗುರುದೀಪ್ ಸಿಂಗ್ ಅಲಿಯಾಸ್ ಗ್ಯಾರಿ ಎಂದು ಗುರುತಿಸಲಾಗಿದೆ. ಒಟ್ಟು 9 ಲಕ್ಷ ರೂ. ಹಣ ಪಡೆದುಕೊಂಡು, ಕರೆಂಟ್ ಶಾಕ್ (ವಿದ್ಯುತ್ ಸ್ಪರ್ಶ) ನೀಡಿ ತಮ್ಮ ಮಗನನ್ನು ಹತ್ಯೆ ಮಾಡಲಾಗಿದೆ ಎಂದು ಪೋಷಕರು ನೆರೆಮನೆಯವರ ವಿರುದ್ಧ ಗಂಭೀರ ಆರೋಪ ಮಾಡಿದ್ದು, ಪೊಲೀಸರು ಕೊಲೆ ಪ್ರಕರಣ ದಾಖಲಿಸಿ ಒಬ್ಬ ಆರೋಪಿಯನ್ನು ಬಂಧಿಸಿದ್ದಾರೆ.

ಮಾಹಿತಿಯ ಪ್ರಕಾರ, ಗುರುದೀಪ್ ಕೆನಡಾದಿಂದ ವಾಪಸಾದ ಬಳಿಕ ತನ್ನ ಸ್ವಂತ ಮನೆಗೆ ಹೋಗುವ ಬದಲು ನೆರೆಮನೆಯವರ ಮನೆಯಲ್ಲೇ ಉಳಿದುಕೊಂಡಿದ್ದನು. ವಿಮಾನ ನಿಲ್ದಾಣದಿಂದಲೇ ನೆರೆಮನೆಯ ಮಹಿಳೆಯೊಬ್ಬರು ಆತನನ್ನು ತಮ್ಮ ಮನೆಗೆ ಕರೆದೊಯ್ದಿದ್ದು, ಕಳೆದ ಎರಡು ತಿಂಗಳಿಂದ ಆತನನ್ನು ಕುಟುಂಬದವರನ್ನು ಭೇಟಿ ಮಾಡಲು ಬಿಟ್ಟಿರಲಿಲ್ಲ ಎಂದು ತಾಯಿ ದೂರಿದ್ದಾರೆ. ಮಗನ ಬಳಿಯಿದ್ದ ಸುಮಾರು 9 ಲಕ್ಷ ರೂ. ಹಣ ಪಡೆದು ಟ್ರ್ಯಾಕ್ಟರ್, ಅಪಾಚೆ ಬೈಕ್ ಹಾಗೂ ಲ್ಯಾಪ್‌ಟಾಪ್ ಖರೀದಿಸಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ. ಕೊನೆಯಲ್ಲಿ ಸ್ಥಿತಿ ಗಂಭೀರವಾದ ಬಳಿಕ ವಿಷಯ ತಿಳಿಸಿದ್ದು, ಅಷ್ಟರಲ್ಲಿ ಆತ ಸಾವನ್ನಪ್ಪಿದ್ದನು ಎಂದು ಪೋಷಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಹಣಕ್ಕಾಗಿ ಕೊಲೆ ಆರೋಪ: ಮೃತನ ಬಳಿಯಿದ್ದ 9 ಲಕ್ಷ ರೂ. ಹಣವನ್ನು ಕಸಿದುಕೊಂಡು, ಸಂಚು ನಡೆಸಿ ವಿದ್ಯುತ್ ಸ್ಪರ್ಶ ನೀಡಿ ಕೊಲೆ ಮಾಡಲಾಗಿದೆ ಎಂದು ತಂದೆ-ತಾಯಿ ದೂರು ನೀಡಿದ್ದಾರೆ.

ಪೊಲೀಸರ ಕ್ರಮ: ತಂದೆ ಕರಮ್‌ಜಿತ್ ಸಿಂಗ್ ನೀಡಿದ ದೂರಿನ ಮೇರೆಗೆ ಮನ್‌ಪ್ರೀತ್ ಸಿಂಗ್ ಮತ್ತು ಮನ್‌ದೀಪ್ ಕೌರ್ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಲಾಗಿದ್ದು, ಈಗಾಗಲೇ ಒಬ್ಬ ಆರೋಪಿಯನ್ನು ಬಂಧಿಸಲಾಗಿದೆ.

ಮರಣೋತ್ತರ ಪರೀಕ್ಷೆ: ಮೃತದೇಹವನ್ನು ವಶಕ್ಕೆ ಪಡೆದು ಸಿವಿಲ್ ಆಸ್ಪತ್ರೆಗೆ ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಿಕೊಡಲಾಗಿದ್ದು, ತನಿಖೆ ಮುಂದುವರಿದಿದೆ.