ಡಿಜಿ ಸುಶಾಂತ್ ಕುಮಾರ್ ನಾಥ್ ವಿರುದ್ಧ ಗಂಭೀರ ಲೈಂಗಿಕ ಕಿರುಕುಳ ಆರೋಪ: ಮಾಜಿ ಮಹಿಳಾ ಜೈಲು ಅಧಿಕಾರಿಯಿಂದ ಎಫ್‌ಐಆರ್ ದಾಖಲು!

ಭುವನೇಶ್ವರ: ಒಡಿಶಾ ಜೈಲು ಮತ್ತು ಸುಧಾರಣಾ ಸೇವೆಗಳ ಮಹಾನಿರ್ದೇಶಕ (ಡಿಜಿ) ಸುಶಾಂತ್ ಕುಮಾರ್ ನಾಥ್ ವಿರುದ್ಧ ಮಾಜಿ ಮಹಿಳಾ ಜೈಲು ಅಧಿಕಾರಿಯೊಬ್ಬರು ಗಂಭೀರ ಆರೋಪಗಳನ್ನು ಮಾಡಿದ್ದು, ಖಾಸಗಿಯಾಗಿ ಭೇಟಿಯಾಗಲು ನಿರಾಕರಿಸಿದ್ದಕ್ಕೆ ವೃತ್ತಿಜೀವನವನ್ನು ನಾಶಮಾಡುವುದಾಗಿ ಮತ್ತು ಮಕ್ಕಳ ಸುರಕ್ಷತೆಗೆ ಬೆದರಿಕೆ ಹಾಕಿರುವುದಾಗಿ ದೂರು ದಾಖಲಿಸಿದ್ದಾರೆ.

ಕಟಕ್‌ನ ಚೌದ್ವಾರ್ ವೃತ್ತ ಜೈಲಿನ ಮಾಜಿ ಅಧಿಕಾರಿಯ ದೂರಿನ ಮೇರೆಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ನವೆಂಬರ್ 1 ರಂದು ರಾಜ್ಯ ಸರ್ಕಾರವು ಸುಶಾಂತ್ ಕುಮಾರ್ ನಾಥ್ ಅವರನ್ನು ಗೃಹ ಇಲಾಖೆಯ ವಿಶೇಷ ಕರ್ತವ್ಯಾಧಿಕಾರಿಯಾಗಿ (ಒಎಸ್‌ಡಿ) ವರ್ಗಾವಣೆ ಮಾಡಿ ಆದೇಶ ಹೊರಡಿಸಿದೆ.

ಖಾಸಗಿ ಹೋಟೆಲ್‌ಗೆ ಭೇಟಿ ನೀಡಿ ತನ್ನನ್ನು ಭೇಟಿಯಾಗುವಂತೆ ನಾಥ್ ಅವರ ಸಹಚರ ಕುಲದೀಪ್ ರಾಥ್ ಮೂಲಕ ನಿರಂತರವಾಗಿ ಬಂದ ಆಹ್ವಾನಗಳನ್ನು ಒಪ್ಪಿಕೊಳ್ಳದ ಹಿನ್ನೆಲೆಯಲ್ಲಿ ತನ್ನ ಮೇಲೆ ಪ್ರತಿಕಾರ ತೀರಿಸಿಕೊಳ್ಳಲಾಗಿದೆ ಎಂದು ಸಂತ್ರಸ್ತೆ ಆರೋಪಿಸಿದ್ದಾರೆ. ಜೈಲಿನಿಂದ ಇಬ್ಬರು ವಿಚಾರಣಾಧೀನ ಖೈದಿಗಳು ಪರಾರಿಯಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಂದಿನ ಹಿರಿಯ ಅಧೀಕ್ಷಕ ಸುಜಿತ್ ಕುಮಾರ್ ರೌಲಾ ವಿರುದ್ಧ ದೂರು ದಾಖಲಿಸಿದ್ದೇ ತನ್ನ ಅಮಾನತು ಮತ್ತು ಕಿರುಕುಳಕ್ಕೆ ಪ್ರಮುಖ ಕಾರಣ ಎಂದು ಅವರು ತಿಳಿಸಿದ್ದಾರೆ.

ಲೈಂಗಿಕ ಕಿರುಕುಳ ಮತ್ತು ಬೆದರಿಕೆ: ಡಿಜಿ ಸುಶಾಂತ್ ಕುಮಾರ್ ನಾಥ್ ಹಾಗೂ ಅವರ ಆಪ್ತ ಕುಲದೀಪ್ ರಾಥ್ ಅಸಭ್ಯ ಸಂದೇಶಗಳನ್ನು ಕಳುಹಿಸಿ, ಖಾಸಗಿ ಭೇಟಿಗೆ ಒತ್ತಾಯಿಸಿದ್ದರು. ಒಪ್ಪದಿದ್ದಾಗ ಅಮಾನತುಗೊಳಿಸಿ, ವೇತನ ತಡೆಹಿಡಿದು ಮಾನಸಿಕವಾಗಿ ಹಿಂಸಿಸಿದ್ದಾರೆ.

ಮಕ್ಕಳ ಹಕ್ಕುಗಳ ಆಯೋಗದ ಮಧ್ಯಸ್ಥಿಕೆ: ಅಮಾನತು ಅವಧಿಯಲ್ಲಿ ಸಿಗಬೇಕಿದ್ದ ಜೀವನಾಂಶವನ್ನು ಸುಮಾರು ಆರು ತಿಂಗಳ ಕಾಲ ತಡೆಹಿಡಿಯಲಾಗಿತ್ತು. ರಾಷ್ಟ್ರೀಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗದ (NCPCR) ಮಧ್ಯಸ್ಥಿಕೆಯ ನಂತರವಷ್ಟೇ ಭತ್ಯೆಯನ್ನು ಬಿಡುಗಡೆ ಮಾಡಲಾಯಿತು.

ಪ್ರಕರಣ ದಾಖಲು ಹಾಗೂ ವರ್ಗಾವಣೆ: ಅಕ್ಟೋಬರ್ 31 ರಂದು ಚೌದ್ವಾರ್ ಪೊಲೀಸ್ ಠಾಣೆಯಲ್ಲಿ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್‌ಗಳ ಅಡಿಯಲ್ಲಿ ಎಫ್‌ಐಆರ್ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.