ಪತ್ನಿಯ ಪ್ರಿಯಕರನ ಮನೆಗೆ ಕರೆಸಿ ಮದ್ಯ ಕುಡಿಸಿ, ಪತ್ನಿಯ ಎದುರೇ ಗಂಟಲು ಸೀಳಿ ಕೊಂದ ಪತಿ!

ಮುಂಬೈ: ಅಕ್ರಮ ಸಂಬಂಧದ ಶಂಕೆಯ ಹಿನ್ನೆಲೆಯಲ್ಲಿ ಪತಿಯೊಬ್ಬ ತನ್ನ ಪತ್ನಿಯ ಪ್ರಿಯಕರನನ್ನು ಮದ್ಯ ಸೇವಿಸಲು ಮನೆಗೆ ಆಹ್ವಾನಿಸಿ, ಬಳಿಕ ಆತನ ಗಂಟಲು ಸೀಳಿ ಬರ್ಬರವಾಗಿ ಹತ್ಯೆ ಮಾಡಿರುವ ಘಟನೆ ಮುಂಬೈನಲ್ಲಿ ನಡೆದಿದೆ.

ಘಟನೆಯ ವಿವರ:

ಆರೋಪಿಯನ್ನು 48 ವರ್ಷದ ಭೀಮರಾಜ್ ಓಂಪ್ರಕಾಶ್ ಶರ್ಮಾ ಎಂದು ಗುರುತಿಸಲಾಗಿದೆ. ಮೃತನನ್ನು ವಿಕಾಸ್ ಅಶೋಕ್ ಭುಸಾರೆ ಎಂದು ಗುರುತಿಸಲಾಗಿದೆ. ವಿಕಾಸ್ ತನ್ನ ಪತ್ನಿಯೊಂದಿಗೆ ಅಕ್ರಮ ಸಂಬಂಧ ಹೊಂದಿದ್ದಾನೆ ಎಂಬ ಬಲವಾದ ಶಂಕೆ ಭೀಮರಾಜ್‌ಗೆ ಇತ್ತು. ಇದೇ ಕಾರಣಕ್ಕೆ ಬುಧವಾರ ಸಂಜೆ ವಿಕಾಸ್‌ನನ್ನು ತನ್ನ ಮನೆಗೆ ಮದ್ಯ ಸೇವಿಸಲು ಭೀಮರಾಜ್ ಆಹ್ವಾನಿಸಿದ್ದನು.

ಮನೆಯಲ್ಲಿ ಭೀಮರಾಜ್, ಆತನ ಪತ್ನಿ ಮತ್ತು ವಿಕಾಸ್ ಮೂವರೂ ಕುಳಿತು ಮದ್ಯ ಸೇವಿಸಿದ್ದಾರೆ. ಈ ವೇಳೆ ಮಾತಿಗೆ ಮಾತು ಬೆಳೆದು ಪರಿಸ್ಥಿತಿ ವಿಕೋಪಕ್ಕೆ ಹೋಗಿದೆ. ತನ್ನ ಪತ್ನಿಯಿಂದ ದೂರವಿರುವಂತೆ ಭೀಮರಾಜ್ ವಿಕಾಸ್‌ಗೆ ಎಚ್ಚರಿಕೆ ನೀಡಿದ್ದಾನೆ. ಆದರೂ ವಿಕಾಸ್ ಕಿವಿಗೊಡದಿದ್ದಾಗ, ಆಕ್ರೋಶಗೊಂಡ ಭೀಮರಾಜ್ ಪತ್ನಿಯ ಎದುರೇ ಚಾಕುವಿನಿಂದ ವಿಕಾಸ್‌ನ ಗಂಟಲು ಸೀಳಿದ್ದಾನೆ. ರಕ್ತದ ಮಡುವಿನಲ್ಲಿ ಬಿದ್ದ ವಿಕಾಸ್ ಸ್ಥಳದಲ್ಲೇ ಸಾವನ್ನಪ್ಪಿದ್ದಾನೆ.

ಪೊಲೀಸ್ ಕಾರ್ಯಾಚರಣೆ:

ಕೃತ್ಯ ಎಸಗಿದ ಬಳಿಕ ಭೀಮರಾಜ್ ಸ್ಥಳದಿಂದ ಪರಾರಿಯಾಗಿದ್ದನು. ಪೊಲೀಸರು ಮೂರು ಗಂಟೆಗಳ ಕಾಲ ತೀವ್ರ ಶೋಧ ನಡೆಸಿ ಆರೋಪಿಯನ್ನು ಬಂಧಿಸಿದ್ದಾರೆ. ಈ ಹಿಂದೆ ಕೂಡ ವಿಕಾಸ್ ವಿರುದ್ಧ ಭೀಮರಾಜ್ ಪತ್ನಿಗೆ ಕಿರುಕುಳ ನೀಡಿದ ಆರೋಪ ಕೇಳಿಬಂದಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.