“ಗಂಡಸರು ತಮ್ಮ ಒಳಗಣ್ಣು ತೆರೆದು ನೋಡಬೇಕು”: ಕತ್ರಿನಾ ಕೈಫ್‌ರ ಬಾಡಿ ಶೇಮಿಂಗ್‌ಗೆ ನಟ ಅಲಿ ಝಫರ್ ಆಕ್ರೋಶ!

ನವದೆಹಲಿ: ಬಾಲಿವುಡ್‌ನ ಖ್ಯಾತ ನಟಿ ಕತ್ರಿನಾ ಕೈಫ್ ( ಇತ್ತೀಚೆಗೆ ಹೆರಿಗೆಯ ನಂತರ ಸಾರ್ವಜನಿಕವಾಗಿ ಕಾಣಿಸಿಕೊಂಡಾಗ, ಅವರ ತೂಕ ಹೆಚ್ಚಳ ಮತ್ತು ಬದಲಾದ ಸೌಂದರ್ಯದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಕೆಲವರು ಕೀಳಾಗಿ ಕಾಮೆಂಟ್ ಮಾಡುತ್ತಿದ್ದಾರೆ. ಈ ವಿಚಾರವಾಗಿ ಕತ್ರಿನಾ ಬೆಂಬಲಕ್ಕೆ ನಿಂತಿರುವ ಪಾಕಿಸ್ತಾನಿ ನಟ ಹಾಗೂ ಗಾಯಕ ಅಲಿ ಝಫರ್, ಇಂತಹ ಕಿರಿದಾದ ಮನಸ್ಥಿತಿ ಹೊಂದಿರುವ ಪುರುಷರ ವಿರುದ್ಧ ತೀವ್ರವಾಗಿ ವಾಗ್ದಾಳಿ ನಡೆಸಿದ್ದಾರೆ.

“ಪ್ರತಿಯೊಬ್ಬ ಹೆಣ್ಣಿಗೂ ತನ್ನದೇ ಆದ ಜೀವನವಿದೆ” – ಅಲಿ ಝಫರ್

2011ರ ‘ಮೇರೆ ಬ್ರದರ್ ಕಿ ದುಲ್ಹನ್’ ಚಿತ್ರದಲ್ಲಿ ಕತ್ರಿನಾ ಅವರೊಂದಿಗೆ ನಟಿಸಿದ್ದ ಅಲಿ ಝಫರ್, ವೈರಲ್ ಆಗಿರುವ ವೀಡಿಯೊವೊಂದರಲ್ಲಿ ಮಾತನಾಡಿ, “ಆನ್‌ಲೈನ್‌ನಲ್ಲಿ ವ್ಯಕ್ತಿಯೊಬ್ಬ ಕತ್ರಿನಾ ಅವರ ಹಿಂದೆ ಹೇಗಿದ್ದರು ಮತ್ತು ಈಗ ಹೇಗಿದ್ದಾರೆ ಎಂದು ಹೋಲಿಸಿ ಅಸಮಾಧಾನ ವ್ಯಕ್ತಪಡಿಸುವುದನ್ನು ನೋಡಿದೆ. ಒಬ್ಬ ಪುರುಷನಾಗಿ ನಾನು ಹೇಳುವುದೇನೆಂದರೆ, ನಾವೆಲ್ಲರೂ ನಮಗೊಳಗೆ ಒಮ್ಮೆ ತಿರುಗಿ ನೋಡಿಕೊಳ್ಳಬೇಕಾಗಿದೆ. ನಾವು ಸೃಷ್ಟಿಸಿಕೊಂಡಿರುವ ಸೌಂದರ್ಯದ ಮಾನದಂಡಗಳಿಗೆ ಹೆಣ್ಣಿನ ದೇಹ ಅಥವಾ ಜೀವನಶೈಲಿ ಹೊಂದಿಕೆಯಾಗದಿದ್ದರೆ ಅದನ್ನು ನಿಂದಿಸುವುದು ಸಂಪೂರ್ಣ ತಪ್ಪು” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

“ಪ್ರತಿಯೊಬ್ಬ ವ್ಯಕ್ತಿಯೂ ತನ್ನದೇ ಆದ ಹೋರಾಟ ಮತ್ತು ಹಂತಗಳನ್ನು ಎದುರಿಸುತ್ತಿರುತ್ತಾನೆ. ಬೇರೆಯವರು ಅನುಭವಿಸುತ್ತಿರುವ ಸವಾಲುಗಳು ನಮಗೆ ತಿಳಿಯುವುದಿಲ್ಲ. ನಾವೆಲ್ಲರೂ ಪರಸ್ಪರ ಪ್ರೀತಿ, ಕರುಣೆ ಮತ್ತು ಸಕಾರಾತ್ಮಕತೆಯಿಂದ ಇರಬೇಕು. ಪ್ರತಿಯೊಬ್ಬ ಮಹಿಳೆಗೂ ತನ್ನದೇ ಆದ ಜೀವನವಿದ್ದು, ಆಕೆಯ ಪ್ರಸ್ತುತ ಮತ್ತು ಭವಿಷ್ಯದ ನಿರ್ಧಾರಗಳು ಆಕೆಗೆ ಸೇರಿದ್ದು. ಆಕೆಯನ್ನು ತನ್ನ ಪಾಡಿಗೆ ಬದುಕಲು ಬಿಡಿ, ನಿಮಗೇಕೆ ಅದರ ಚಿಂತೆ?” ಎಂದು ಅಲಿ ಝಫರ್ ಖಾರವಾಗಿ ಪ್ರಶ್ನಿಸಿದ್ದಾರೆ.

ತಾಯ್ತನ ಎಂಬುದು ಪ್ರಕೃತಿಯ ನಿಯಮ – ನಟಿ ಶಿವಾಲಿಕಾ ಓಬೆರಾಯ್

ಅಲಿ ಝಫರ್‌ಗಿಂತ ಮುಂಚಿತವಾಗಿ ನಟಿ ಶಿವಾಲಿಕಾ ಓಬೆರಾಯ್ ಕೂಡ ಕತ್ರಿನಾ ಪರವಾಗಿ ಧ್ವನಿ ಎತ್ತಿದ್ದರು. ಕತ್ರಿನಾ ಅವರ ಇತ್ತೀಚಿನ ಫೋಟೋ ಹಂಚಿಕೊಂಡು, “ಜನರಿಗೆ ಏನಾಗಿದೆ?! ಇದು ತಾಯ್ತನದ ಸಹಜ ಬದಲಾವಣೆ!” ಎಂದು ಸೋಶಿಯಲ್ ಮೀಡಿಯಾದಲ್ಲಿ ಟ್ರೋಲರ್‌ಗಳಿಗೆ ತಕ್ಕ ಉತ್ತರ ನೀಡಿದ್ದರು.

ಹಿನ್ನೆಲೆ:

ಕತ್ರಿನಾ ಕೈಫ್ ಮತ್ತು ವಿಕಿ ಕೌಶಲ್ ದಂಪತಿ 2025ರ ನವೆಂಬರ್‌ನಲ್ಲಿ ತಮ್ಮ ಚೊಚ್ಚಲ ಗಂಡು ಮಗು ‘ವಿಹಾನ್ ಕೌಶಲ್’ ಅನ್ನು ಜಗತ್ತಿಗೆ ಸ್ವಾಗತಿಸಿದ್ದರು. ಹೆರಿಗೆಯ ನಂತರ ಕತ್ರಿನಾ ನಟನೆಯಿಂದ ಕೊಂಚ ವಿರಾಮ ಪಡೆದು, ಮಗನ ಆರೈಕೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಇತ್ತೀಚೆಗೆ ನಿರ್ಮಾಪಕ ಕುಕು ಕೊಹ್ಲಿ ಅವರ ಪ್ರಾರ್ಥನಾ ಸಭೆಯಲ್ಲಿ ಕತ್ರಿನಾ ತಮ್ಮ ಪತಿಯೊಂದಿಗೆ ಭಾಗವಹಿಸಿದ್ದರು. ಈ ವೇಳೆ ಅವರ ಫೋಟೋಗಳನ್ನು ನೋಡಿ ಕೆಲವರು ಟ್ರೋಲ್ ಮಾಡಲಾರಂಭಿಸಿದ್ದರು.