ಲಕ್ನೋದಲ್ಲಿ ಭೀಕರ ಅಗ್ನಿ ದುರಂತ: ಪೆಟ್ ಶಾಪ್, ಅನಿಮೇಷನ್ ಸೆಂಟರ್ ಒಳಗೊಂಡ ವಾಣಿಜ್ಯ ಕಟ್ಟಡದಲ್ಲಿ ಬೆಂಕಿ, 15 ಯುವಕರು ಸಜೀವ ದಹನ!

ಲಕ್ನೋ: ಉತ್ತರ ಪ್ರದೇಶದ ರಾಜಧಾನಿ ಲಕ್ನೋದ ಅಲಿಗಂಜ್ ಪ್ರದೇಶದ ಪುರಾನಿಯಾ ಜಂಕ್ಷನ್ ಬಳಿ ಸೋಮವಾರ ಮಧ್ಯಾಹ್ನ ಸಂಭವಿಸಿದ ಭೀಕರ ಅಗ್ನಿ ದುರಂತದಲ್ಲಿ ಕನಿಷ್ಠ 15 ಜನರು ಸಾವನ್ನಪ್ಪಿದ್ದಾರೆ. ಉಷಾ ಮೆಹ್ತಾ ಮಾರ್ಗದಲ್ಲಿರುವ ಮೂರು ಅಂತಸ್ತಿನ ವಾಣಿಜ್ಯ ಕಟ್ಟಡದಲ್ಲಿ ಈ ಅವಘಡ ಸಂಭವಿಸಿದ್ದು, ಮೃತರ ಸಂಖ್ಯೆ ಇನ್ನು ಹೆಚ್ಚಾಗುವ ಆತಂಕ ಎದುರಾಗಿದೆ.

ಪೆಟ್ ಶಾಪ್ ಮತ್ತು ಗೇಮಿಂಗ್ ಸೆಂಟರ್:

ಆರಂಭದಲ್ಲಿ ಇದು ಕೋಚಿಂಗ್ ಸೆಂಟರ್ ಎಂದು ವರದಿಯಾಗಿತ್ತಾದರೂ, ಕಟ್ಟಡದ ತಳ ಅಂತಸ್ತಿನಲ್ಲಿ (Ground Floor) ಪ್ರಾಣಿಗಳ ಮಾರಾಟ ಮಳಿಗೆ (Pet Shop) ಮತ್ತು ವೆಟರಿನರಿ ಕ್ಲಿನಿಕ್ ಹಾಗೂ ಮೇಲಿನ ಅಂತಸ್ತುಗಳಲ್ಲಿ ಅನಿಮೇಷನ್ ಹಾಗೂ ಗೇಮಿಂಗ್ ತರಬೇತಿ ಕೇಂದ್ರ ಕಾರ್ಯಾಚರಿಸುತ್ತಿತ್ತು ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ. ಮೃತಪಟ್ಟವರಲ್ಲಿ ಹೆಚ್ಚಿನವರು 20 ರಿಂದ 24 ವರ್ಷದೊಳಗಿನ ಯುವಕರು ಮತ್ತು ವಿದ್ಯಾರ್ಥಿಗಳಾಗಿದ್ದಾರೆ.

ಪ್ರಾಣಭಯದಿಂದ ಜಿಗಿದ ವಿದ್ಯಾರ್ಥಿಗಳು, ಬಾತ್ ರೂಂನಲ್ಲಿ ಸಿಲುಕಿದ ಜೀವಗಳು:

ಕಟ್ಟಡದಲ್ಲಿ ಬೆಂಕಿ ಕಾಣಿಸಿಕೊಳ್ಳುತ್ತಲೇ ದಟ್ಟ ಹೊಗೆ ಆವರಿಸಿದ್ದರಿಂದ ತೀವ್ರ ಆತಂಕ ನಿರ್ಮಾಣವಾಗಿತ್ತು. ಪ್ರಾಣ ಉಳಿಸಿಕೊಳ್ಳಲು 7 ರಿಂದ 8 ವಿದ್ಯಾರ್ಥಿಗಳು ಕಟ್ಟಡದ ಮೇಲಿನ ಮಹಡಿಯಿಂದ ಕೆಳಗೆ ಜಿಗಿದಿದ್ದು, ತೀವ್ರವಾಗಿ ಗಾಯಗೊಂಡಿದ್ದಾರೆ. “ನನ್ನ ಸಹೋದರ ಒಳಗಿನಿಂದ ಫೋನ್ ಮಾಡಿ 5-6 ಜನರು ಬಾತ್ ರೂಂ ಒಳಗೆ ಲಾಕ್ ಆಗಿದ್ದೇವೆ ಎಂದು ಗಾಬರಿಯಿಂದ ಹೇಳಿದ, ಆಮೇಲೆ ಸಂಪರ್ಕ ಸಿಗಲಿಲ್ಲ” ಎಂದು ಸಂತ್ರಸ್ತರೊಬ್ಬರ ಸಹೋದರ ಶಕೀಲ್ ಕಣ್ಣೀರಿಟ್ಟಿದ್ದಾರೆ. ಕಟ್ಟಡದ ಶೌಚಾಲಯಗಳಲ್ಲಿ ದಟ್ಟ ಹೊಗೆ ತುಂಬಿಕೊಂಡಿದ್ದರಿಂದ ಉಸಿರುಗಟ್ಟಿ ಹಲವರು ಸಾವನ್ನಪ್ಪಿದ್ದಾರೆ ಎನ್ನಲಾಗಿದೆ.

ರಕ್ಷಣಾ ಕಾರ್ಯಾಚರಣೆ ಹಾಗೂ ಪ್ರಾಣಿಗಳ ರಕ್ಷಣೆ:

ಸ್ಥಳೀಯ ಪೊಲೀಸರು, ಅಗ್ನಿಶಾಮಕ ದಳದ 14 ವಾಹನಗಳು, NDRF ಹಾಗೂ SDRF ತಂಡಗಳು ಜಂಟಿಯಾಗಿ ಸುಮಾರು 4 ಗಂಟೆಗಳ ಕಾಲ ಸರಣಿ ಕಾರ್ಯಾಚರಣೆ ನಡೆಸಿ ಬೆಂಕಿಯನ್ನು ಹತೋಟಿಗೆ ತಂದಿವೆ. ಪೆಟ್ ಶಾಪ್‌ನಲ್ಲಿದ್ದ ಹಲವು ಮೂಕ ಪ್ರಾಣಿಗಳನ್ನು ರಕ್ಷಿಸಲಾಗಿದೆಯಾದರೂ, ಕೆಲವು ಪ್ರಾಣಿಗಳು ಸಹ ಬೆಂಕಿಗೆ ಬಲಿಯಾಗಿರುವ ಶಂಕೆ ಇದೆ.

ಪ್ರಧಾನಿ ಮೋದಿ ಭಾವುಕ, ಸಿಎಂ ಯೋಗಿ ತನಿಖೆಗೆ ಆದೇಶ:

ಘಟನೆಗೆ ತೀವ್ರ ಸಂತಾಪ ಸೂಚಿಸಿರುವ ಪ್ರಧಾನಿ ನರೇಂದ್ರ ಮೋದಿ, ಮೃತರ ಕುಟುಂಬಕ್ಕೆ ತಲಾ 2 ಲಕ್ಷ ರೂಪಾಯಿ ಹಾಗೂ ಗಾಯಗೊಂಡವರಿಗೆ 50,ಯಾವುದೇ ವಿಳಂಬವಿಲ್ಲದೆ 50,000 ರೂಪಾಯಿಗಳ ಪರಿಹಾರ ಘೋಷಿಸಿದ್ದಾರೆ. ಅಲಿಗಢ ಪ್ರವಾಸದಲ್ಲಿದ್ದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ತಮ್ಮ ಕಾರ್ಯಕ್ರಮವನ್ನು ಅರ್ಧಕ್ಕೆ ಮೊಟಕುಗೊಳಿಸಿ ಲಕ್ನೋಗೆ ಮರಳಿದ್ದಾರೆ. ಘಟನೆಯ ಕುರಿತು ಉನ್ನತ ಮಟ್ಟದ ತನಿಖೆಗೆ ಆದೇಶಿಸಿರುವ ಸಿಎಂ, ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದ್ದಾರೆ. ಬೆಂಕಿ ಅವಘಡಕ್ಕೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ.