Home ಕ್ರೈಂ ನ್ಯೂಸ್ ಪ್ರೇಯಸಿ ಬ್ರೇಕಪ್ ಮಾಡಿಕೊಂಡಿದ್ದಕ್ಕೆ ಸೇಡು: ವೀಡಿಯೋ ಕಾಲ್‌ನಲ್ಲೇ ಸಾಕು ನಾಯಿಗಳನ್ನು ಭೀಕರವಾಗಿ ಹತ್ಯೆಗೈದ ಪಾಪಿ ಪ್ರಿಯಕರ!
ಕ್ರೈಂ ನ್ಯೂಸ್ದಾವಣಗೆರೆನವದೆಹಲಿಬೆಂಗಳೂರು

ಪ್ರೇಯಸಿ ಬ್ರೇಕಪ್ ಮಾಡಿಕೊಂಡಿದ್ದಕ್ಕೆ ಸೇಡು: ವೀಡಿಯೋ ಕಾಲ್‌ನಲ್ಲೇ ಸಾಕು ನಾಯಿಗಳನ್ನು ಭೀಕರವಾಗಿ ಹತ್ಯೆಗೈದ ಪಾಪಿ ಪ್ರಿಯಕರ!

Share
ಪ್ರೇಯಸಿ
Share

ಕೋಲ್ಕತ್ತಾ: ಲಿವ್-ಇನ್ ಸಂಬಂಧವನ್ನು ಕೊನೆಗೊಳಿಸಿ ಮನೆ ಬಿಟ್ಟು ಹೋದ ಪ್ರೇಯಸಿಯ ಮೇಲೆ ಸೇಡು ತೀರಿಸಿಕೊಳ್ಳಲು, ಯುವಕನೊಬ್ಬ ಆಕೆಯ ಎರಡು ಸಾಕು ನಾಯಿಗಳನ್ನು ಅತ್ಯಂತ ಭೀಕರವಾಗಿ ಹತ್ಯೆಗೈದಿರುವ ಆಘಾತಕಾರಿ ಘಟನೆ ದಕ್ಷಿಣ ಕೋಲ್ಕತ್ತಾದ ಬಿಕ್ರಮ್‌ಗಢ ಪ್ರದೇಶದಲ್ಲಿ ನಡೆದಿದೆ. ಸಂಜೀಬ್ ಭಟ್ಟಾಚಾರ್ಯ ಎಂಬಾತನೇ ಈ ಕೃತ್ಯ ಎಸಗಿದ ಆರೋಪಿಯಾಗಿದ್ದು, ನಾಯಿಗಳನ್ನು ಕೊಲ್ಲುವ ದೃಶ್ಯವನ್ನು ಮಾಜಿ ಪ್ರೇಯಸಿ ಪರಿ ನೋವಾ ಅವರಿಗೆ ವೀಡಿಯೋ ಕಾಲ್ ಮಾಡಿ ತೋರಿಸಿದ್ದಾನೆ.

ಶನಿವಾರ ಸಂಜೀಬ್ ಭಟ್ಟಾಚಾರ್ಯ ತನ್ನ ಮಾಜಿ ಸಂಗಾತಿ ಪರಿ ನೋವಾ ಅವರಿಗೆ ವೀಡಿಯೋ ಕಾಲ್ ಮಾಡಿದ್ದನು. ಕರೆಯ ಸಮಯದಲ್ಲಿ ತನ್ನ ಒಂದು ಸಾಕು ನಾಯಿ ನೇಣು ಬಿಗಿದ ಸ್ಥಿತಿಯಲ್ಲಿರುವುದನ್ನು ಕಂಡು ಆಘಾತಕ್ಕೊಳಗಾದ ಪರಿ ನೋವಾ, ತಕ್ಷಣವೇ ಸ್ಥಳೀಯ ನಿವಾಸಿಯೊಬ್ಬರಿಗೆ ಕರೆ ಮಾಡಿ ತಾವು ವಾಸವಿದ್ದ ಬಾಡಿಗೆ ಫ್ಲಾಟ್‌ಗೆ ಧಾವಿಸುವಂತೆ ತಿಳಿಸಿದ್ದಾರೆ. ಸ್ಥಳೀಯರು ಫ್ಲಾಟ್‌ಗೆ ಹೋಗಿ ನೋಡಿದಾಗ ಎರಡೂ ನಾಯಿಗಳು ಮೃತಪಟ್ಟಿದ್ದು, ಮನೆಯ ತುಂಬಾ ರಕ್ತ ಚೆಲ್ಲಾಪಿಲ್ಲಿಯಾಗಿ ಬಿದ್ದಿರುವುದು ಕಂಡುಬಂದಿದೆ.

ಘಟನಾ ಸ್ಥಳದ ಭೀಕರತೆ: ಮಾಹಿತಿ ತಿಳಿದು ಸ್ಥಳಕ್ಕೆ ಧಾವಿಸಿದ ಪ್ರಾಣಿ ದಯಾ ಸಂಘದ ಕಾರ್ಯಕರ್ತರು ಫ್ಲಾಟ್‌ನಲ್ಲಿದ್ದ ಇತರ ಪ್ರಾಣಿಗಳನ್ನು ರಕ್ಷಿಸಿದ್ದಾರೆ. ಮನೆಯ ನೆಲದ ತುಂಬಾ ರಕ್ತ, ಇಟ್ಟಿಗೆ ಚೂರುಗಳು ಹಾಗೂ ಮಚ್ಚು ಪತ್ತೆಯಾಗಿದ್ದು, ಉಳಿದ ಪ್ರಾಣಿಗಳನ್ನು ಕೊಲ್ಲಲು ಆರೋಪಿ ನೀರು ಕಾಯಿಸುತ್ತಿದ್ದ ಎಂದು ಕಾರ್ಯಕರ್ತೆ ಹೃತಿಶಾ ಡೇ ತಿಳಿಸಿದ್ದಾರೆ.

ನಟಿ, ಹೋರಾಟಗಾರ್ತಿ ಆಕ್ರೋಶ: ಸ್ಥಳಕ್ಕೆ ಭೇಟಿ ನೀಡಿದ ನಟಿ ಹಾಗೂ ಪ್ರಾಣಿ ಹಕ್ಕುಗಳ ಹೋರಾಟಗಾರ್ತಿ ದೇಬ್ಲೀನಾ ದತ್ತಾ, “ಮರಿ ನಾಯಿಯ ತಲೆಯನ್ನು ಇಟ್ಟಿಗೆಯಿಂದ ಜಜ್ಜಿ ಕೊಂದಿದ್ದಾನೆ. ಇಂತಹ ವ್ಯಕ್ತಿ ಮನುಷ್ಯರನ್ನೂ ಕೊಲ್ಲಬಲ್ಲ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದು, ತಕ್ಷಣ ಕಠಿಣ ಕಾನೂನು ಕ್ರಮಕ್ಕೆ ಆಗ್ರಹಿಸಿ ಸಚಿವೆ ಅಗ್ನಿಮಿತ್ರ ಪಾಲ್ ಅವರನ್ನು ಸಂಪರ್ಕಿಸಿದ್ದಾರೆ.

ಪ್ರೇಯಸಿಯ ಗಂಭೀರ ಆರೋಪ: ಮೂಲತಃ ಹಿಮಾಚಲ ಪ್ರದೇಶದವರಾದ ಪರಿ ನೋವಾ, “ಕಳೆದ 6-7 ತಿಂಗಳಿನಿಂದ ಪ್ರತಿದಿನ ನನ್ನ ಮೇಲೆ ದೈಹಿಕ ಹಲ್ಲೆ ನಡೆಸುತ್ತಿದ್ದ. ಪ್ರಾಣಭಯದಿಂದ ನಾನು ಮನೆ ಬಿಟ್ಟು ಹೊರಬಂದೆ. ಈ ಹಿಂದೆ ಆತ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿ, ನನ್ನ ಸಹೋದರನ ವಿರುದ್ಧ ಸುಳ್ಳು ಕೇಸ್ ದಾಖಲಿಸಿದ್ದಾನೆ” ಎಂದು ಮಾಧ್ಯಮಗಳ ಮುಂದೆ ಕಣ್ಣೀರಿಟ್ಟಿದ್ದಾರೆ.

ಘಟನೆಗೆ ಸಂಬಂಧಿಸಿದಂತೆ ಸ್ಥಳೀಯ ಜಾದವ್‌ಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಪೊಲೀಸರು ಆರೋಪಿ ಸಂಜೀಬ್ ಭಟ್ಟಾಚಾರ್ಯನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿ ಬಂಧಿಸಿದ್ದಾರೆ. ಆರೋಪಿಯು ಮಾನಸಿಕ ಅಸ್ವಸ್ಥನಾಗಿದ್ದು, ಸಮಾಜದಲ್ಲಿ ಮುಕ್ತವಾಗಿ ಓಡಾಡಲು ಬಿಡಬಾರದು ಎಂದು ಟೋಲಿಗಂಜ್ ಕ್ಷೇತ್ರದ ಬಿಜೆಪಿ ಶಾಸಕಿ ಪಾಪಿಯಾ ಅಧಿಕಾರಿ ಒತ್ತಾಯಿಸಿದ್ದಾರೆ.

Share

Leave a comment

Leave a Reply

Your email address will not be published. Required fields are marked *

Recent Comments

No comments to show.
Related Articles