ಬಾಲಕನ ಭೀಕರ ಹತ್ಯೆ ಮಾಡಿ ಗೋಣಿಚೀಲದಲ್ಲಿ ಶವ ಎಸೆದ ಪ್ರಕರಣ, ಪ್ರೇಯಸಿ ಸೇರಿದಂತೆ ಮೂವರ ಬಂಧನ

ತಿರುವನಂತಪುರಂ: ಕೇರಳದ ತಿರುವನಂತಪುರಂನಲ್ಲಿ 17 ವರ್ಷದ ಬಾಲಕನನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿ, ಮೃತದೇಹವನ್ನು ಗೋಣಿಚೀಲದಲ್ಲಿ ಕಟ್ಟಿ ಖಾಲಿ ನಿವೇಶನದಲ್ಲಿ ಎಸೆದಿರುವ ಘಟನೆ ತೀವ್ರ ಆಘಾತ ಮೂಡಿಸಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ 18 ವರ್ಷದ ಯುವತಿ ಸೇರಿದಂತೆ ಇಬ್ಬರನ್ನು ಪೊಲೀಸರು ಬಂಧಿಸಿದ್ದು, ಓರ್ವ ಅಪ್ರಾಪ್ತನನ್ನು ವಶಕ್ಕೆ ಪಡೆದಿದ್ದಾರೆ.

ಮೃತ ಬಾಲಕನನ್ನು ಅಪ್ರಾಪ್ತ ಆರೋಪಿಗಳು ಪರಿಚಯದ ನೆಪದಲ್ಲಿ ನಿರ್ಜನ ಪ್ರದೇಶಕ್ಕೆ ಕರೆಸಿಕೊಂಡಿದ್ದರು. ವಿಚಾರಣೆಯ ಪ್ರಕಾರ, ಅಪ್ರಾಪ್ತ ಆರೋಪಿಯ ಮಾಜಿ ಪ್ರೇಯಸಿಯೊಂದಿಗೆ ಡೇಟಿಂಗ್ ಮಾಡುತ್ತಿದ್ದ ಮೃತನ ಸ್ನೇಹಿತನೇ ಅಸಲಿ ಗುರಿಯಾಗಿದ್ದನು.

ಆದರೆ ಆತನನ್ನು ಕರೆತರಲು ನಿರಾಕರಿಸಿದ ಕಾರಣಕ್ಕೆ ಬಾಲಕನನ್ನು ಬಲಿಪಡೆಯಲಾಗಿದೆ ಎಂದು ಶಂಕಿಸಲಾಗಿದೆ. ಹತ್ಯೆಯ ಬಳಿಕ ಶವವನ್ನು ವಿಲೇವಾರಿ ಮಾಡಲು ಕಬಾಡಾ  ಕಾಯ್ದೆಯಡಿ ಆರೋಪಿಯಾಗಿರುವ 22 ವರ್ಷದ ಉಮರ್ ಎಂಬಾತನ ಸಹಾಯ ಪಡೆದಿರುವುದು ತನಿಖೆಯಿಂದ ತಿಳಿದುಬಂದಿದೆ.

ಗೋಣಿಚೀಲದಲ್ಲಿ ಶವ ಪತ್ತೆ: ನಿರ್ಜನ ಪ್ರದೇಶದಲ್ಲಿ ಗೋಣಿಚೀಲದೊಳಗೆ ತುಂಬಿ ಎಸೆಯಲಾಗಿದ್ದ ಸ್ಥಿತಿಯಲ್ಲಿ ಬಾಲಕನ ಮೃತದೇಹ ಪತ್ತೆಯಾಗಿದ್ದು, ಮೇಲ್ನೋಟಕ್ಕೆ ಕುತ್ತಿಗೆ ಹಿಸುಕಿ ಕೊಲೆ ಮಾಡಿರುವುದು ದೃಢಪಟ್ಟಿದೆ.

ಕುಟುಂಬದ ಗಂಭೀರ ಆರೋಪ: ಅಪ್ರಾಪ್ತ ಬಾಲಕನು ಕಾನೂನಿನ ರಕ್ಷಣೆಗಾಗಿ ಇತರರನ್ನು ಕಾಪಾಡಲು ತನ್ನ ಮೇಲೆಯೇ ತಪ್ಪು ಹೊರಿಸಿಕೊಳ್ಳುತ್ತಿದ್ದಾನೆ ಎಂದು ಮೃತನ ತಂದೆ ಶಂಕೆ ವ್ಯಕ್ತಪಡಿಸಿದ್ದು, ಪೊಲೀಸರ ತನಿಖಾ ವೈಫಲ್ಯದ ಬಗ್ಗೆಯೂ ಆಕ್ರೋಶ ಹೊರಹಾಕಿದ್ದಾರೆ.

ಸಾಕ್ಷ್ಯ ನಾಶಕ್ಕೆ ಸಂಚು: ಯುವತಿಯು ಸಾಕ್ಷ್ಯ ನಾಶಪಡಿಸುವ ಕುರಿತು ಇತರ ಆರೋಪಿಗಳಿಗೆ ಸಲಹೆ ನೀಡಿದ್ದು, ಪೊಲೀಸರು ಈ ನಿಟ್ಟಿನಲ್ಲಿ ಕೂಲಂಕುಷ ತನಿಖೆ ಮುಂದುವರಿಸಿದ್ದಾರೆ.